Read YORUBA BIBLE CROWTHER VERSION – Bibeli Mimọ Ẹkun Jeremiah 5 Bible Online

Ẹkun Jeremiah 5 - YORUBA BIBLE CROWTHER VERSION – Bibeli Mimọ bible

Ẹkun Jeremiah 5

¹RANTI, Oluwa, ohun ti o de sori wa; rò ki o si wò ẹ̀gan wa!

²A fi ogún wa le awọn alejo lọwọ, ile wa fun awọn ajeji.

³Awa jẹ alaini obi, baba kò si, awọn iyá wa dabi opó.

⁴Awa ti fi owo mu omi wa; a nta igi wa fun wa.

⁵Awọn ti nlepa wa sunmọ ọrùn wa: ãrẹ̀ mu wa, awa kò si ni isimi.

⁶Awa ti fi ọwọ wa fun awọn ara Egipti, ati fun ara Assiria, lati fi onjẹ tẹ́ wa lọrùn.

⁷Awọn baba wa ti ṣẹ̀, nwọn kò si sí; awa si nrù aiṣedede wọn.

⁸Awọn ẹrú ti jọba lori wa: ẹnikan kò si gbà wa kuro li ọwọ wọn.

⁹Ninu ewu ẹmi wa li awa nlọ mu onjẹ wa, nitori idà ti aginju.

¹⁰Àwọ wa pọ́n gẹgẹ bi àro nitori gbigbona ìyan na.

¹¹Nwọn tẹ́ awọn obinrin li ogo ni Sioni, awọn wundia ni ilu Juda.

¹²A so awọn ijoye rọ̀ nipa ọwọ wọn: a kò buyin fun oju awọn àgbagba.

¹³Awọn ọdọmọkunrin ru ọlọ, ãrẹ̀ mu awọn ọmọde labẹ ẹrù-igi.

¹⁴Awọn àgbagba dasẹ kuro li ẹnu-bode, awọn ọdọmọkunrin kuro ninu orin wọn.

¹⁵Ayọ̀ ọkàn wa ti dá; a yi ijo wa pada si ọ̀fọ.

¹⁶Ade ṣubu kuro li ori wa: ègbe ni fun wa, nitori awa ti ṣẹ̀.

¹⁷Nitori eyi li ọkàn wa rẹ̀wẹsi; nitori nkan wọnyi oju wa di baibai.

¹⁸Nitori oke Sioni, ti dahoro, awọn kọ̀lọkọlọ nrin lori rẹ̀.

¹⁹Iwọ, Oluwa, li o wà lailai; itẹ́ rẹ lati iran de iran!

²⁰Ẽṣe ti iwọ fi gbagbe wa lailai, ti o si kọ̀ wa silẹ li ọjọ pipẹ?

²¹Oluwa, yi wa pada sọdọ rẹ, awa o si yipada; sọ ọjọ wa di ọtun gẹgẹ bi ti igbãni.

²²Tabi iwọ ha ti kọ̀ wa silẹ patapata, tobẹ̃ ti iwọ si binu si wa gidigidi?