Read Библия- Yakut Сааалтыр 102 Bible Online

Сааалтыр 102 - Библия- Yakut bible

Сааалтыр 102

¹Давид псалома. Алҕаа, дууһам миэнэ, АЙЫЫ ТОЙОНУ, бүтүн сүрэҕим-быарым — Кини сибэтиэй аатын.

²Алҕаа, дууһам миэнэ, АЙЫЫ ТОЙОНУ, умнума Кини бары үтүө дьайыытын.

³Кини эн бары буруйгун бырастыы гынар, бары ыарыыгыттан эйигин үтүөрдэр.

⁴Кини эн олоххун иинтэн өрүһүйэр, эйигин таптыырын, аһынарын көрдөрөр.

⁵Үйэҥ тухары эйигин үтүөнэн дуоһутар, онон, хотой курдук, эдэргэр түһэҕин.

⁶АЙЫЫ ТОЙОН көнөтүк дьүүллүүр, бары баттаммыттар кырдьыктарын көмүскүүр.

⁷Кини Бэйэтин суолларын Моисейга биллэрбитэ, оҥорор дьайыыларын Израиль норуотугар көрдөрбүтэ.

⁸АЙЫЫ ТОЙОН аһыныгас сүрэхтээх, амарах санаалаах, улуу тулуурдаах, муҥурун булларбат бигэ тапталлаах.

⁹Кини уһугар тиийэ уордайбат, үйэ-саас тухары кыыһыра сылдьыбат.

¹⁰Биһиги аньыыбытыгар тоҕоостоох харданы Кини оҥорботоҕо, биһиги буруйбутугар сөптөөх төлөбүрү ылбатаҕа.

¹¹Халлаан сиртэн үрдүгүн саҕа улуу бигэ тапталы Киниттэн куттанар дьоҥҥо Кини көрдөрөр.

¹²Илин арҕааттан ырааҕын саҕа ыраатыннарда Кини биһигиттэн бары аньыыбытын-буруйбутун.

¹³Аҕа оҕолоругар амараҕын курдук, АЙЫЫ ТОЙОН Киниттэн толлор дьоҥҥо амарах.

¹⁴Кини биһиги туохтан турарбытын билэр, биһиги быыл эрэ буоларбытын өйдүүр.

¹⁵Киһи үйэтэ — от үйэтэ, сир симэҕинии, кини иинэр-кэхтэр.

¹⁶Үрдүнэн тыал илгийиэн эрэ кэрэх, мэлийэр, үүммүт сирэ-уота аны кинини билиммэт буолар.

¹⁷Оттон АЙЫЫ ТОЙОН Киниттэн толлор дьоҥҥо таптала үйэттэн үйэлэргэ уларыйбат, Кини кырдьыктаах сыһыана кинилэр оҕолорун оҕолоругар кубулуйбат —

¹⁸Кини кэс тылын тутуһааччыларга, кэриэстэрин умнубакка толорооччуларга.

¹⁹АЙЫЫ ТОЙОН бүрүстүөлүн халлааннарга туруорбута; баар барыта — Кини Саарыстыбатын бас билиитэ.

²⁰Алҕааҥ АЙЫЫ ТОЙОНУ, Кини Аанньаллара, саҥатын истээт да, тылын толорор күүстээхтэрэ.

²¹Алҕааҥ АЙЫЫ ТОЙОНУ, бары сэриилэрэ, Кини көҥүлүн толорор үлэһиттэрэ.

²²Алҕаа АЙЫЫ ТОЙОНУ, айбыта бука барыта, Кини баһылыыр эйгэтигэр бүттүүнүгэр. Алҕаа, дууһам миэнэ, АЙЫЫ ТОЙОНУ.