Read Xitsonga Jude 1 Bible Online

Jude 1 - Xitsonga bible

Jude 1

¹Yuda, nandza wa Yesu Kriste, makwa Yakobo; Eka lava vitiweke va nga lava hlawuriweke hi Xikwembu Tatana, lava hlayisiwaka hi Yesu Kriste:

²Tintswalo ni ku rhula, ni rirhandzu a swi mi talele!

³Varhandziwa, loko ndzi ri karhi ndzi chivirikela ku mi tsalela timhaka ta ku hlayiseka loku hi ku averiweke swin'we, a swi ndzi fanerile ku mi tsalela leswaku ndzi mi khongotela, ndzi ku: Mi lwela ku pfumela loku vakwetsimi va ku nyikiweke kan'we.

⁴Hikuva exikarhi ka n'wina, ku nghene hi ku wonga, vanhu van'wana, lava ku avanyisiwa ka vona ku tsariweke khale; vanhu lava nga chaviki Xikwembu, va hundzula tintswalo ta Xikwembu xa hina manyala, kutani va landzula Yesu Kriste loyi a nga yena Mufumi a ri swakwe, ni Hosi ya hina.

⁵Kambe ndzi rhandza ku mi tsundzuxa mhaka leyi mi yi tivaka, hileswaku Hosi, kuteloko yi ponisile tiko ra yona etikweni ra Egipta, yi engete yi lovisa lava nga pfumelangiki;

⁶kambe, ni tintsumi leti nga hlayisangiki swa ku sungula ka tona, kambe ti sukele ekaya ka tona, yi ti hlayisile emunyameni, hi ku bohiwa loku nga heriki, ku langutela kona ku avanyisa ka siku lerikulu.

⁷Kukotisa Sodoma na Gomora, ni miti leyi ngi yi ri ekusuhi na kona, yi nga leyi tinyiketeke vuoswini ni ku landzela nyama yimbe, hi mukhuva wu ri wun'we na tona, miti leyi yi vekiwile ku va xikombiso, yi ri karhi yi avanyiseriwe ndzilo lowu nga heriki.

⁸Hi mukhuva wolowo, eku lorheni ka vona, va tinyamisa enyameni, va engeta va alela vuhosi, va sandza lava nga eku kwetsimeni.

⁹Kasi loko a ri Mikaele, ntsumi leyikulu, loko a kanetana na Diyavulosi, va ri karhi va lwetana hi ntsumbu wa Muxe, u chavile ku n'wi avanyisa hi mirhukano, kambe a ku: “Hosi a yi ku tshinye!”

¹⁰Kambe valavo va sandza hinkwaswo leswi va nga swi tiviki kutani leswi va swi tivaka hi ku tswariwa kukotisa swiharhi leswi pfumalaka ku twisisa, va tilovisa ha swona.

¹¹Va ni khombo, hikuva va fambile hi ndlela ya Kayini, kutani va hambukile hi ku tsutsumela hakelo kukotisa Balaama, kutani va tilovisile hi ku kaneta loku kotisaka ka Kora.

¹²Valavo i swivati emikhubyeni ya n'wina ya rirhandzu, loko va ri karhi va dya na n'wina, va nga chavi nchumu loko va tixurhisa. I mapapa lama nga riki na mpfula, lama yisiwaka hala ni hala hi mheho; i mirhi leyi hlanhliweke hi vuxika, leyi nga velekiki, leyi feke kambirhi, leyi tsuvuriweke.

¹³I magandlati lama levaka ya lwandle, lama tlhutlhaka khuvi, swi nga swisandzu swa vona; i tinyeleti leti lahlekeke, leti lunghiseriweke ntima wa munyama hilaha ku nga heriki.

¹⁴Hi vona valavo Enoko, wanuna lowa vuntlhanu na vambirhi ku sukela eka Adamu, a nga va bvumbha loko a te:

¹⁵“Vonani, Hosi yi tile ni vakwetsimi va yona va madzanadzana ku ta avanyisa hinkwavo, ni ku khorwisa hinkwavo va ka vona lava nga riki na vukhongeri, ehenhla ka mitirho ya vona hinkwayo leyi va yi endleke hi ku sandza, ni le henhla ka timhaka hinkwato ta vusandzi leti vadyohi lava nga riki na vukhongeri, va ti vuleke ehenhla ka yona.”

¹⁶I vanhu va ku n'unun'uta, lava vilelaka hi masiku, va ya hi ku navela ka vona; milomu ya vona yi vulavula manyunyu, va ri karhi va hlamala nghohe ya vanhu ku ta pfuniwa.

¹⁷Kambe n'wina varhandziwa, anakanyani timhaka leti vuriweke eku sunguleni hi vaapostola va Hosi ya hina, Yesu Kriste;

¹⁸hilaha va mi byeleke leswaku, “enkarhini wa makumu, vahleki va ta va kona lava nga ta famba hi ku navela ka vona, va nga chavi Xikwembu.”

¹⁹Hi vona lava hambanaka na hina, lava nga ni vutomi bya nyama ntsena, va nga ri na Moya.

²⁰Kambe loko mi ri n'wina, varhandziwa, tiakeleni ehenhla ka ku pfumela ka n'wina loku kwetsimaka hi ku tlurisa, mi ri karhi mi khongela hi Moya lowo Kwetsima,

²¹mi tihlayisa erirhandzwini ra Xikwembu, mi ri karhi mi langutela tintswalo ta Hosi ya hina Yesu Kriste, leswaku mi ta hiwa vutomi lebyi nga heriki.

²²Tsetselelani van'wana lava tsekatsekaka;

²³kutani mi ponisa van'wana hi ku va tshukisa, mi va vutla endzilweni, mi ri karhi mi chava ni nguvu leyi nga nyamisiwa hi nyama.

²⁴Eka loyi a nga ni matimba ya ku mi hlayisa mi nga khunguvanyeki, ni ku mi yimisa mi nga ri na xivati emahlweni ka yena, eku kwetsimeni ni le ku tsakeni;

²⁵eka Xikwembu xi ri xoxe, Muhlayisi wa hina, ha Yesu Kriste, Hosi ya hina, ku ve ku kwetsima, ni vukulu, ni matimba, ni vuhosi, mikarhi hinkwayo yi nga si va kona, ni sweswi, ni ku ya fika emikarhini hinkwayo leyi nga riki na ku hela! Amen.