Read YORUBA BIBLE CROWTHER VERSION – Bibeli Mimọ Orin Dafidi 119 Bible Online

Orin Dafidi 119 - YORUBA BIBLE CROWTHER VERSION – Bibeli Mimọ bible

Orin Dafidi 119

¹IBUKÚN ni fun awọn ẹniti o pé li ọ̀na na, ti nrìn ninu ofin Oluwa.

²Ibukún ni fun awọn ti npa ẹri rẹ̀ mọ́, ti si nwá a kiri tinu-tinu gbogbo.

³Nwọn kò dẹṣẹ pẹlu: nwọn nrìn li ọ̀na rẹ̀.

⁴Iwọ ti paṣẹ fun wa lati pa ẹkọ́ rẹ mọ́ gidigidi.

⁵Ọ̀na mi iba jẹ là silẹ lati ma pa ilana rẹ mọ́!

⁶Nigbana li oju kì yio tì mi, nigbati emi ba njuba aṣẹ rẹ gbogbo.

⁷Emi o ma fi aiya diduro-ṣinṣin yìn ọ, nigbati emi ba ti kọ́ idajọ ododo rẹ.

⁸Emi o pa ilana rẹ mọ́: máṣe kọ̀ mi silẹ patapata.

⁹Nipa ewo li ọdọmọkunrin yio fi mu ọ̀na rẹ̀ mọ́? nipa ikiyesi gẹgẹ bi ọ̀rọ rẹ.

¹⁰Tinu-tinu mi gbogbo li emi fi ṣe afẹri rẹ: máṣe jẹ ki emi ṣina kuro ninu aṣẹ rẹ.

¹¹Ọ̀rọ rẹ ni mo pamọ́ li aiya mi, ki emi ki o má ba ṣẹ̀ si ọ.

¹²Olubukún ni iwọ, Oluwa: kọ́ mi ni ilana rẹ.

¹³Ẹnu mi li emi fi nsọ gbogbo idajọ ẹnu rẹ.

¹⁴Emi ti nyọ̀ li ọ̀na ẹri rẹ, bi lori oniruru ọrọ̀.

¹⁵Emi o ma ṣe àṣaro ninu ẹkọ́ rẹ emi o si ma juba ọ̀na rẹ.

¹⁶Emi o ma ṣe inu-didùn ninu ilana rẹ: emi kì yio gbagbe ọ̀rọ rẹ.

¹⁷Fi ọ̀pọlọpọ ba iranṣẹ rẹ ṣe, ki emi ki o le wà lãye, ki emi ki o le ma pa ọ̀rọ rẹ mọ́.

¹⁸Là mi li oju, ki emi ki o le ma wò ohun iyanu wọnni lati inu ofin rẹ.

¹⁹Alejo li emi li aiye: máṣe pa àṣẹ rẹ mọ́ fun mi.

²⁰Aiya mi bù nitori ifojusọna si idajọ rẹ nigbagbogbo.

²¹Iwọ ti ba awọn agberaga wi, ti a ti fi gégun, ti o ti ṣina kuro nipa aṣẹ rẹ.

²²Mu ẹ̀gan ati àbuku kuro lara mi; nitoriti emi ti pa ẹri rẹ mọ́.

²³Awọn ọmọ-alade joko pẹlu, nwọn nsọ̀rọ mi: ṣugbọn iranṣẹ rẹ nṣe àṣaro ninu ilana rẹ:

²⁴Ẹri rẹ pẹlu ni didùn-inu mi ati ìgbimọ mi.

²⁵Ọkàn mi lẹ̀ mọ́ erupẹ: iwọ sọ mi di ãye gẹgẹ bi ọ̀rọ rẹ.

²⁶Emi ti rohin ọ̀na mi, iwọ si gbohùn mi: mã kọ́ mi ni ilana rẹ.

²⁷Mu oye ọ̀na ẹkọ́ rẹ ye mi: bẹ̃li emi o ma ṣe aṣaro iṣẹ iyanu rẹ.

²⁸Ọkàn mi nrọ fun ãrẹ̀: iwọ mu mi lara le gẹgẹ bi ọ̀rọ rẹ.

²⁹Mu ọ̀na eke kuro lọdọ mi: ki o si fi ore-ọfẹ fi ofin rẹ fun mi.

³⁰Emi ti yàn ọ̀na otitọ: idajọ rẹ ni mo fi lelẹ niwaju mi.

³¹Emi ti faramọ ẹri rẹ: Oluwa, máṣe dojutì mi.

³²Emi o ma sare li ọ̀na aṣẹ rẹ, nitori iwọ bùn aiya mi laye.

³³Oluwa, kọ́ mi li ọ̀na rẹ; emi o si ma pa a mọ́ de opin.

³⁴Fun mi li oye, emi o si pa ofin rẹ mọ́; nitõtọ, emi o ma kiyesi i tinutinu mi gbogbo.

³⁵Mu mi rìn ni ipa aṣẹ rẹ; nitori ninu rẹ̀ ni didùn inu mi.

³⁶Fa aiya mi si ẹri rẹ, ki o má si ṣe si oju-kòkoro.

³⁷Yi oju mi pada kuro lati ma wò ohun asan; mu mi yè li ọna rẹ.

³⁸Fi ọ̀rọ rẹ mulẹ si iranṣẹ rẹ, ti iṣe ti ìbẹru rẹ̀.

³⁹Yi ẹ̀gan mi pada ti mo bẹ̀ru: nitori ti idajọ rẹ dara.

⁴⁰Kiyesi i, ọkàn mi ti fà si ẹkọ́ rẹ: sọ mi di ãye ninu ododo rẹ.

⁴¹Jẹ ki ãnu rẹ ki o tọ̀ mi wá pẹlu, Oluwa, ani igbala rẹ gẹgẹ bi ọ̀rọ rẹ.

⁴²Bẹ̃li emi o ni ọ̀rọ ti emi o fi da ẹni ti ngàn mi lohùn; nitori mo gbẹkẹle ọ̀rọ rẹ.

⁴³Lõtọ máṣe gbà ọ̀rọ otitọ kuro li ẹnu mi rara; nitori ti mo ti nṣe ireti ni idajọ rẹ.

⁴⁴Bẹ̃li emi o ma pa ofin rẹ mọ́ patapata titi lai ati lailai.

⁴⁵Bẹ̃li emi o ma rìn ni alafia; nitori ti mo wá ẹkọ́ rẹ.

⁴⁶Emi o si ma sọ̀rọ ẹri rẹ niwaju awọn ọba, emi kì yio si tiju.

⁴⁷Emi o si ma ṣe inu-didùn ninu aṣẹ rẹ, ti emi ti fẹ.

⁴⁸Ọwọ mi pẹlu li emi o gbe soke si aṣẹ rẹ, ti emi ti fẹ; emi o si ma ṣe Ìṣàrò-ìlànà rẹ.

⁴⁹Ranti ọ̀rọ nì si ọmọ-ọdọ rẹ, ninu eyiti iwọ ti mu mi ṣe ireti.

⁵⁰Eyi ni itunu mi ninu ipọnju mi: nitori ọ̀rọ rẹ li o sọ mi di ãye.

⁵¹Awọn agberaga ti nyọ-ṣuti si mi gidigidi: sibẹ emi kò fa sẹhin kuro ninu ofin rẹ.

⁵²Oluwa, emi ranti idajọ atijọ; emi si tu ara mi ninu.

⁵³Mo ni ibinujẹ nla nitori awọn enia buburu ti o kọ̀ ofin rẹ silẹ.

⁵⁴Ilana rẹ li o ti nṣe orin mi ni ile atipo mi.

⁵⁵Emi ti ranti orukọ rẹ Oluwa, li oru, emi si ti pa ofin rẹ mọ́.

⁵⁶Eyi ni mo ni nitori ti mo pa ẹkọ rẹ mọ́.

⁵⁷Oluwa, iwọ ni ipin mi: emi ti wipe, emi o pa ọ̀rọ rẹ mọ́.

⁵⁸Emi ti mbẹ̀bẹ oju-rere rẹ tinutinu mi gbogbo: ṣãnu fun mi gẹgẹ bi ọ̀rọ rẹ.

⁵⁹Emi rò ọ̀na mi, mo si yi ẹsẹ mi pada si ẹri rẹ.

⁶⁰Emi yara, emi kò si lọra lati pa ofin rẹ mọ́.

⁶¹Okùn awọn enia buburu ti yi mi ka: ṣugbọn emi kò gbagbe ofin rẹ.

⁶²Lãrin ọganjọ emi o dide lati dupẹ fun ọ nitori ododo idajọ rẹ.

⁶³Ẹgbẹ gbogbo awọn ti o bẹ̀ru rẹ li emi, ati ti awọn ti npa ẹkọ́ rẹ mọ́.

⁶⁴Oluwa, aiye kún fun ãnu rẹ: kọ́ mi ni ilana rẹ.

⁶⁵Iwọ ti nṣe rere fun iranṣẹ rẹ Oluwa, gẹgẹ bi ọ̀rọ rẹ.

⁶⁶Kọ́ mi ni ìwa ati ìmọ̀ rere; nitori ti mo gbà aṣẹ rẹ gbọ́.

⁶⁷Ki a to pọ́n mi loju emi ti ṣina: ṣugbọn nisisiyi emi ti pa ọ̀rọ rẹ mọ́.

⁶⁸Iwọ ṣeun iwọ si nṣe rere; kọ́ mi ni ilana rẹ.

⁶⁹Awọn agberaga ti hùmọ eke si mi: ṣugbọn emi o pa ẹkọ́ rẹ mọ́ tinutinu mi gbogbo.

⁷⁰Aiya wọn sebọ bi ọrá; ṣugbọn emi o ṣe inu-didùn ninu ofin rẹ.

⁷¹O dara fun mi ti a pọ́n mi loju; ki emi ki o le kọ́ ilana rẹ.

⁷²Ofin ẹnu rẹ dara fun mi jù ẹgbẹgbẹrun wura ati fadaka lọ.

⁷³Ọwọ rẹ li o ti da mi, ti o si ṣe àworan mi: fun mi li oye, ki emi ki o le kọ́ aṣẹ rẹ.

⁷⁴Inu awọn ti o bẹ̀ru rẹ yio dùn, nigbati nwọn ba ri mi; nitori ti mo ti reti li ọ̀rọ rẹ.

⁷⁵Oluwa, emi mọ̀ pe, ododo ni idajọ rẹ, ati pe li otitọ ni iwọ pọ́n mi loju.

⁷⁶Emi bẹ̀ ọ, jẹ ki iṣeun-ãnu rẹ ki o mã ṣe itunu mi gẹgẹ bi ọ̀rọ rẹ si iranṣẹ rẹ.

⁷⁷Jẹ ki irọnu ãnu rẹ ki o tọ̀ mi wá, ki emi ki o le yè: nitori ofin rẹ ni didùn-inu mi.

⁷⁸Jẹ ki oju ki o tì agberaga; nitori ti nwọn ṣe arekereke si mi li ainidi: ṣugbọn emi o ma ṣe àṣaro ninu ẹkọ́ rẹ.

⁷⁹Jẹ ki awọn ti o bẹ̀ru rẹ ki o yipada si mi, ati awọn ti o ti mọ̀ ẹri rẹ.

⁸⁰Jẹ ki aiya mi ki o pé ni ilana rẹ; ki oju ki o máṣe tì mi.

⁸¹Ọkàn mi ndaku fun igbala rẹ; ṣugbọn emi ni ireti li ọ̀rọ rẹ.

⁸²Oju mi ṣofo nitori ọ̀rọ rẹ, wipe, Nigbawo ni iwọ o tù mi ninu?

⁸³Nitori ti emi dabi igo-awọ loju ẽfin; ṣugbọn emi kò gbagbe ilana rẹ.

⁸⁴Ijọ melo li ọjọ iranṣẹ rẹ? nigbawo ni iwọ o ṣe idajọ lara awọn ti nṣe inunibini si mi?

⁸⁵Awọn agberaga ti wà ìho silẹ dè mi, ti kì iṣe gẹgẹ bi ofin rẹ.

⁸⁶Otitọ li aṣẹ rẹ gbogbo: nwọn fi arekereke ṣe inunibini si mi: iwọ ràn mi lọwọ.

⁸⁷Nwọn fẹrẹ run mi li ori ilẹ; ṣugbọn emi kò kọ ẹkọ́ rẹ silẹ.

⁸⁸Sọ mi di ãye gẹgẹ bi iṣeun-ãnu rẹ; bẹ̃li emi o pa ẹri ẹnu rẹ mọ́.

⁸⁹Oluwa, lai, ọ̀rọ rẹ kalẹ li ọrun.

⁹⁰Lati iran-diran li otitọ rẹ; iwọ ti fi idi aiye mulẹ, o si duro.

⁹¹Nwọn duro di oni nipa idajọ rẹ: nitori pe iranṣẹ rẹ ni gbogbo wọn.

⁹²Bikoṣepe bi ofin rẹ ti ṣe inu-didùn mi, emi iba ti ṣegbe ninu ipọnju mi.

⁹³Lai emi kì yio gbagbe ẹkọ́ rẹ; nitori pe awọn ni iwọ fi sọ mi di ãye.

⁹⁴Tirẹ li emi, gbà mi; nitori ti emi wá ẹkọ́ rẹ.

⁹⁵Awọn enia buburu ti duro dè mi lati pa mi run: ṣugbọn emi o kiyesi ẹri rẹ.

⁹⁶Emi ti ri opin ohun pipé gbogbo: ṣugbọn aṣẹ rẹ gbõro gidigidi.

⁹⁷Emi ti fẹ ofin rẹ to! iṣaro mi ni li ọjọ gbogbo.

⁹⁸Nipa aṣẹ rẹ iwọ mu mi gbọ́n jù awọn ọta mi lọ: nitori ti o wà pẹlu mi lailai.

⁹⁹Emi ni iyè ninu jù gbogbo awọn olukọ mi lọ, nitoripe ẹri rẹ ni iṣaro mi.

¹⁰⁰Oye ye mi jù awọn àgba lọ, nitori ti mo pa ẹkọ́ rẹ mọ́.

¹⁰¹Mo ti fà ẹsẹ mi sẹhin kuro nipa ọ̀na ibi gbogbo, ki emi ki o le pa ọ̀rọ rẹ mọ́.

¹⁰²Emi kò yà kuro ni idajọ rẹ: nitoripe iwọ li o kọ́ mi.

¹⁰³Ọ̀rọ rẹ ti dùn mọ́ mi li ẹnu to! jù oyin lọ li ẹnu mi!

¹⁰⁴Nipa ẹkọ́ rẹ emi ni iyè ninu: nitorina mo korira ọ̀na eke gbogbo.

¹⁰⁵Ọ̀rọ rẹ ni fitila fun ẹsẹ̀ mi, ati imọlẹ si ipa ọ̀na mi.

¹⁰⁶Emi ti bura, emi o si mu u ṣẹ, pe, emi o pa idajọ ododo rẹ mọ́.

¹⁰⁷A pọ́n mi loju gidigidi: Oluwa sọ mi di ãye, gẹgẹ bi ọ̀rọ rẹ.

¹⁰⁸Emi bẹ̀ ọ, Oluwa, gbà ọrẹ atinuwa ẹnu mi, ki o si kọ́ mi ni idajọ rẹ.

¹⁰⁹Ọkàn mi wà li ọwọ mi nigbagbogbo: emi kò si gbagbe ofin rẹ.

¹¹⁰Awọn enia buburu ti dẹkun silẹ fun mi: ṣugbọn emi kò ṣina kuro nipa ẹkọ́ rẹ.

¹¹¹Ẹri rẹ ni ogún mi lailai: nitori awọn li ayọ̀ inu mi.

¹¹²Emi ti fà aiya mi si ati pa ilana rẹ mọ́ nigbagbogbo, ani de opin.

¹¹³Emi korira oniye meji: ṣugbọn ofin rẹ ni mo fẹ.

¹¹⁴Iwọ ni ibi ipamọ́ mi ati asà mi: emi nṣe ireti ninu ọ̀rọ rẹ.

¹¹⁵Kuro lọdọ mi, ẹnyin oluṣe-buburu: emi o si pa ofin Ọlọrun mi mọ́.

¹¹⁶Gbé mi soke gẹgẹ bi ọ̀rọ rẹ, ki emi ki o le yè: ki o má si jẹ ki oju ireti mi ki o tì mi.

¹¹⁷Gbé mi soke, emi o si wà li ailewu: emi o si juba ìlana rẹ nigbagbogbo.

¹¹⁸Iwọ ti tẹ̀ gbogbo awọn ti o ṣina kuro ninu ilana rẹ mọlẹ: nitori pe ẹ̀tan ni ironu wọn.

¹¹⁹Iwọ ṣá gbogbo awọn enia buburu aiye tì bi ìdarọ́: nitorina emi fẹ ẹri rẹ.

¹²⁰Ara mi warìri nitori ìbẹru rẹ; emi si bẹ̀ru idajọ rẹ.

¹²¹Emi ti ṣe idajọ ati ododo: iwọ kì yio jọwọ mi lọwọ fun awọn aninilara mi.

¹²²Ṣe onigbọwọ fun iranṣẹ rẹ fun rere: máṣe jẹ ki awọn agberaga ki o ni mi lara.

¹²³Oju kún mi nitori igbala rẹ, ati nitori ọ̀rọ ododo rẹ.

¹²⁴Ṣe si iranṣẹ rẹ gẹgẹ bi ãnu rẹ, ki o si kọ́ mi ni ilana rẹ.

¹²⁵Iranṣẹ rẹ li emi: fun mi li oye, emi o si mọ̀ ẹri rẹ.

¹²⁶Oluwa, o to akokò fun ọ lati ṣiṣẹ: nitori ti nwọn ti sọ ofin rẹ di ofo.

¹²⁷Nitorina emi fẹ aṣẹ rẹ jù wura, ani, jù wura didara lọ.

¹²⁸Nitorina emi kà gbogbo ẹkọ́ rẹ si otitọ patapata: emi si korira gbogbo ọ̀na eke.

¹²⁹Iyanu li ẹri rẹ: nitorina li ọkàn mi ṣe pa wọn mọ́.

¹³⁰Ifihan ọ̀rọ rẹ funni ni imọlẹ; o si fi oye fun awọn òpe.

¹³¹Emi yà ẹnu mi, emi mí hẹlẹ: nitori ti ọkàn mi fà si aṣẹ rẹ.

¹³²Iwọ bojuwò mi; ki o si ṣãnu fun mi, gẹgẹ bi iṣe rẹ si awọn ti o fẹ orukọ rẹ.

¹³³Fi iṣisẹ mi mulẹ ninu ọ̀rọ rẹ: ki o má si jẹ ki ẹ̀ṣẹkẹṣẹ ki o jọba lori mi.

¹³⁴Gbà mi lọwọ inilara enia; bẹ̃li emi o si ma pa ẹkọ́ rẹ mọ́.

¹³⁵Ṣe oju rẹ ki o mọlẹ si iranṣẹ rẹ lara; ki o si kọ mi ni ilana rẹ.

¹³⁶Odò omi ṣàn silẹ li oju mi nitori nwọn kò pa ofin rẹ mọ́.

¹³⁷Olododo ni iwọ, Oluwa, ati diduro-ṣinṣin ni idajọ rẹ.

¹³⁸Iwọ paṣẹ ẹri rẹ li ododo ati otitọ gidigidi.

¹³⁹Itara mi ti pa mi run nitori ti awọn ọta mi ti gbagbe ọ̀rọ rẹ.

¹⁴⁰Funfun gbò li ọ̀rọ rẹ: nitorina ni iranṣẹ rẹ ṣe fẹ ẹ.

¹⁴¹Emi kere ati ẹni ẹ̀gan ni: ṣugbọn emi kò gbagbe ẹkọ́ rẹ.

¹⁴²Ododo rẹ ododo lailai ni, otitọ si li ofin rẹ.

¹⁴³Iyọnu ati àrokan dì mi mu: ṣugbọn aṣẹ rẹ ni inu-didùn mi.

¹⁴⁴Ododo ẹri rẹ aiye-raiye ni: fun mi li oye, emi o si yè.

¹⁴⁵Tinu-tinu mi gbogbo ni mo fi kigbe; Oluwa, da mi lohùn; emi o pa ilana rẹ mọ́.

¹⁴⁶Emi kigbe si ọ; gbà mi là, emi o si ma pa ẹri rẹ mọ́.

¹⁴⁷Emi ṣaju kutukutu owurọ, emi ke: emi nṣe ireti ninu ọ̀rọ rẹ.

¹⁴⁸Oju mi ṣaju iṣọ-oru, ki emi ki o le ma ṣe iṣaro ninu ọ̀rọ rẹ.

¹⁴⁹Gbohùn mi gẹgẹ bi ãnu rẹ: Oluwa, sọ mi di ãye gẹgẹ bi idajọ rẹ.

¹⁵⁰Awọn ti nlepa ìwa-ika sunmọ itosi: nwọn jina si ofin rẹ.

¹⁵¹Oluwa, iwọ wà ni itosi: otitọ si ni gbogbo aṣẹ rẹ.

¹⁵²Lati inu ẹri rẹ, emi ti mọ̀ nigba atijọ pe, iwọ ti fi idi wọn mulẹ lailai.

¹⁵³Wò ipọnju mi, ki o si gbà mi: nitori ti emi kò gbagbe ofin rẹ.

¹⁵⁴Gbà ẹjọ mi rò, ki o rà mi pada: sọ mi di ãye nipa ọ̀rọ rẹ.

¹⁵⁵Igbala jina si awọn enia buburu: nitori ti nwọn kò wá ilana rẹ.

¹⁵⁶Ọ̀pọ ni irọnu ãnu rẹ, Oluwa: sọ mi di ãye gẹgẹ bi idajọ rẹ.

¹⁵⁷Ọ̀pọ li awọn oninunibini mi ati awọn ọta mi; ṣugbọn emi kò fà sẹhin kuro ninu ẹri rẹ.

¹⁵⁸Emi wò awọn ẹlẹtan, inu mi si bajẹ; nitori ti nwọn kò pa ọ̀rọ rẹ mọ́.

¹⁵⁹Wò bi emi ti fẹ ẹkọ́ rẹ: Oluwa, sọ mi di ãye gẹgẹ bi ãnu rẹ.

¹⁶⁰Otitọ ni ipilẹṣẹ ọ̀rọ rẹ; ati olukulùku idajọ ododo rẹ duro lailai.

¹⁶¹Awọn ọmọ-alade ṣe inunibini si mi li ainidi: ṣugbọn ọkàn mi warìri nitori ọ̀rọ rẹ.

¹⁶²Emi yọ̀ si ọ̀rọ rẹ, bi ẹniti o ri ikogun pupọ.

¹⁶³Emi korira, mo si ṣe họ̃ si eke ṣiṣe: ṣugbọn ofin rẹ ni mo fẹ.

¹⁶⁴Nigba meje li õjọ li emi nyìn ọ nitori ododo idajọ rẹ.

¹⁶⁵Alafia pupọ̀ li awọn ti o fẹ ofin rẹ ni: kò si si ohun ikọsẹ fun wọn.

¹⁶⁶Oluwa, emi ti nreti igbala rẹ, emi si ṣe aṣẹ rẹ.

¹⁶⁷Ọkàn mi ti pa ẹri rẹ mọ́; emi si fẹ wọn gidigidi.

¹⁶⁸Emi ti npa ẹkọ́ ati ẹri rẹ mọ́; nitori ti gbogbo ọ̀na mi mbẹ niwaju rẹ.

¹⁶⁹Oluwa, jẹ ki ẹkún mi ki o sunmọ iwaju rẹ: fun mi li oye gẹgẹ bi ọ̀rọ rẹ.

¹⁷⁰Jẹ ki ẹ̀bẹ mi ki o wá siwaju rẹ: gbà mi gẹgẹ bi ọ̀rọ rẹ.

¹⁷¹Ete mi yio sọ iyìn jade, nigbati iwọ ba ti kọ́ mi ni ilana rẹ.

¹⁷²Ahọn mi yio sọ niti ọ̀rọ rẹ: nitori pe ododo ni gbogbo aṣẹ rẹ.

¹⁷³Jẹ ki ọwọ rẹ ki o ràn mi lọwọ; nitori ti mo ti yàn ẹkọ rẹ.

¹⁷⁴Oluwa, ọkàn mi ti fà si igbala rẹ; ofin rẹ si ni didùn-inu mi.

¹⁷⁵Jẹ ki ọkàn mi ki o wà lãye, yio si ma yìn ọ; si jẹ ki idajọ rẹ ki o ma ràn mi lọwọ.

¹⁷⁶Emi ti ṣina kiri bi agutan ti o nù; wá iranṣẹ rẹ nitori ti emi kò gbagbe aṣẹ rẹ.