Read YORUBA BIBLE CROWTHER VERSION – Bibeli Mimọ Jobu 30 Bible Online

Jobu 30 - YORUBA BIBLE CROWTHER VERSION – Bibeli Mimọ bible

Jobu 30

¹ṢUGBỌN nisisiyi awọn ti mo gbà li aburo nfi mi ṣẹ̀sin, baba ẹniti emi kẹgàn lati tò pẹlu awọn ajá agbo-ẹran mi.

²Pẹlupẹlu agbara ọwọ wọn kini o le igbè fun mi, awọn ẹniti kikún ọjọ wọn kò si.

³Nitori aini ati ìyan nwọn di ẹni itakete, nwọn si girijẹ ohun jijẹ iju, ti o wà ni isọdahoro ati òfo lati lailai.

⁴Awọn ẹniti njá ewe-iyọ li ẹ̀ba igbẹ, gbongbo igikigi li ohun jijẹ wọn.

⁵A le wọn jade kuro lãrin enia, nwọn si ho le wọn bi ẹnipe si olè.

⁶Lati gbé inu pàlapala okuta afonifoji, ninu iho ilẹ ati ti okuta.

⁷Ninu igbẹ ni nwọn ndún, nwọn ko ara wọn jọ pọ̀ labẹ ẹgun neteli.

⁸Awọn ọmọ ẹniti oye kò ye, ani ọmọ awọn enia lasan, a si le wọn kuro ninu ilẹ.

⁹Njẹ nisisiyi emi di ẹni-orin fun wọn, ani emi di ẹni-asọrọsi fun wọn.

¹⁰Nwọn korira mi, nwọn sa kuro jina si mi, nwọn kò si dá si lati tutọ́ si mi loju.

¹¹Nitoriti Ọlọrun ti tu okun-ìye mi, o si pọn mi loju; awọn pẹlu si dẹ̀ ijanu niwaju mi.

¹²Awọn enia lasan dide li apa ọ̀tun mi, nwọn tì mi li ẹsẹ kuro, nwọn si là ipa-ọ̀na iparun silẹ dè mi.

¹³Nwọn dà ipa-ọ̀na mi rú, nwọn ran jàmba mi lọwọ, awọn ti kò li oluranlọwọ;

¹⁴Nwọn de si mi bi yiya omi gburu, ni ariwo nla ni nwọn ko ara wọn kátì si mi.

¹⁵Ẹ̀ru nla yipada bà mi, nwọn lepa ọkàn mi bi ẹfùfù, alafia mi si kọja lọ bi awọsanma.

¹⁶Ati nisisiyi ọkàn mi si dà jade si mi, ọjọ ipọnju dì mi mu.

¹⁷Oru gùn mi ninu egungun mi, eyiti o bù mi jẹ kò si simi.

¹⁸Nipa agbara nla aṣọ mi di pipada, o si lẹmọ́ mi li ara yika bi ọrùn aṣọ ileke mi.

¹⁹O ti mu mi lọ sinu ẹrẹ̀, emi si dabi ekuru ati ẽru,

²⁰Emi kepè ọ, iwọ kò si gbọ́ ti emi, emi dide duro, iwọ si fi oju lile wò mi.

²¹Iwọ pada di ẹni-ìka si mi, ọwọ agbara rẹ ni iwọ fi de ara rẹ li ọ̀na si mi.

²²Iwọ gbe mi soke si ẹ̀fufu, iwọ mu mi fò lọ, bẹ̃ni iwọ si sọ mi di asan patapata.

²³Emi sa mọ̀ pe iwọ o mu mi lọ sinu ikú, ati si ile-apejọ fun gbogbo alãye.

²⁴Bi o ti wu ki o ṣe, ẹnikan kì yio ha nawọ rẹ̀ ni igba iṣubu rẹ̀, tabi kì yio ké ninu iparun rẹ̀.

²⁵Emi kò ha sọkun bi fun ẹniti o wà ninu iṣẹ, ọkàn mi kò ha bajẹ fun talaka bi?

²⁶Nigbati mo fojusọna fun alafia, ibi si de, nigbati emi duro de imọlẹ, òkunkun si de.

²⁷Ikùn mi nru, kò si simi, ọjọ ipọnju ti bá mi.

²⁸Emi nṣọ̀fọ lọ rinkiri laisi õrùn, emi dide duro ni awujọ, mo si kigbe.

²⁹Emi jasi arakunrin ajáko, emi di ẹgbẹ́ awọn abo-ogongo.

³⁰Àwọ mi di dudu li ara mi, egungun mi si jórun fun õru.

³¹Dùru mi pẹlu si di ti ọ̀fọ, ati ohun-ọnà orin mi si di ohùn awọn ti nsọkún.