Read Xitsonga Revelation 4 Bible Online

Revelation 4 - Xitsonga bible

Revelation 4

¹Endzhaku ka sweswo ndzi languta, kutani ndzi vona nyangwa yi pfuriwile etilweni kutani rito lero rhanga leri ndzi ri tweke, ri vulavula na mina, ri fana ni nanga, ri ku: “Tlhandlukela halenu, ndzi ta ku kombisa leswi nga ta humelela endzhaku ka leswi.”

²Kutani hi nomu lowu, ndzi va emoyeni, ndzi vona xiluvelo xi vekiwile etilweni, kutani un'wana a tshamile exiluvelweni xexo.

³La tshameke eka xona, a a fana ni ribye ra yaspere ni sardiyo, xona xiluvelo xi rhendzeriwe hi nkwangulatilo lowu fanaka ni ku vonakala ka emeralda.

⁴Kambe xiluvelo a xi rhendzeriwe hi swiluvelo swa makume mambirhi na mune. Eswiluvelweni leswi, a ku tshamile vakulukumba va makume mambirhi na mune, va ambele tinguvu leto basa, va rhwele etinhlokweni ta vona tihari ta nsuku.

⁵Exiluvelweni, a ku huma ku hatima, ni ku pfuma, ni marito. Emahlweni ka xiluvelo, a ku pfurha timboningo ta ntlhanu na timbirhi, yi nga mimoya ya ntlhanu na mimbirhi ya Xikwembu.

⁶Emahlweni ka xiluvelo, a ku ri ni lwandle ra nghilazi leri fanaka na kristala. Exikarhi ka xiluvelo, ni matlhelo hinkwawo ya xiluvelo, a ku ri ni swivumbiwa leswi hanyaka swa mune, swi ri ni mahlo layo tala emahlweni ni le ndzhaku.

⁷Xivumbiwa lexi hanyaka lexo rhanga a xi fana ni nghala, xivumbiwa lexi hanyaka lexa vumbirhi a xi fana ni rhole, xivumbiwa lexi hanyaka lexa vunharhu a xi ri ni mombo wa munhu; kutani xivumbiwa lexi hanyaka lexa vumune a xi fana ni gama leri hahaka.

⁸Swivumbiwa leswi hanyaka leswa mune, xin'wana ni xin'wana xa swona a xi ri ni timpapa ta ntlhanu na rin'we, a swi tele ni mahlo hi matlhelo hinkwawo ni le ndzeni; kutani a swi nga miyeri nhlekanhi ni vusiku, a swi ku: “Ku kwetsima, ku kwetsima, ku kwetsima Hosi Xikwembu lexi nga ni matimba hinkwawo, Loyi a a ri kona, Loyi a nga kona, Loyi a taka.”

⁹Kutani loko swivumbiwa leswi hanyaka swi ri karhi swi vula ku kwetsima, ni xichavo, ni ku khensa eka la tshameke exiluvelweni, la hanyaka hi masiku lama nga heriki,

¹⁰vakulukumba va makume mambirhi na mune a va wa hi matsolo emahlweni ka la tshameke exiluvelweni, va gandzela la hanyaka hi masiku lama nga heriki, va hoxa tihari ta vona emahlweni ka xiluvelo, va ku:

¹¹“Hosi ni Xikwembu xa hina, u lulameriwe hi ku kwetsima, ni xichavo, ni matimba, hikuva u tumbuluxile swilo hinkwaswo, kutani swi kona, kambe swi tumbuluxiwe hi ku rhandza ka wena.”