Read Xitsonga Revelation 20 Bible Online

Revelation 20 - Xitsonga bible

Revelation 20

¹Kutani ndzi vona ntsumi yin'wana leyi xikaka hi le tilweni; yi ri ni mpfungura wa khele ni mpecana leyikulu evokweni ra yona;

²kavaloko yi khoma dragona, nyoka ya khale, a nga Diyavulosi na Satana; yi n'wi bohela malembe ya khume ra madzana.

³Kutani yi n'wi cukumeta ekheleni, yi n'wi pfalela kona, yi ri tiyisa hi mfungho ehenhla ka rona, leswaku a nga tshuki a hambukisa matiko ku ko ku hetiseka malembe ya khume ra madzana; endzhaku ka swona u ta fanela ku tshunxiwa hi nkarhi wu nga ri wungani.

⁴Kavaloko ndzi vona swiluvelo; kutani van'wana va tshamisa ehenhla ka swona, va nyikiwa matimba ya ku avanyisa. Ndzi vona ni mimoya ya lava tsemiweke tinhloko hikwalaho ka vumbhoni bya Yesu, ni hikwalaho ka rito ra Xikwembu, ni lava nga gandzelangiki xivandza, hambi xi ri xifaniso xa xona, ni lava nga amukelangiki mfungho wa xona emimombyeni ni le mavokweni ya vona; kutani va hanya, ni ku fuma na Kriste hi malembe ya khume ra madzana.

⁵Loko va ri van'wana lava feke, a va pfukanga, malembe ya khume ra madzana ma nga si hela. Hi kona ku pfuka ka ku sungula!

⁶Ku katekile, ku kwetsimile lava nga ni ku averiwa eku pfukeni ko sungula; rifu ra vumbirhi a ri na matimba ehenhla ka vona; kambe va ta va vaprista va Xikwembu ni va Kriste, kutani va ta fuma na yena hi malembe ya khume ra madzana.

⁷Kutakuloko malembe ya khume ra madzana ma herile, Satana u ta tshunxiwa ekhotsweni ra yena;

⁸u ta huma ku ya hambukisa matiko lama nga ematlhelweni ya mune va misava, Gogo na Magogo, a va hlengeletela ku lwa; ku tala ka vona ku fana ni sava ra lwandle.

⁹Kutani va tlhandlukele erivaleni ra misava, va rhendzela mixaxa ya vakwetsimi, ni muti lowu rhandziwaka, kambe ndzilo wu xika hi le tilweni wu va heta.

¹⁰Kutani Diyavulosi, loyi a va kanganyisaka, a cukumetiwa etiveni ra ndzilo ni xivavula, laha ku nga ni xivandza ni muprofeta wa vunwa; va ta xanisiwa kona vusiku ni nhlekanhi hilaha ku nga heriki.

¹¹Kutani ndzi vona xiluvelo lexikulu lexo basa ni loyi a tshamiseke eka xona. Tilo ni misava swi baleka emahlweni ka mombo wa yena, kutani xivandla xa swona xi nga ha vonaki.

¹²Ndzi vona ni vafi lavakulu ni lavatsongo, va yimile emahlweni ka xiluvelo. Kutani tibuku ti hanguluxiwa; ku hanguluxiwa ni buku yin'wana, yi nga buku ya vutomi, kutani vafi va avanyisiwa hi leswi tsariweke etibukwini, ku ri hi mitirho ya vona.

¹³Lwandle ri tlherisa vafi va rona; rifu ni xivandla xa vafi, swi humesa vafi lava ngi va ri eka swona; kutani un'wana ni un'wana a avanyisiwa hi mitirho ya yena.

¹⁴Kutani rifu ni xivandla xa vafi swi hoxiwa etiveni ra ndzilo; hi rona rifu ra vumbirhi, tiva ra ndzilo.

¹⁵Kutani un'wana ni un'wana la nga ka a nga kumiwanga a tsariwile ebukwini ya vutomi, a hoxiwa etiveni ra ndzilo.