Read Y Beibl Cymraeg Newydd, New Welsh Bible, 1988 Salmau 145 Bible Online

Salmau 145 - Y Beibl Cymraeg Newydd, New Welsh Bible, 1988 bible

Salmau 145

¹1 Emyn Mawl. I Ddafydd.0 Dyrchafaf di, fy Nuw, O Frenin, a bendithiaf dy enw byth bythoedd.

²Bob dydd bendithiaf di, a moliannu dy enw byth bythoedd.

³Mawr yw'r ARGLWYDD, a theilwng iawn o fawl, ac y mae ei fawredd yn anchwiliadwy.

⁴Molianna'r naill genhedlaeth dy waith wrth y llall, a mynegi dy weithredoedd nerthol.

⁵Am ysblander gogoneddus dy fawredd y dywedant, a myfyrio ar dy ryfeddodau.

⁶Cyhoeddant rym dy weithredoedd ofnadwy, ac adrodd am dy fawredd.

⁷Dygant i gof dy ddaioni helaeth, a chanu am dy gyfiawnder.

⁸Graslon a thrugarog yw'r ARGLWYDD, araf i ddigio, a llawn ffyddlondeb.

⁹Y mae'r ARGLWYDD yn dda wrth bawb, ac y mae ei drugaredd tuag at ei holl waith.

¹⁰Y mae dy holl waith yn dy foli, ARGLWYDD, a'th saint yn dy fendithio.

¹¹Dywedant am ogoniant dy deyrnas, a s�n am dy nerth,

¹²er mwyn dangos i bobl dy weithredoedd nerthol ac ysblander gogoneddus dy deyrnas.

¹³Teyrnas dragwyddol yw dy deyrnas, a saif dy lywodraeth byth bythoedd. Y mae'r ARGLWYDD yn ffyddlon yn ei holl eiriau, ac yn drugarog yn ei holl weithredoedd.

¹⁴Fe gynnal yr ARGLWYDD bawb sy'n syrthio, a chodi pawb sydd wedi eu darostwng.

¹⁵Try llygaid pawb mewn gobaith atat ti, ac fe roi iddynt eu bwyd yn ei bryd;

¹⁶y mae dy law yn agored, ac yr wyt yn diwallu popeth byw yn �l d'ewyllys.

¹⁷Y mae'r ARGLWYDD yn gyfiawn yn ei holl ffyrdd ac yn ffyddlon yn ei holl weithredoedd.

¹⁸Y mae'r ARGLWYDD yn agos at bawb sy'n galw arno, at bawb sy'n galw arno mewn gwirionedd.

¹⁹Gwna ddymuniad y rhai sy'n ei ofni; gwrendy ar eu cri, a gwareda hwy.

²⁰Gofala'r ARGLWYDD am bawb sy'n ei garu, ond y mae'n distrywio'r holl rai drygionus.

²¹Llefara fy ngenau foliant yr ARGLWYDD, a bydd pob creadur yn bendithio'i enw sanctaidd byth bythoedd.