Read YORUBA BIBLE CROWTHER VERSION – Bibeli Mimọ Jobu 7 Bible Online

Jobu 7 - YORUBA BIBLE CROWTHER VERSION – Bibeli Mimọ bible

Jobu 7

¹NJẸ ija kan kò ha si fun enia lori ilẹ, ọjọ rẹ̀ pẹlu kò dabi ọjọ alagbaṣe?

²Bi ọmọ-ọdọ ti ima kanju bojuwo ojiji, ati bi alagbaṣe ti ima kanju wọ̀na owo iṣẹ rẹ̀.

³Bẹ̃li a mu mi ni oṣoṣu asan, oru idanilagãra ni a si là silẹ fun mi.

⁴Nigbati mo dubulẹ̀, emi wipe, nigbawo ni emi o dide, ti oru yio si kọja? o si tó fun mi lati yi sihin yi sọhun titi yio fi di afẹmọ́jumọ.

⁵Kòkoro ati ogulùtu erupẹ li a fi wọ̀ mi li aṣọ, àwọ mi bù, o si di sisun ni.

⁶Ọjọ mi yara jù ọkọ̀ iwunṣọ lọ, o si di lilò li ainireti.

⁷A! ranti pe afẹfẹ li ẹmi mi; oju mi kì yio pada ri rere mọ.

⁸Oju ẹniti o ri mi, kì yio ri mi mọ; oju rẹ tẹ mọra mi, emi kò sí mọ́!

⁹Bi awọ-sanma ti iparun, ti isi fò lọ, bẹ̃li ẹniti nlọ si ipò-okú, ti kì yio pada wá mọ.

¹⁰Kì yio pada sinu ile rẹ̀ mọ, bẹ̃ni ipò rẹ̀ kì yio mọ̀ ọ mọ.

¹¹Nitorina emi kì yio pa ẹnu mi mọ, emi o ma sọ ninu irora ọkàn mi, emi o ma ṣe irahùn ninu kikoro ọkàn mi.

¹²Emi ama iṣe ejo okun tabi erinmi, ti iwọ fi yàn oluṣọ tì mi?

¹³Nigbati mo wipe, ibusùn mi yio tù mi lara, itẹ mi yio gbé ẹrù irahùn mi pẹlu.

¹⁴Nigbana ni iwọ fi alá da mi niji, iwọ si fi iran oru dẹrubà mi.

¹⁵Bẹ̃li ọkàn mi yan isà okú jù aye, ikú jù egungun mi lọ.

¹⁶O su mi, emi kò le wà titi: jọwọ mi jẹ, nitoripe asan li ọjọ mi.

¹⁷Kili enia ti iwọ o ma kokìki rẹ̀? ati ti iwọ iba fi gbe ọkàn rẹ le e?

¹⁸Ati ti iwọ o fi ma wa ibẹ̀ ẹ wò li orowurọ̀, ti iwọ o si ma dán a wò nigbakũgba!

¹⁹Yio ti pẹ́ to ki iwọ ki o to fi mi silẹ̀ lọ, ti iwọ o fi jọ mi jẹ titi emi o fi le dá itọ mi mì.

²⁰Emi ti ṣẹ̀, kili emi o ṣe si ọ, iwọ Olùtọju enia? ẽṣe ti iwọ fi fi mi ṣe àmi itasi niwaju rẹ, bẹ̃li emi si di ẹrù-wuwo si ara rẹ?

²¹Ẽṣe ti iwọ kò si dari irekọja mi jì, ki iwọ ki o si mu aiṣedede mi kuro? njẹ nisisiyi li emi iba sùn ninu erupẹ, iwọ iba si wá mi kiri li owurọ̀, emi ki ba ti si.