Read Xitsonga Revelation 11 Bible Online

Revelation 11 - Xitsonga bible

Revelation 11

¹Kutani ndzi nyikiwa rihlanga leri fanaka ni nhonga, va ku: “Yima u pima tempele ya Xikwembu, ni alitari, ni lava khongelaka eka yona.

²Kambe loko ri ri rivala leri nga ehandle ka tempele, u ri siya u nga ri pimi, hikuva ri nyikiwile vamatiko; kutani va ta kandziyela muti lowo kwetsima hi tin'hweti ta mune wa makume na timbirhi.

³Kutani ndzi ta nyika timbhoni ta mina ha timbirhi ku profeta hi masiku ya khume ra madzana na madzana mambirhi, na ntlhanu wa makume, na khume rin'we 1 260, ti ambele masaka.”

⁴Hi yona mitlhwari leyimbirhi, ni tikandelari letimbirhi leti yimaka emahlweni ka Hosi ya misava.

⁵Kungakuloko munhu a rhandza ku va endla nsele, ndzilo wu ta huma emilon'wini ya vona, wu hisa valala va vona; kutani mani na mani la rhandzaka ku va endla nsele u ta fanela ku dlayisiwa sweswo.

⁶Va ni matimba yo pfala tilo leswaku mpfula yi nga ha ni hi masiku lawa va profeteke ha wona; kambe va ni matimba ya ku hundzula mati ma va ngati, ni ya ku ba misava hi makhombo walawo, hi mikarhi hinkwayo leyi va rhandzaka ku endlisa sweswo.

⁷Kutakuloko va hetile vumbhoni bya vona xivandzana lexi humaka ekheleni, xi ta lwa na vona, xi va hlula, xi va dlaya.

⁸Kutani mitsumbu ya vona yi ta tshama emitsendzeleni ya muti lowukulu, lowu vuriwaka hi moya, Sodoma na Egipta, laha Hosi ya vona yi vambiweke kona.

⁹Kutani van'wana exikarhi ka matiko ni tinxaka, ni tindzimi, ni swivongo va ta languta la mitsumbu ya vona hi masiku manharhu ni hafu, kambe va ta ala leswaku mitsumbu ya vona yi lahliwa esirheni.

¹⁰Kutani lava akeke emisaveni va ta tsakela ku fa ka vona, va tsakisisa, va ta rhumelana tinyiko, hikuva vaprofeta valavo vambirhi va xanisile lava akeke emisaveni.

¹¹Kuteloko ku hundzile masiku manharhu na hafu, moya wun'wana wa vutomi lowu humaka eka Xikwembu, wu nghena eka vona; kutani va yima hi milenge ya vona, kutani ku chava lokukulu ku wela lava va va vonaka.

¹²Kutani ndzi twa rito lerikulu leri humaka etilweni, ri ku eka vona: “Tlhandlukelani halenu.” Kutani va tlhandlukela etilweni hi papa, va ri karhi va langutiwa hi valala va vona.

¹³Enkarhini wolowo ku tsekatseka lokukulu ka misava ku va kona, kutani ku avanyisa ka khume ka muti ku hindzimuka, vanhu va ntlhanu wa magidigidi na magidigidi mambirhi 7 000 va dlawa hi ku tsekatseka kuloku ka misava; kutani van'wana va khomiwa hi ku chava, va dzunisa Xikwembu xa le tilweni.

¹⁴Khombo ra vumbirhi ri hundzile: vonani, khombo ra vunharhu ri ta fika sweswi.

¹⁵Kutani ntsumi ya ntlhanu na timbirhi yi yimba nanga ya yona; ku twakala marito lamakulu lama vulavulaka etilweni, ma ku: “Ku fuma ka misava ni ka swilo hinkwaswo ku nyikiwile Hosi ya hina ni Kriste wa yena, kutani u ta fuma hilaha ku nga heriki.”

¹⁶Kutani vakulukumba va makume mambirhi na mune lava tshamiseke eswiluvelweni swa vona, emahlweni ka Xikwembu, va wela emimombyeni ya vona, va gandzela Xikwembu,

¹⁷va ku: “Ha ku khensa Hosi, Xikwembu xa matimba hinkwawo, lexi nga kona, ni lexi a xi ri kona hikuva u tekile matimba ya wena lamakulu, kutani u nghenile eku fumeni ka wena.

¹⁸Matiko ma karihile; kambe ku kariha ka wena ku humelele, ni nkarhi wa ku avanyisa vafi, ni wa ku tlherisela hakelo ya malandza ya wena vaprofeta, ni vakwetsimi, ni lava chavaka vito ra wena, lavatsongo ni lavakulu, ni ku herisa lava herisaka misava.”

¹⁹Kavaloko tempele ya Xikwembu yi pfuriwa etilweni, kutani areka ya ntwanano wa xona yi voniwa etempeleni ya xona; kutani ku humelela ku hatima, ni marito, ni ku pfuma, ni ku tsekatseka ka misava, ni xihangu lexikulu.