Read Y Beibl Cymraeg Newydd, New Welsh Bible, 1988 Diarhebion 16 Bible Online

Diarhebion 16 - Y Beibl Cymraeg Newydd, New Welsh Bible, 1988 bible

Diarhebion 16

¹Pobl biau trefnu eu meddyliau, ond oddi wrth yr ARGLWYDD y daw ateb y tafod.

²Y mae holl ffyrdd rhywun yn bur yn ei olwg ei hun, ond y mae'r ARGLWYDD yn pwyso'r cymhellion.

³Cyflwyna dy weithredoedd i'r ARGLWYDD, a chyflawnir dy gynlluniau.

⁴Gwnaeth yr ARGLWYDD bob peth i bwrpas, hyd yn oed y drygionus ar gyfer dydd adfyd.

⁵Ffiaidd gan yr ARGLWYDD yw pob un balch; y mae'n sicr na chaiff osgoi cosb.

⁶Trwy deyrngarwch a ffyddlondeb y maddeuir camwedd, a thrwy ofn yr ARGLWYDD y troir oddi wrth ddrwg.

⁷Pan yw'r ARGLWYDD yn hoffi ffyrdd rhywun, gwna hyd yn oed i'w elynion fyw mewn heddwch ag ef.

⁸Gwell ychydig gyda chyfiawnder nag enillion mawr heb farn.

⁹Y mae meddwl rhywun yn cynllunio'i ffordd, ond yr ARGLWYDD sy'n trefnu ei gamre.

¹⁰Ceir dyfarniad oddi ar wefusau'r brenin; nid yw ei enau yn bradychu cyfiawnder.

¹¹Mater i'r ARGLWYDD yw mantol a chloriannau cyfiawn; a'i waith ef yw'r holl bwysau yn y god.

¹²Ffiaidd gan frenhinoedd yw gwneud drwg, oherwydd trwy gyfiawnder y sicrheir gorsedd.

¹³Hyfrydwch brenin yw genau cyfiawn, a hoffa'r sawl sy'n llefaru'n uniawn.

¹⁴Y mae llid brenin yn gennad angau, ond fe'i dofir gan yr un doeth.

¹⁵Yn llewyrch wyneb brenin y ceir bywyd, ac y mae ei ffafr fel cwmwl glaw yn y gwanwyn.

¹⁶Gwell nag aur yw ennill doethineb, a gwell dewis deall nag arian.

¹⁷Y mae priffordd yr uniawn yn troi oddi wrth ddrygioni, a chadw ei fywyd y mae'r un sy'n gwylio'i ffordd.

¹⁸Daw balchder o flaen dinistr, ac ymffrost o flaen cwymp.

¹⁹Gwell bod yn ddistadl gyda'r anghenus na rhannu ysbail gyda'r balch.

²⁰Y mae'r medrus yn ei fater yn llwyddo, a'r un sy'n ymddiried yn yr ARGLWYDD yn ddedwydd.

²¹Y doeth o galon a ystyrir yn ddeallus, a geiriau deniadol sy'n ychwanegu dysg.

²²Y mae deall yn ffynnon bywyd i'w berchennog, ond ffolineb yn ddisgyblaeth i ffyliaid.

²³Y mae meddwl y doeth yn gwneud ei eiriau'n ddeallus, ac yn ychwanegu dysg at ei ymadroddion.

²⁴Y mae geiriau teg fel diliau m�l, yn felys i'r blas ac yn iechyd i'r corff.

²⁵Y mae ffordd sy'n ymddangos yn union, ond sy'n arwain i farwolaeth.

²⁶Angen llafurwr sy'n gwneud iddo lafurio, a'i enau sy'n ei annog ymlaen.

²⁷Y mae dihiryn yn cynllunio drwg; y mae fel t�n poeth ar ei wefusau.

²⁸Y mae rhywun croes yn creu cynnen, a'r straegar yn gwahanu cyfeillion.

²⁹Y mae rhywun traws yn denu ei gyfaill, ac yn ei arwain ar ffordd wael.

³⁰Y mae'r un sy'n wincio llygad yn cynllunio trawster, a'r sawl sy'n crychu ei wefusau yn gwneud drygioni.

³¹Y mae gwallt sy'n britho yn goron anrhydedd; fe'i ceir wrth rodio'n gyfiawn.

³²Gwell bod yn amyneddgar nag yn rhyfelwr, a rheoli tymer na chipio dinas.

³³Er bwrw'r coelbren i'r arffed, oddi wrth yr ARGLWYDD y daw pob dyfarniad.