Read Xitsonga 1 Samuel 10 Bible Online

1 Samuel 10 - Xitsonga bible

1 Samuel 10

¹Kutani Samiele a teka rimhondzo ra mafurha, a ri chela enhlokweni ya Sawulo, kutani a n'wi ntswontswa a ku: “Xana Yehovha a nga ku chelanga hi mafurha leswaku u va hosi ehenhla ka ndzhaka ya yena xana?

²Namuntlha loko u ta famba u hambana na mina, u ta kuma vanhu vambirhi kusuhi ni sirha ra Rahele, endzilakaneni wa Benjamini, eSelesaka, va ta ku eka wena: ‘Timbhongolo leti ngi u ti lava, ti kumiwile, kutani tata wa wena u rivele mhaka ya timbhongolo, kambe u vavisekela n'wina, a ku: “Ndzi ta endla yini hikwalaho ka n'wananga?” ’

³U ta suka kona, u ya emahlweni, kutani u ta fika enkuhlwini wa Taboro: u ta hlanganisiwa kona ni vanhu vanharhu lava tlhandlukelaka eka Xikwembu, eBetele, un'wana a rhwele swimbutana swinharhu, un'wana a rhwele swinkwa swinharhu, un'wana kambe a rhwele xikutsu xa vhinyo;

⁴va ta ku rungurisa ku hanya ka wena, kutani va ta ku nyika swinkwa swimbirhi, u ta swi amukela emavokweni ya vona.

⁵Endzhaku ka swona u ta fika eGibeya-Elohimi, laha ku nga ni yindlu ya valanguteri va tiko ra Vafilista. Kutakuloko u nghena kona, emutini, u ta hlangana ni ntlawa wa vaprofeta lava ngirimelaka va suka exivandleni lexi tlakukeke va ri ni timbila, ni ngoma, ni nanga, ni haripa, va ri karhi va bvumbha.

⁶Kutani Moya wa Yehovha wu ta ku khoma, u ta bvumbha na vona, u ta hundzuriwa u va munhu un'wana.

⁷Kutakuloko swikombiso leswi swi ku humelela, u ta endla leswi nga ta va emahlweni ka wena, hikuva Xikwembu xi na wena.

⁸Kambe u ta ndzi rhangela ku ya Giligala, kutani ndzi ta ta eka wena ku ta humesa tiholokosta ni ku humesa magandzelo ya ku khensa; u ta ndzi langutela masiku ya ntlhanu na mambirhi, ndzi ko ndzi fika eka wena, hi kona ndzi nga ta ku byela leswi u nga ta fanela ku swi endla.”

⁹Kuteloko Sawulo a fularhele Samiele, Xikwembu xi n'wi hundzuluxa mbilu, kutani swikombiso hinkwaswo leswi, swi n'wi humelela hi siku lero.

¹⁰Kuteloko va fika eGibeya, waswivo, ntlawa wa vaprofeta wu ta hlangana na yena kutani Moya wa Xikwembu wu n'wi khoma, a bvumbha exikarhi ka vona.

¹¹Hinkwavo lava nga n'wi tiva khale, kuteloko va n'wi vona a ri karhi a bvumbha swin'we ni vaprofeta, vanhu lava va byelana va ku: “Ku humelele yini eka n'wana wa Kixi xana? Sawulo u le xikarhi ka vaprofeta xana?”

¹²Kutani un'wana wa kona a hlamula, a ku: “Tata wa vona i mani xana?” Hikwalaho rito leri ri hundzuke xivuriso, va ku: “Xana Sawulo u le xikarhi ka vaprofeta?”

¹³Kuteloko Sawulo u tshikile ku bvumbha, a ya exivandleni lexi tlakukeke.

¹⁴Kutani makwa tata wa Sawulo a ku eka Sawulo ni ka nandza wa yena: “A mi yile kwihi xana?” A ku: “A hi ya lava timbhongolo, kambe leswi hi nga ti vonangiki, hi yile eka Samiele.”

¹⁵Kutani makwa tata wa Sawulo a ku: “Ndzi tivise leswi Samiele u mi byeleke swona.”

¹⁶Sawulo a ku eka yena: “U hi khorwisile leswaku timbhongolo ti kumiwile.” Kambe loko yi ri emhakeni ya vuhosi, a nga n'wi byelanga leswi Samiele a swi vuleke.

¹⁷Kutani Samiele a hlengeleta tiko emahlweni ka Yehovha eMispa;

¹⁸a ku eka vana va Israele: “Yehovha, Xikwembu xa Israele, a ku: ‘Ndzi humesile Israele Egipta, ndzi mi ponisile emavokweni ya Vaegipta ni le mavokweni ya tihosi hinkwato, leti ngi ti mi xanisa.’

¹⁹Kambe n'wina, namuntlha, mi sandzile Xikwembu xa n'wina, xona lexi nga mi ponisa emakhombyeni hinkwawo ya n'wina, ni le ku xanisekeni ka n'wina, kutani mi te eka xona: ‘Kunene, u ta veka hosi ehenhla ka hina!’ Sweswi humelelani emahlweni ka Yehovha hi tinyimba ta n'wina ni madzanadzana ya n'wina.”

²⁰Samiele a tshineta tinyimba hinkwato ta Israele, kutani nyimba ya Benjamini yi kombisiwa;

²¹kutani a tshineta nyimba ya Benjamini hi tindlu, kutani yindlu ya Matri yi kombisiwa; kutani Sawulo, n'wana Kixi a kombisiwa. Kutani va n'wi lava, kambe a nga kumiwanga.

²²Va engeta va vutisisa Yehovha, va ku: “Xana a ku tanga munhu un'wana?” Yehovha a ku: “Maswivo, u tumberile etinhundzwini.”

²³Kavaloko va tsutsuma, va ya n'wi teka kona, kutani a yima exikarhi ka vunyingi; kambe a tlula tiko hinkwaro, a te hlwa exikarhi ka vona.

²⁴Samiele a ku eka tiko hinkwaro: “Langutani loyi Yehovha a n'wi hlawuleke! A ku na munhu etikweni hinkwaro la fanaka na yena.” Kutani tiko hinkwaro ri huwelela hi ku tsaka, ri ku: “A ku hanye hosi!”

²⁵Kavaloko Samiele a byela tiko timhaka ta vuhosi, kutani a ti tsala ebukwini, a yi veka emahlweni ka Yehovha. Kutani Samiele a tlherisa tiko hinkwaro ekaya, un'wana ni un'wana endlwini ya yena.

²⁶Na yena Sawulo a ya ekaya ka yena eGibeya, kutani vavanuna lava tshembekaka, lava Xikwembu xi va oloviseke timbilu, va famba na yena;

²⁷kambe vanhu van'wana lavo biha a va ku: “Xana loyi a nga hi ponisa ku yini-ke?” Kutani va n'wi sandza, a va n'wi tiselanga ndzuvu. Kambe Sawulo a nga vulanga nchumu ha swona.