Read YORUBA BIBLE CROWTHER VERSION – Bibeli Mimọ Jobu 38 Bible Online

Jobu 38 - YORUBA BIBLE CROWTHER VERSION – Bibeli Mimọ bible

Jobu 38

¹NIGBANA ni OLUWA da Jobu lohùn lati inu ìji ajayika wá o si wipe,

²Tani eyi ti nfi ọ̀rọ aini igbiro ṣú ìmọ li òkunkun.

³Di ẹgbẹ ara rẹ li amure bi ọkunrin nisisiyi, nitoripe emi o bère lọwọ rẹ ki o si da mi lohùn.

⁴Nibo ni iwọ wà nigbati mo fi ipilẹ aiye sọlẹ? wi bi iwọ ba moye!

⁵Tali o fi ìwọn rẹ̀ lelẹ, bi iwọ ba mọ̀, tabi tani o ta okun wiwọn sori rẹ̀.

⁶Lori ibo ni a gbe kan ipilẹ rẹ̀ mọ́, tabi tali o fi okuta igun rẹ̀ le ilẹ?

⁷Nigbati awọn irawọ owurọ jumọ kọrin pọ̀, ti gbogbo awọn ọmọ Ọlọrun nhó iho ayọ̀?

⁸Tabi tali o fi ilẹkun sé omi okun mọ́, nigbati o ya jade bi ẹnipe o ti inu tu jade wá?

⁹Nigbati mo fi awọsanma ṣe aṣọ rẹ̀, ati òkunkun ṣiṣu ṣe ọ̀ja igbanu rẹ̀?

¹⁰Ti mo ti paṣẹ ipinnu mi fun u, ti mo si ṣe bèbe ati ilẹkun.

¹¹Ti mo si wipe, Nihinyi ni iwọ o dé, ki o má si rekọja, nihinyi si ni igberaga riru omi rẹ yio gbe duro mọ.

¹²Iwọ paṣẹ fun owurọ lati igba ọjọ rẹ̀ wá, iwọ si mu ila-õrun mọ̀ ipo rẹ̀?

¹³Ki o le idi opin ilẹ aiye mu, ki a le gbọ̀n awọn enia buburu kuro ninu rẹ̀.

¹⁴Ki o yipada bi amọ fun edidi amọ, ki gbogbo rẹ̀ ki o si fi ara rẹ̀ hàn bi ẹnipe ninu aṣọ igunwa.

¹⁵A si fa imọlẹ wọn sẹhin kuro lọdọ enia buburu, apa giga li o si ṣẹ́.

¹⁶Iwọ ha wọ inu isun okun lọ ri bi? iwọ si rin lori isalẹ ibú nla?

¹⁷A ha ṣilẹkun ikú silẹ fun ọ ri bi, iwọ si ri ilẹkun ojiji ikú?

¹⁸Iwọ̀ moye ibú aiye bi? sọ bi iwọ ba mọ̀ gbogbo rẹ̀?

¹⁹Ọ̀na wo ni imọlẹ igbé, bi o ṣe ti òkunkun, nibo ni ipò rẹ̀?

²⁰Ti iwọ o fi mu u lọ si ibi àla rẹ̀, ti iwọ o si le imọ̀ ipa-ọ̀na lọ sinu ile rẹ̀?

²¹Iwọ mọ̀ eyi, nitoriti ni igbana ni a bi ọ? ati iye ọjọ rẹ si pọ!

²²Iwọ ha wọ inu iṣura ojò-dídì lọ ri bí, iwọ si ri ile iṣura yinyin ri?

²³Ti mo ti fi pamọ de igba iyọnu, de ọjọ ogun ati ijà.

²⁴Ọ̀na wo ni imọlẹ fi nyà, ti afẹfẹ ila-orun tàn kakiri lori ilẹ aiye?

²⁵Tali o la ipado fun ẹkún iṣan omi, ati ọ̀na fun manamana ãrá?

²⁶Lati mu u rọ̀jo sori aiye, nibiti enia kò si, ni aginju nibiti enia kò si.

²⁷Lati mu ilẹ tutù, ijù ati alairo, ati lati mu irudi ọmudún eweko ru jade?

²⁸Ojo ha ni baba bi, tabi tali o bi ikán ìsẹ-iri?

²⁹Lati inu tani ìdi omi ti jade wá, ati ìri didi ọrun tali o bi i?

³⁰Omi bò o mọlẹ bi ẹnipe labẹ okuta, oju ibú nla si dìlupọ̀.

³¹Iwọ le ifi ọja de awọn irawọ meje [Pleyade] tabi iwọ le itudi irawọ Orionu?

³²Iwọ le imu awọn ami mejejila irawọ [Masaroti] jade wá ni igba akoko wọn? tabi iwọ le iṣe àmọna Arketuru pẹlu awọn ọmọ rẹ̀?

³³Iwọ mọ̀ ilana-ilana ọrun, iwọ le ifi ijọba rẹ̀ lelẹ li aiye?

³⁴Iwọ le igbé ohùn rẹ soke de awọsanma, ki ọ̀pọlọpọ omi ki o le bò ọ?

³⁵Iwọ le iran mànamána ki nwọn ki o le ilọ, ki nwọn ki o si wi fun ọ pe, Awa nĩ!

³⁶Tali o fi ọgbọ́n si odo-inu, tabi tali o fi oye sinu aiya?

³⁷Tali o fi ọgbọ́n ka iye awọsanma, tali o si mu igo ọrun dàjade.

³⁸Nigbati erupẹ di lile, ati ogulutu dipọ̀?

³⁹Iwọ o ha dẹ ọdẹ fun abo kiniun bi, iwọ o si tẹ́ ebi ẹgbọrọ kiniun lọrun?

⁴⁰Nigbati nwọn ba mọlẹ ninu iho wọn, ti nwọn si ba ni ibuba de ohun ọdẹ.

⁴¹Tani npese ohun jijẹ fun ìwo? nigbati awọn ọmọ rẹ̀ nkepe Ọlọrun, nwọn a ma fò kiri nitori aili ohun jijẹ.