Read Y Beibl Cymraeg Newydd, New Welsh Bible, 1988 Genesis 11 Bible Online

Genesis 11 - Y Beibl Cymraeg Newydd, New Welsh Bible, 1988 bible

Genesis 11

¹Un iaith ac un ymadrodd oedd i'r holl fyd.

²Wrth ymdeithio yn y dwyrain, cafodd y bobl wastadedd yng ngwlad Sinar a thrigo yno.

³A dywedasant wrth ei gilydd, "Dewch, gwnawn briddfeini a'u crasu'n galed." Priddfeini oedd ganddynt yn lle cerrig, a phyg yn lle calch.

⁴Yna dywedasant, "Dewch, adeiladwn i ni ddinas, a thu373?r a'i ben yn y nefoedd, a gwnawn inni enw, rhag ein gwasgaru dros wyneb yr holl ddaear."

⁵Disgynnodd yr ARGLWYDD i weld y ddinas a'r tu373?r yr oedd y bobl wedi eu hadeiladu,

⁶a dywedodd, "Y maent yn un bobl a chanddynt un iaith; y maent wedi dechrau gwneud hyn, a bellach ni rwystrir hwy mewn dim y bwriadant ei wneud.

⁷Dewch, disgynnwn, a chymysgu eu hiaith hwy yno, rhag iddynt ddeall ei gilydd yn siarad."

⁸Felly gwasgarodd yr ARGLWYDD hwy oddi yno dros wyneb yr holl ddaear, a pheidiasant ag adeiladu'r ddinas.

⁹Am hynny gelwir ei henw Babel, oherwydd yno y cymysgodd yr ARGLWYDD iaith yr holl fyd, a gwasgarodd yr ARGLWYDD hwy oddi yno dros wyneb yr holl ddaear.

¹⁰Dyma genedlaethau Sem. Bu Sem fyw am gan mlynedd cyn geni iddo Arffaxad ddwy flynedd wedi'r dilyw.

¹¹Wedi geni Arffaxad, bu Sem fyw am bum can mlynedd, a chafodd feibion a merched eraill.

¹²Bu Arffaxad fyw am dri deg a phump o flynyddoedd cyn geni iddo Sela.

¹³Wedi geni Sela, bu Arffaxad fyw am bedwar cant a thair o flynyddoedd, a chafodd feibion a merched eraill.

¹⁴Bu Sela fyw am dri deg o flynyddoedd cyn geni iddo Heber.

¹⁵Wedi geni Heber, bu Sela fyw am bedwar cant a thair o flynyddoedd, a chafodd feibion a merched eraill.

¹⁶Bu Heber fyw am dri deg a phedair o flynyddoedd cyn geni iddo Peleg.

¹⁷Wedi geni Peleg, bu Heber fyw am bedwar cant tri deg o flynyddoedd, a chafodd feibion a merched eraill.

¹⁸Bu Peleg fyw am dri deg o flynyddoedd cyn geni iddo Reu.

¹⁹Wedi geni Reu, bu Peleg fyw am ddau gant a naw o flynyddoedd, a chafodd feibion a merched eraill.

²⁰Bu Reu fyw am dri deg a dwy o flynyddoedd cyn geni iddo Serug.

²¹Wedi geni Serug, bu Reu fyw am ddau gant a saith o flynyddoedd, a chafodd feibion a merched eraill.

²²Bu Serug fyw am dri deg o flynyddoedd cyn geni iddo Nachor.

²³Wedi geni Nachor, bu Serug fyw am ddau gan mlynedd, a chafodd feibion a merched eraill.

²⁴Bu Nachor fyw am ddau ddeg a naw o flynyddoedd cyn geni iddo Tera.

²⁵Wedi geni Tera, bu Nachor fyw am gant un deg a naw o flynyddoedd, a chafodd feibion a merched eraill.

²⁶Bu Tera fyw am saith deg o flynyddoedd cyn geni iddo Abram, Nachor a Haran.

²⁷Dyma genedlaethau Tera. Tera oedd tad Abram, Nachor a Haran; a Haran oedd tad Lot.

²⁸Bu Haran farw cyn ei dad Tera yng ngwlad ei enedigaeth, yn Ur y Caldeaid.

²⁹Yna cymerodd Abram a Nachor wragedd iddynt eu hunain; enw gwraig Abram oedd Sarai, ac enw gwraig Nachor oedd Milca, merch Haran, tad Milca ac Isca.

³⁰Yr oedd Sarai yn ddi-blant, heb eni plentyn.

³¹Cymerodd Tera ei fab Abram, a'i u373?yr Lot fab Haran, a Sarai ei ferch-yng-nghyfraith, gwraig ei fab Abram; ac aethant allan gyda'i gilydd o Ur y Caldeaid i fynd i wlad Canaan, a daethant i Haran a thrigo yno.

³²Dau gant a phump o flynyddoedd oedd oes Tera; a bu farw Tera yn Haran.