Read Библия- Yakut Сааалтыр 101 Bible Online

Сааалтыр 101 - Библия- Yakut bible

Сааалтыр 101

¹Эрэйи-муҥу көрбүт киһи, санаата түһэн, АЙЫЫ ТОЙОҤҤО дууһатын арыйар үҥүүтэ.

²АЙЫЫ ТОЙОН, иһит мин үҥэрбин; мин энэлийэр саҥам Эйиэхэ тиийиэхтин.

³Эриирдээх күммэр миигиттэн киэр хайыһыма, мин этэрбин болҕойон иһит; Эйигин ыҥырбыт күммэр түргэнник хардар.

⁴Күннэрим буруо курдук сүтэллэр, хардаҕас уҥуохтарым уотунан умайаллар.

⁵Сүрэҕим охсуллубут оттуу куурда-хатта, онон килиэппин сиирбин да умнар буоллум.

⁶Улаханнык ынчыктыырбыттан уҥуохтаах тириим эрэ хаалла.

⁷Мин иччитэх сири кэрийэр мэкчиргэ кэриэтэ, урусхал үрдүгэр олорор модьугу кэриэтэ буоллум.

⁸Утуйар уум ончу кэлбэт; мин дьиэ үрдүгэр олорор соҕотох көтөр курдукпун.

⁹Өстөөхтөрүм уһун күнү быһа күлүү гыналлар, миигин ыыстааччылар мин ааппын кырыыска тутталлар.

¹⁰Эн миэхэ абараҥҥын, Эн уордайаҥҥын, мин килиэби курдук, күлү сиир буоллум, иһэр утахпар көмүскэм уутун булкуйдум. Эн миигин, өрө таһааран баран, аллара бырахтыҥ.

¹²Күннэрим киэһээҥҥи күлүктүү күлүҥнээн ааһаллар; мин от курдук иинэ хаттым.

¹³Оттон Эн, АЙЫЫ ТОЙОН, үйэлэр тухары бааргын [30], Эн аатыҥ көлүөнэттэн көлүөнэҕэ барар.

¹⁴Эн, тураҥҥын, Сиоҥҥа амарахтык сыһыаннаһыаҕыҥ; кинини аһынар кэмиҥ кэллэ, кэм-кэрдии уолдьаста.

¹⁵Кулуттарыҥ кини таастарын да күндүтүк саныыллар, кини быылын-буорун кытта аһыйаллар.

¹⁶Норуоттар АЙЫЫ ТОЙОН аатыттан куттаныахтара, сир ыраахтааҕылара бары Эн килбиэҥҥиттэн саллыахтара.

¹⁷АЙЫЫ ТОЙОН Сиону чөлүгэр түһэриэҕэ, кэрэмэн килбиэнин киниэхэ көрдөрүөҕэ.

¹⁸Кини көмүскэлэ суохтар үҥэллэрин истиэҕэ, кинилэр көрдөһүүлэрин сэниэ суоҕа.

¹⁹Кэлэр көлүөнэлэр АЙЫЫ ТОЙОНУ айхаллыылларын туһугар, кэнэҕэс ыччакка анаан бу туһунан суруллуоҕа:

²⁰хаайыылаахтар ынчыктарын истээри, өлөргө анаммыттары босхолоору, АЙЫЫ ТОЙОН үөһээҥҥи сибэтиэй Дьиэтиттэн аллара көрдө, халлааннартан сири өҥөйдө.

²²Онон, АЙЫЫ ТОЙОҤҤО сүгүрүйээри, бары норуоттар, саарыстыбалар муһуннахтарына, Сионтан АЙЫЫ ТОЙОН аатын иһитиннэриэхтэрэ, Иерусалимтан Кинини айхаллыахтара.

²⁴Кини мин күүспүн-сэниэбин суолум ортотугар эстэ, күммүн-дьылбын сарбыйда.

²⁵«Оо, Айыы Таҥарам! — диэтим мин. — Күөгэйэр күммэр олохпун былдьаама. Күнүҥ-дьылыҥ Эйиэнэ бараммат — көлүөнэттэн көлүөнэҕэ бара турар».

²⁶Былыр-былыр Эн сири олохтообутуҥ, халлаан эмиэ — Эн уран тарбаҕыҥ оҥоһуга.

²⁷Сир-халлаан сүтүөҕэ, оттон Эн куруук баар буолуоҥ; барыта таҥас курдук эргэриэҕэ, ону Эн ардах сонун курдук уларытыаҕыҥ, оччоҕо суола суох сүтүөхтэрэ.

²⁸Оттон Эн өрүү бииргин, уларыйбаккын, Эн үллэр үйэҥ муҥурдаммат.

²⁹Эн кулуттарыҥ уолаттара куттала суох олоруохтара, кинилэр ыччаттара куруук Эн иннигэр сылдьыахтара.