Read Xitsonga 1 Samuel 25 Bible Online

1 Samuel 25 - Xitsonga bible

1 Samuel 25

¹Samiele a fa, kutani Vaisraele hinkwavo va hlengeletana, va n'wi rila, va n'wi lahla eRhama, ekaya ka yena. Kavaloko Davhida a suka, a ngirimela emananga ya Parani.

²EMawoni, a ku ri ni munhu loyi ingi rifuwo ra yena ri le Karmele. Munhu loyi a a fuwile ngopfu; a a ri ni tinyimpfu ta 3 000, ni timbuti ta 1 000, kutani a a yile eKarmele ku tsemela voya bya tinyimpfu ta yena.

³Vito ra munhu loyi a a ri Nabala, kambe vito ra nsati wa yena a a ri Abigayele. Nsati loyi, a a ri ni ku twisisa, a a sasekile, kambe nuna wa yena a a ri munhu wo nonon'hwa wa tihanyi. A a ri wa yindlu ya ka Kalebe.

⁴Loko a ri emananga, Davhida a twa leswaku Nabala a a tsemela voya bya tinyimpfu ta yena.

⁵Kutani Davhida a rhuma majaha ya khume, a ku eka majaha lawa: “Tlhandlukelani eKarmele, mi ya eka Nabala, mi n'wi rungula hi vito ra mina.

⁶Mi ta ku eka yena: ‘Hanya swinene, ku rhula a ku ve na wena, ni yindlu ya wena, ni hinkwaswo leswi nga swa wena.

⁷Sweswi, ndzi twile leswaku u ni vatsemeri. Sweswi, varisi va wena a va ri na hina, a hi va karhatanga, kutani a va pfumalangi nchumu enkarhini hinkwawo lowu ngi va ri eKarmele.

⁸Vutisa malandza ya wena, ma ta ku byela. Majaha lawa, a makume tintswalo emahlweni ka wena, leswi hi fikeke hi siku ro tsaka. Wa nga nyika malandza va wena ni n'wana wa wena Davhida leswi u nga ta swi kuma evokweni ra wena.’ ”

⁹Majaha ya Davhida ma fika, kutani ma byela Nabala hi vito ra Davhida marito lawa hinkwawo, kutani ma tshama ma miyela.

¹⁰Nabala a hlamula, a ku eka malandza ya Davhida: “Davhida i mani xana, ni n'wana Yese i mani? Emasikwini lawa, malandza ma tele lama balekelaka tihosi ta wona.

¹¹Xana ndzi ta teka vuswa bya mina, ni mati ya mina, ni nyama ya mina, swi ri leswi ndzi swi lunghiseleke vatsemeri va mina, ndzi nyika vanhu lava ndzi nga va tiviki laha va humaka kona?”

¹²Malandza ya Davhida ma tlhela ma ya byela Davhida timhaka hinkwato leti.

¹³Kutani Davhida a ku eka vanhu va yena: “Un'wana ni un'wana a a tibohe banga ra yena!” Kutani hinkwavo va hloma, na yena Davhida a hloma. Kutani vanhu lava lavaka ku va 400 va tlhandluka na yena; kambe vanhu va 200 va salela tinhundzu.

¹⁴Kambe un'wanyana wa malandza ya Nabala a ya byela Abigayele, nsati wa Nabala, a ku: “Waswivo, Davhida u rhumile tintsumi, ti suka emananga ku ta rungula hosi ya hina, kambe u va karihele.

¹⁵Hambiswiritano vanhu lava, va hi endlele hi vunene, a va hi karhatanga, kambe a hi kiyelanga nchumu enkarhini hinkwawo lowu hi nga famba na vona, loko ha ha ri enhoveni.

¹⁶A va ri rihlampfu ra hina vusiku ni nhlekanhi, enkarhini hinkwawo lowu ngi hi ri na vona loko hi risa swifuwo.

¹⁷Sweswi, anakanya, u vona leswi u nga ta swi endla, hikuva khombo ri kaneriwile ehenhla ka hosi ya hina, ni yindlu ya yena hinkwayo; kambe leswi a nga munhu wa tihanyi ngopfu, hi tsandzeka ku vulavula na yena.”

¹⁸Kavaloko Abigayele a hatlisa a teka madzana mambirhi ya swinkwa, ni tinghotsa timbirhi ta vhinyo, ni tinyimpfu ta ntlhanu leti swekiweke, ni swirhundzu swa ntlhanu swa mavele lama oxiweke, ni dzana ra mabuwu ya mihandzu ya vhinya leyi omeke, ni madzana mambirhi ya mabuwu ya makuwa, a swi bohela timbhongolweni.

¹⁹Kutani a ku eka malandza ya yena: “Ndzi rhangeleni ndzi ta mi landza.” Kambe a nga n'wi byelanga nchumu Nabala, nuna wa yena.

²⁰Kutani, kuteloko a ngirimela entshaveni, a khandziyile mbhongolo, a famba laha ku tlhumeke, waswivo, Davhida ni vanhu va yena a va ngirimela emahlweni ka yena, kutani a hlangana na vona.

²¹Kambe Davhida a ku: “Kunene ndzi hlayisile ntsena hinkwaswo leswi munhu loyi a swi fuweke emananga, ku nga kayivelanga nchumu eka leswi a swi fuweke; kutani a ndzi tlherisela ku saseka hi ku biha!

²²Xikwembu a xi endle hi matimba ni ku engetelela, eka valala va Davhida, loko eka hinkwaswo swa yena ndzi siya munhu un'we a ha hanya loko dyambu ri huma!”

²³Kuteloko Abigayele a vona Davhida, a hatlisa a xika mbhongolweni, a wela ehansi emombyeni, emahlweni ka Davhida, a khinsama.

²⁴Kutani a tiwisa emilengeni ya yena, a ku: “Nandzu wu na mina, hosi yanga. Wa nga pfumelela nandza wa wena ku vulavula na wena; u yingisa marito ya nandza wa wena.

²⁵Hosi yanga yi nga tshuki yi anakanya munhu loyi wa tihanyi, a nga Nabala, hikuva hi rona vito ra yena, kunene Nabala i vito ra yena, ku ni vuhunguki eka yena. Loko ndzi ri mina, nandza wa wena, a ndzi vonanga majaha lawa u ma rhumeke.

²⁶Kutani sweswi, hosi yanga, Yehovha wa hanya, ni moya wa wena wa hanya, Yehovha u ku sivele ku halata ngati ni ku tirihisela hi voko ra wena. Sweswi, valala va wena, ni lava lavelaka hosi yanga swo biha, a va kotise Nabala!

²⁷Sweswi, nhlengo lowu nandza wa wena a wu tiselaka hosi yanga, u nga wu nyika majaha lama landzaka hosi yanga.

²⁸Wa nga rivalela nandza wa wena nandzu, hikuva Yehovha u ta tiyisa kunene yindlu ya hosi yanga, hikuva hosi yanga yi lwa tinyimpi ta Yehovha, kutani ku biha ku nga ka ku nga kumiwi eka wena hi masiku hinkwawo ya wena.

²⁹Loko munhu a pfuka ku ku landzela ni ku lava vutomi bya wena, vutomi bya hosi yanga byi ta hlayiseka eka Yehovha, Xikwembu xa wena, enyandzeni ya vahanyi; loko byi ri vutomi bya valala va wena, u ta byi cukumeta ekule hi xipelupelu.

³⁰Kutakuloko Yehovha a endlele hosi yanga hinkwaswo leswinene leswi a ku hlayeleke swona, ni loko a ku vekile hosi ya Israele,

³¹a yi nga vi mhaka ya ku khomisa tingana kumbe ya ku khunguvanyisa hosi yanga loko ngi yi halatile ngati ntsena, ni loko hosi yanga yi tirihisele yi ri yona. Kambe kutakuloko Yehovha a katekisile hosi yanga, u ta tsundzuka nandza wa wena.”

³²Davhida a ku eka Abigayele: “A ku katekisiwe Yehovha, Xikwembu xa Israele, loyi a ku rhumeke namuntlha ku ta hlangana na mina.

³³Kambe a ku katekisiwe ku twisisa ka wena, a ku katekisiwe na wena loyi u ndzi siveleke namuntlha ku halata ngati ni ku tirihisela hi voko ra mina!

³⁴Loko a swi nga ri sweswo, Yehovha, Xikwembu xa Israele, la ndzi siveleke ku ku endla leswo biha, wa hanya, loko u nga hatlisangi ku ta hlangana na mina, a ku nga ti sala nchumu eka Nabala, hambi a ri munhu un'we, dyambu ri nga si huma.”

³⁵Kutani Davhida a amukela evokweni ra yena leswi a n'wi tiseleke. Kutani a ku eka yena: “Tlhela hi ku tsaka endlwini ya wena; languta, ndzi yingisile rito ra wena, ndzi ku tsetselerile.”

³⁶Abigayele a fika eka Nabala, kutani waswivo, a a endla endlwini ya yena xifihlulo kukota xifihlulo xa hosi; kutani mbilu ya Nabala yi tsakile; a pyopyiwile ngopfu; kambe a nga n'wi byelanga nchumu, hambi lexitsongo, hambi lexikulu ri ko ri xa.

³⁷Ni mixo, loko Nabala a xalamukile, nsati wa yena a n'wi vikela timhaka teto, kutani mbilu ya yena yi fa endzeni ka yena, yi fana ni ribye.

³⁸Kuteloko ku hundzile masiku lama lavaka ku va khume. Yehovha a ba Nabala, kutani a fa.

³⁹Davhida a twa leswaku Nabala u file, kutani a ku: “A ku katekisiwe Yehovha la kaneleke mhaka ya mina exisandzwini lexi Nabala a ndzi sandzeke ha xona, kutani a sivele nandza wa yena ku dyoha, Yehovha u tlherisile ku biha ka Nabala enhlokweni ya yena.” Kavaloko Davhida a rhuma vanhu eka Abigayele ku n'wi vutela yena.

⁴⁰Malandza ya Davhida, kuteloko ma fikile eka Abigayele eKarmele, ma n'wi byela, ma ku: “Davhida u hi rhumele eka wena ku ku teka leswaku u va nsati wa yena.”

⁴¹Kutani a pfuka, a khinsama, a ku: “Waswivo, nandza wa wena u ta va khumbi leri nga ta hlantswa milenge ya malandza ya hosi yanga.”

⁴²Kutani Abigayele a hatlisa a pfuka, a khandziya mbhongolo, a landziwa hi vanhwanyana va ntlhanu. A landza tintsumi ta Davhida, kutani a va nsati wa yena.

⁴³Davhida a a tekile na Ahinowama wa Yizriele, kutani havambirhi va ri vasati va yena.

⁴⁴Kambe Sawulo a a nyikile Palati, n'wana Layixi, wa Galimi, n'wana wa yena, Mikala, nsati wa Davhida.