Read YORUBA BIBLE CROWTHER VERSION – Bibeli Mimọ Ẹkun Jeremiah 3 Bible Online

Ẹkun Jeremiah 3 - YORUBA BIBLE CROWTHER VERSION – Bibeli Mimọ bible

Ẹkun Jeremiah 3

¹EMI ni ọkunrin na ti o ti ri wàhala nipa ọpa ibinu rẹ̀.

²O ti fà mi, o si mu mi wá sinu òkunkun, kì si iṣe sinu imọlẹ.

³Lõtọ, o yi ọwọ rẹ̀ pada si mi siwaju ati siwaju li ọjọ gbogbo.

⁴O ti sọ ẹran-ara mi ati àwọ mi di ogbó, o ti fọ́ egungun mi.

⁵O ti mọdi tì mi, o fi orõrò ati ãrẹ̀ yi mi ka.

⁶O ti fi mi si ibi òkunkun, bi awọn ti o ti kú pẹ.

⁷O ti sọgba yi mi ka, ti emi kò le jade; o ti ṣe ẹ̀wọn mi wuwo.

⁸Bi emi ti kigbe pẹlu, ti emi si npariwo, o sé adura mi mọ.

⁹O ti fi okuta gbigbẹ sọgba yi ọ̀na mi ka, o ti yi ipa ọ̀na mi po.

¹⁰On jẹ bi ẹranko beari ti o ba dè mi, bi kiniun ni ibi ìkọkọ.

¹¹O ti mu mi ṣina li ọ̀na mi, o si fà mi ya pẹrẹpẹrẹ: o ti sọ mi di ahoro.

¹²O ti fà ọrun rẹ̀, o si fi mi ṣe itasi fun ọfa rẹ̀.

¹³O ti mu ki ọfà apó rẹ̀ wọ inu-ẹdọ mi lọ.

¹⁴Emi jẹ ẹni ẹsin fun gbogbo enia mi; orin wọn ni gbogbo ọjọ.

¹⁵O ti fi ìkoro mu mi yo, o ti mu mi mu omi wahala.

¹⁶O ti fi ọta ṣẹ́ ehín mi, o tẹ̀ mi mọlẹ ninu ẽru.

¹⁷Iwọ si ti mu ọkàn mi jina réré si alafia; emi gbagbe rere.

¹⁸Emi si wipe, Agbara mi ati ireti mi ṣègbe kuro lọdọ Oluwa.

¹⁹Ranti wahala mi ati inilara mi, ani ìkoro ati orõro.

²⁰Lõtọ, nigbati ọkàn mi nṣe iranti wọn, o si tẹriba ninu mi.

²¹Eyi ni emi o rò li ọkàn mi, nitorina emi o ma reti.

²²Ãnu Oluwa ni, ti awa kò parun tan, nitori irọnu-ãnu rẹ kò li opin.

²³Ọtun ni li orowurọ; titobi ni otitọ rẹ.

²⁴Oluwa ni ipin mi, bẹ̃li ọkàn mi wi; nitorina ni emi ṣe reti ninu rẹ̀.

²⁵Oluwa ṣe rere fun gbogbo ẹniti o duro dè e, fun ọkàn ti o ṣafẹri rẹ̀.

²⁶O dara ti a ba mã reti ni idakẹjẹ fun igbala Oluwa.

²⁷O dara fun ọkunrin, ki o gbe àjaga ni igba-ewe rẹ̀.

²⁸Ki o joko on nikan, ki o si dakẹ, nitori Ọlọrun ti gbe e le ori rẹ̀.

²⁹Ki o fi ẹnu rẹ̀ sinu ẽkuru; pe bọya ireti le wà:

³⁰Ki o fi ẹ̀rẹkẹ fun ẹniti o lù u; ki o kún fun ẹ̀gan patapata.

³¹Nitoriti Oluwa kì yio ṣá ni tì lailai:

³²Bi o tilẹ mu ibanujẹ wá, sibẹ on o ni irọnu gẹgẹ bi ọ̀pọlọpọ ãnu rẹ̀.

³³Nitori on kì ifẹ ipọn-ni-loju lati ọkàn rẹ̀ wá, bẹ̃ni kì ibà ọmọ enia ninu jẹ.

³⁴Lati tẹ̀ gbogbo ara-tubu ilẹ-aiye mọlẹ li abẹ ẹsẹ rẹ̀.

³⁵Lati yi ẹ̀tọ enia sapakan niwaju Ọga-ogo julọ.

³⁶Lati yi ọ̀ran idajọ enia pada, Oluwa kò fẹ ri i?

³⁷Tali ẹniti iwi, ti isi iṣẹ, nigbati Oluwa kò paṣẹ rẹ̀.

³⁸Ibi ati rere kò ha njade lati ẹnu Ọga-ogo-julọ wá?

³⁹Ẽṣe ti enia alãye nkùn? ti o wà lãye, ki olukuluku ki o kùn nitori ẹ̀ṣẹ rẹ̀!

⁴⁰Jẹ ki a wádi, ki a si dán ọ̀na wa wò, ki a si tun yipada si Oluwa.

⁴¹Jẹ ki a gbe ọkàn ati ọwọ wa soke si Ọlọrun li ọrun.

⁴²Awa ti dẹṣẹ, a si ti ṣọtẹ: iwọ kò ti dariji.

⁴³Iwọ ti fi ibinu bora, o si ṣe inunibini si wa: iwọ ti pa, o kò si ti dasi.

⁴⁴Iwọ ti fi awọsanma bo ara rẹ, ki adura má le là kọja.

⁴⁵Iwọ ti ṣe wa bi idarọ ati ohun alainilãri li ãrin awọn orilẹ-ède.

⁴⁶Gbogbo awọn ọta wa ti ya ẹnu wọn si wa.

⁴⁷Ẹ̀ru ati ọ̀fin wá sori wa, idahoro ati iparun.

⁴⁸Oju mi fi odò omi ṣan silẹ, nitori iparun ọmọbinrin awọn enia mi.

⁴⁹Oju mi dà silẹ ni omije, kò si dá, laiṣe isimi.

⁵⁰Titi Oluwa fi wò ilẹ, ti o wò lati ọrun wá,

⁵¹Oju mi npọn ọkàn mi loju, nitori gbogbo awọn ọmọbinrin ilu mi.

⁵²Awọn ọta mi dẹkùn fun mi gidigidi, gẹgẹ bi fun ẹiyẹ laini idi.

⁵³Nwọn ti ke ẹmi mi kuro ninu iho, nwọn si yi okuta sori mi.

⁵⁴Nwọn mu omi ṣan lori mi; emi wipe, Mo gbe!

⁵⁵Emi kepe orukọ rẹ, Oluwa, lati iho jijin wá.

⁵⁶Iwọ ti gbọ́ ohùn mi: máṣe se eti rẹ mọ si imikanlẹ mi, si igbe mi.

⁵⁷Iwọ sunmọ itosi li ọjọ ti emi kigbe pè ọ: iwọ wipe: Má bẹ̀ru!

⁵⁸Oluwa, iwọ ti gba ijà mi jà; iwọ ti rà ẹmi mi pada.

⁵⁹Oluwa, iwọ ti ri inilara mi, ṣe idajọ ọran mi!

⁶⁰Iwọ ti ri gbogbo igbẹsan wọn, gbogbo èro buburu wọn si mi.

⁶¹Iwọ ti gbọ́ ẹ̀gan wọn, Oluwa, gbogbo èro buburu wọn si mi.

⁶²Ète awọn wọnni ti o dide si mi, ati ipinnu wọn si mi ni gbogbo ọjọ.

⁶³Kiyesi ijoko wọn ati idide wọn! emi ni orin-ẹsin wọn.

⁶⁴San ẹsan fun wọn, Oluwa, gẹgẹ bi iṣẹ ọwọ wọn!

⁶⁵Fun wọn ni ifọju ọkàn, ègun rẹ lori wọn!

⁶⁶Fi ibinu lepa wọn, ki o si pa wọn run kuro labẹ ọrun Oluwa!