Read YORUBA BIBLE CROWTHER VERSION – Bibeli Mimọ Orin Dafidi 97 Bible Online

Orin Dafidi 97 - YORUBA BIBLE CROWTHER VERSION – Bibeli Mimọ bible

Orin Dafidi 97

¹OLUWA jọba; ki aiye ki o yọ̀; jẹ ki inu ọ̀pọlọpọ erekuṣu ki o dùn.

²Awọsanma ati okunkun yi i ka: ododo ati idajọ ni ibujoko itẹ́ rẹ̀.

³Iná ṣaju rẹ̀, o si jo awọn ọta rẹ̀ yika kiri.

⁴Manamana rẹ̀ kọ imọlẹ si aiye: aiye ri i, o si wariri.

⁵Awọn òke nyọ́ bi ida niwaju Oluwa, niwaju Oluwa gbogbo aiye:

⁶Ọrun fi ododo rẹ̀ hàn, gbogbo orilẹ-ède si ri ogo rẹ̀.

⁷Oju yio tì gbogbo awọn ti nsìn ere fifin, ẹniti nfi ere ṣe ileri ara wọn: ẹ ma sìn i, gbogbo ẹnyin ọlọrun.

⁸Sioni gbọ́, inu rẹ̀ si dùn; awọn ọmọbinrin Juda si yọ̀, Oluwa, nitori idajọ rẹ.

⁹Nitoripe Iwọ Oluwa, li o ga jù gbogbo aiye lọ: Iwọ li a gbé ga jù gbogbo oriṣa lọ.

¹⁰Ẹnyin ti o fẹ Oluwa, ẹ korira ibi: o pa ọkàn awọn enia mimọ́ rẹ̀ mọ́: o gbà wọn li ọwọ awọn enia buburu.

¹¹A funrugbin imọlẹ fun olododo, ati inu didùn fun alaiya diduro.

¹²Ẹ yọ̀ niti Oluwa, ẹnyin olododo; ki ẹ si ma dupẹ ni iranti ìwa-mimọ́ rẹ̀.