Read YORUBA BIBLE CROWTHER VERSION – Bibeli Mimọ Jobu 40 Bible Online

Jobu 40 - YORUBA BIBLE CROWTHER VERSION – Bibeli Mimọ bible

Jobu 40

¹OLUWA da Jobu lohùn si i pẹlu, o si wipe,

²Ẹniti mba Olodumare jà, yio ha kọ́ ọ li ẹkọ́? ẹniti mba Ọlọrun wi, jẹ ki o dahùn!

³Nigbana ni Jobu da Oluwa lohùn, o si wipe:

⁴Kiyesi i, ẹgbin li emi; ohùn kili emi o da? emi o fi ọwọ mi le ẹnu mi.

⁵Ẹ̃kan ni mo sọ̀rọ̀, ṣugbọn emi kì yio si tun sọ mọ, lẹ̃meji ni, emi kò si le iṣe e mọ́.

⁶Nigbana ni OLUWA da Jobu lohùn lati inu ìji ajayika wá o si wipe:

⁷Di àmure giri li ẹgbẹ rẹ bi ọkunrin, emi o bi ọ lere, ki iwọ ki o si kọ́ mi li ẹkọ́.

⁸Iwọ ha fẹ imu idajọ mi di asan? iwọ o si da mi lẹbi, ki iwọ ki o le iṣe olododo?

⁹Iwọ ni apá bi Ọlọrun, tabi iwọ le ifi ohùn san ãrá bi on?

¹⁰Fi ọlanla ati ọla-itayọ ṣe ara rẹ li ọṣọ, ki o si fi ogo ati ẹwa ọṣọ bò ara rẹ li aṣọ.

¹¹Mu irunu ibinu rẹ jade, kiyesi gbogbo ìwa igberaga, ki o si rẹ̀ ẹ silẹ.

¹²Wò gbogbo ìwa igberaga, ki o si rẹ̀ ẹ silẹ, ki o si tẹ enia buburu mọlẹ ni ipo wọn.

¹³Fi wọn sin pọ̀ ninu erupẹ, ki o si di oju wọn ni ikọkọ.

¹⁴Nigbana li emi o yìn ọ pe, ọwọ ọ̀tun ara rẹ le igba ọ la.

¹⁵Njẹ nisisiyi kiyesi Behemotu ti mo da pẹlu rẹ, on a ma jẹ koriko bi ọ̀da-malu.

¹⁶Wò o nisisiyi, agbara rẹ̀ wà li ẹgbẹ́ rẹ̀, ati ipa rẹ̀ ninu iṣan ikún rẹ̀.

¹⁷On a ma jù ìru rẹ̀ bi igi kedari, iṣan itan rẹ̀ dijọ pọ̀.

¹⁸Egungun rẹ̀ ni ogusọ idẹ, egungun rẹ̀ dabi ọpa irin.

¹⁹On ni olu nipa ọ̀na Ọlọrun; ẹniti o da a o fi idà rẹ̀ le e lọwọ.

²⁰Nitõtọ oke nlanla ni imu ohun jijẹ fun u wá, nibiti gbogbo ẹranko igbẹ ima ṣire.

²¹O dubulẹ labẹ igi Lotosi, ninu ifefe bibò ati ẹrẹ.

²²Igi Lotosi ṣiji wọn bò o, igi arọrọ odò yi i kakiri.

²³Kiyesi i, odò nla ṣan jọjọ, on kò salọ, o wà lailewu bi o ba ṣe odò Jordani ti ṣan lọ si ẹnu rẹ̀.

²⁴Ẹnikan ha le imu u li oju rẹ̀ tabi a ma fi ọkọ gun imú rẹ̀?