Read Y Beibl Cymraeg Newydd, New Welsh Bible, 1988 Salmau 111 Bible Online

Salmau 111 - Y Beibl Cymraeg Newydd, New Welsh Bible, 1988 bible

Salmau 111

¹Molwch yr ARGLWYDD. Diolchaf i'r ARGLWYDD �'m holl galon yng nghwmni'r uniawn, yn y gynulleidfa.

²Mawr yw gweithredoedd yr ARGLWYDD, fe'u harchwilir gan bawb sy'n ymhyfrydu ynddynt.

³Llawn anrhydedd a mawredd yw ei waith, a saif ei gyfiawnder am byth.

⁴Gwnaeth inni gofio ei ryfeddodau; graslon a thrugarog yw'r ARGLWYDD.

⁵Mae'n rhoi bwyd i'r rhai sy'n ei ofni, ac yn cofio ei gyfamod am byth.

⁶Dangosodd i'w bobl rym ei weithredoedd trwy roi iddynt etifeddiaeth y cenhedloedd.

⁷Y mae gwaith ei ddwylo yn gywir a chyfiawn, a'i holl orchmynion yn ddibynadwy;

⁸y maent wedi eu sefydlu hyd byth, ac wedi eu llunio o wirionedd ac uniondeb.

⁹Rhoes waredigaeth i'w bobl, a gorchymyn ei gyfamod dros byth. Sanctaidd ac ofnadwy yw ei enw.

¹⁰Dechrau doethineb yw ofn yr ARGLWYDD; y mae deall da gan bawb sy'n ufudd. Y mae ei foliant yn para byth.