Read Y Beibl Cymraeg Newydd, New Welsh Bible, 1988 Salmau 34 Bible Online

Salmau 34 - Y Beibl Cymraeg Newydd, New Welsh Bible, 1988 bible

Salmau 34

¹1 I Ddafydd, pan newidiodd ei wedd o flaen Abimelech, a chael ei yrru ymaith a mynd.0 Bendithiaf yr ARGLWYDD bob amser; bydd ei foliant yn wastad yn fy ngenau.

²Yn yr ARGLWYDD yr ymhyfrydaf; bydded i'r gostyngedig glywed a llawenychu.

³Mawrygwch yr ARGLWYDD gyda mi, a dyrchafwn ei enw gyda'n gilydd.

⁴Ceisiais yr ARGLWYDD, ac atebodd fi a'm gwaredu o'm holl ofnau.

⁵Y mae'r rhai sy'n edrych arno'n gloywi, ac ni ddaw cywilydd i'w hwynebau.

⁶Dyma un isel a waeddodd, a'r ARGLWYDD yn ei glywed ac yn ei waredu o'i holl gyfyngderau.

⁷Gwersylla angel yr ARGLWYDD o amgylch y rhai sy'n ei ofni, ac y mae'n eu gwaredu.

⁸Profwch, a gwelwch mai da yw'r ARGLWYDD. Gwyn ei fyd y sawl sy'n llochesu ynddo.

⁹Ofnwch yr ARGLWYDD, ei saint ef, oherwydd nid oes eisiau ar y rhai a'i hofna.

¹⁰Y mae'r anffyddwyr yn dioddef angen ac yn newynu, ond nid yw'r rhai sy'n ceisio'r ARGLWYDD yn brin o ddim da.

¹¹Dewch, blant, gwrandewch arnaf, dysgaf ichwi ofn yr ARGLWYDD.

¹²Pwy ohonoch sy'n dymuno bywyd ac a garai fyw'n hir i fwynhau daioni?

¹³Cadw dy dafod rhag drygioni a'th wefusau rhag llefaru celwydd.

¹⁴Tro oddi wrth ddrygioni a gwna dda, ceisia heddwch a'i ddilyn.

¹⁵Y mae llygaid yr ARGLWYDD ar y cyfiawn, a'i glustiau'n agored i'w cri.

¹⁶Y mae wyneb yr ARGLWYDD yn erbyn y rhai sy'n gwneud drwg, i ddileu eu coffa o'r ddaear.

¹⁷Pan waedda'r cyfiawn am gymorth, fe glyw'r ARGLWYDD a'u gwaredu o'u holl gyfyngderau.

¹⁸Y mae'r ARGLWYDD yn agos at y drylliedig o galon ac yn gwaredu'r briwedig o ysbryd.

¹⁹Llawer o adfyd a gaiff y cyfiawn, ond gwareda'r ARGLWYDD ef o'r cyfan.

²⁰Ceidw ei holl esgyrn, ac ni thorrir yr un ohonynt.

²¹Y mae adfyd yn lladd y drygionus, a chosbir y rhai sy'n cas�u'r cyfiawn.

²²Y mae'r ARGLWYDD yn gwaredu ei weision, ac ni chosbir y rhai sy'n llochesu ynddo.