Read YORUBA BIBLE CROWTHER VERSION – Bibeli Mimọ Owe 18 Bible Online

Owe 18 - YORUBA BIBLE CROWTHER VERSION – Bibeli Mimọ bible

Owe 18

¹ẸNITI o yà ara rẹ̀ sọtọ̀ yio lepa ifẹ ara rẹ̀, yio si kọju ìja nla si ohunkohun ti iṣe ti oye.

²Aṣiwère kò ni inu-didùn si imoye, ṣugbọn ki o le fi aiya ara rẹ̀ hàn.

³Nigbati enia-buburu ba de, nigbana ni ẹ̀gan de, ati pẹlu ẹ̀gan ni itiju.

⁴Ọ̀rọ ẹnu enia dabi omi jijìn, orisun ọgbọ́n bi odò ṣiṣàn.

⁵Kò dara lati ṣe ojuṣãju enia-buburu, lati bì olododo ṣubu ni idajọ.

⁶Ete aṣiwère bọ sinu ìja, ẹnu rẹ̀ a si ma pè ìna wá.

⁷Ẹnu aṣiwère ni iparun rẹ̀, ète rẹ̀ si ni ikẹkùn ọkàn rẹ̀.

⁸Ọ̀rọ olofofo dabi adidùn, nwọn a si wọ isalẹ inu lọ.

⁹Ẹniti o lọra pẹlu ni iṣẹ rẹ̀, arakunrin jẹguduragudu enia ni.

¹⁰Orukọ Oluwa, ile-iṣọ agbara ni: Olododo sá wọ inu rẹ̀, o si là.

¹¹Ọrọ̀ ọlọrọ̀ ni ilu-agbara rẹ̀, o si dabi odi giga li oju ara rẹ̀.

¹²Ṣaju iparun, aiya enia a ṣe agidi, ṣaju ọlá si ni irẹlẹ.

¹³Ẹniti o ba dahùn ọ̀rọ ki o to gbọ́, wère ati itiju ni fun u.

¹⁴Ọkàn enia yio faiyàrán ailera rẹ̀; ṣugbọn ọkàn ti o rẹ̀wẹsi, tani yio gbà a?

¹⁵Aiya amoye ni ìmọ; eti ọlọgbọ́n a si ma ṣe afẹri ìmọ.

¹⁶Ọrẹ enia a ma fi àye fun u, a si mu u wá siwaju awọn enia nla.

¹⁷Ẹnikini ninu ẹjọ rẹ̀ a dabi ẹnipe o jare, ṣugbọn ẹnikeji rẹ̀ a wá, a si hudi rẹ̀ silẹ.

¹⁸Keké mu ìja pari, a si làja lãrin awọn alagbara.

¹⁹Arakunrin ti a ṣẹ̀ si, o ṣoro jù ilu olodi lọ: ìja wọn si dabi ọpá idabu ãfin.

²⁰Ọ̀rọ ẹnu enia ni yio mu inu rẹ̀ tutu: ibisi ẹnu rẹ̀ li a o si fi tù u ninu.

²¹Ikú ati ìye mbẹ ni ipa ahọn: awọn ẹniti o ba si nlò o yio jẹ ère rẹ̀.

²²Ẹnikẹni ti o ri aya fẹ, o ri ohun rere, o si ri ojurere lọdọ Oluwa.

²³Talaka a ma bẹ̀ ẹ̀bẹ; ṣugbọn ọlọrọ̀ a ma fi ikanra dahùn.

²⁴Ẹniti o ni ọrẹ́ pupọ, o ṣe e si iparun ara rẹ̀; ọrẹ́ kan si mbẹ ti o fi ara mọni ju arakunrin lọ.