Read Xitsonga Revelation 6 Bible Online

Revelation 6 - Xitsonga bible

Revelation 6

¹Kutani ndzi languta Xinyimpfana loko xi lemula ku tiyisa kun'wana, kavaloko ndzi twa xin'wana xa swi vumbiwa leswi hanyaka leswa mune, xi vulavula hi rito leri fanaka ni ku pfuma ka tilo, xi ku: “Tana!”

²Kutani ndzi languta, ndzi vona hanci leyo basa; loyi a yi khandziyeke a ri ni vurha, kutani a nyikiwa harhi kutani a suka a ri muhluri ku ya hlula.

³Kuteloko xi lemule ku tiyisa ka vumbirhi, ndzi twa xivumbiwa xa vumbirhi xi ku: “Tana!”

⁴Kutani ku huma hanci yin'wana ya ribungu, loyi a yi khandziyeke a nyikiwe matimba ya ku herisa ku rhula emisaveni, ni ku endla leswaku vanhu va dlayana; a nyikiwa ni tlhari lerikulu.

⁵Kuteloko xi lemule ku tiyisa ka vunharhu, ndzi twa xivumbiwa lexa vunharhu, xi ku: “Tana!” Kuteloko ndzi langutile, ndzi vona hanci leya ntima; loyi a yi khandziyeke a a tamele xikalo xo pima evokweni ra yena.

⁶Kutani ndzi twa exikarhi ka swivumbiwa leswi hanyaka leswa mune swange i rito leri nge: “Mpimo wun'we wa koro, denari yin'we, ni mipimo minharhu ya barley, denari yin'we; kambe u nga tshuki u onha mafurha ni vhinyo.”

⁷Kuteloko xi lemule ku tiyisa ka vumune, ndzi twa rito ra xivumbiwa lexi hanyaka lexa vumune, ri ku: “Tana!”

⁸Ndzi languta, kutani ndzi vona hanci ya ribungwanyana; loyi a yi khandziyeke a a vuriwa Rifu, a a landzeriwa hi xivandla xa vafi; kutani a nyikiwa matimba ehenhla ka tlhelo ra vumune ra misava, ku ya dlaya vanhu hi tlhari ni ndlala, ni rifu ni hi swivandzana swa misava.

⁹Kuteloko xi lemule ku tivisa ka vuntlhanu, ndzi vona ehansi ka alitari mimoya ya lava dlayeriweke rito ra Xikwembu, ni vumbhoni lebyi va nga byi tiyisa.

¹⁰A va huwelela hi rito lerikulu, va ku: “Hosi yo kwetsima ya ntiyiso, u ta hlwela ku ri kungani ku avanyisa ni ku rihisa ngati ya hina eka lava akeke emisaveni xana?”

¹¹Kutani un'wana ni un'wana a nyikiwa nguvu yo basa leyo leha, va byeriwa leswaku va wisa kambe nkarhinyana, ku ko ku hetiseka ntsengo wa vanakulobye va vona va malandza, ni wa vamakwavo lava nga ta dlawa kukotisa vona.

¹²Kutani ndzi languta loko xi lemula ku tiyisa kantlhanu na kan'we kutani ku tsekatseka lokukulu ka misava ku va kona, dyambu ri va ra ntima kukota nkwama wa voya, kutani n'weti wu fana ni ngati,

¹³tinyeleti ta le tilweni ti wela emisaveni, kukota nkuwa lowu tsekatsekisiwaka hi moya lowukulu, wu cukumetaka hala ni hala mihandzu ya wona leyi nga siki vupfaka.

¹⁴Kutani tilo ri tlhela kukotisa buku loko yi songiwa, tintshava hinkwato, ni swihlale hinkwaswo swi tsekatsekisiwa evutshan'weni bya swona.

¹⁵Kutani tihosi ta misava, ni vakulukumba, ni tindhuna, ni vafuwi, ni lava nga ni matimba, ni hinkwavo lava fuyiweke, ni lava nga fuyiwangiki, va tifihla emabakweni ni le maribyeni ya tintshava.

¹⁶Kutani va ku eka tintshava ni le ka maribye: “Hi weleni ehenhla, mi hi fihla emahlweni ka mombo wa loyi a tshameke exiluvelweni, ni le mahlweni ka vukari bya Xinyimpfana,

¹⁷hikuva siku lerikulu ra ku kariha ka xona ri humelele, kutani i mani loyi a nga ri tiyelaka?”