Read Библия- Yakut Сааалтыр 104 Bible Online

Сааалтыр 104 - Библия- Yakut bible

Сааалтыр 104

¹Айхаллааҥ АЙЫЫ ТОЙОНУ, ыҥырыҥ Кини аатын, норуоттар ортолоругар биллэриҥ Кини дьайыытын.

²Ыллааҥ Киниэхэ, айхаллааҥ Кинини; кэпсээҥ Кини оҥорор бары дьиктитин.

³Күөн туттуҥ Кини сибэтиэй аатынан; үөрүөхтүн АЙЫЫ ТОЙОНУ көрдөөччүлэр сүрэхтэрэ.

⁴Көрдөөҥ АЙЫЫ ТОЙОНУ, Кини күүһүн, көрдөөҥ Кинини өрүүтүн.

⁵Өйдүү сылдьыҥ Кини оҥорбут дьиктилэрин, көрдөрбүт бэлиэлэрин, дьүүллээбит дьүүллэрин,

⁶эһиги, Кини кулутун Авраам удьуордара, Иаков уолаттара, Кини талыылаахтара.

⁷Кини биһиги АЙЫЫ ТОЙОН Таҥарабыт; Кини бүтүн сир устун дьүүллүүр.

⁸Үйэлэр тухары Кини өйдүүр эппит кэс тылын — тыһыынча көлүөнэҕэ ыйбытын-кэрдибитин,

⁹Авраамныын оҥорсубут сөбүлэһиитин, Исаакка биэрбит андаҕарын.

¹⁰Кини ону Иаковка сокуон быһыытынан, Израильга мэҥэ кэс тыл быһыытынан бигэргэппитэ.

¹¹Кини эппитэ: «Мин эйиэхэ Ханаан сирин бэлэхтиэм, бас билэр өлбүгэҥ сиэринэн быһан биэриэм».

¹²Өссө ахсааннаах эрэ эрдэхтэринэ, олох аҕыйах эрдэхтэринэ, онно кэлии дьон буолан,

¹³норуоттан норуокка, саарыстыбаттан саарыстыбаҕа көһө сырыттахтарына,

¹⁴Кини кимиэхэ да кинилэри атаҕастаппатаҕа; ыраахтааҕылары буойталыыра:

¹⁵«Мин талан ылбыт дьоммун тыытымаҥ, пророктарбар куһаҕаны оҥорумаҥ».

¹⁶Кини сиргэ суту ыҥырбыта, бурдук хас биирдии умнаһын суох оҥорбута.

¹⁷Ол эрэн кинилэр иннилэригэр киһини ыыппыта: Иосибы кулуттааһыҥҥа атыылаабыттара.

¹⁸Кини атаҕын хандалынан бохсубуттара, моонньугар тимир тиэрбэһи кэтэрпиттэрэ;

¹⁹кини өтө көрөн эппитэ туолуор диэри, АЙЫЫ ТОЙОН тыла кинини тургутара.

²⁰Ыраахтааҕы, киһи ыытан, кини хандалытын уһултарбыта, норуоттар баһылыктара кинини көҥүлгэ таһаартарбыта;

²¹тойон оҥорон, бэйэтин дьиэтин-уотун дьаһайтарбыта, бас билэр сирин барытын салайтарбыта;

²²үрдүк сололоохторун киниэхэ үөрэттэрбитэ, аҕа баһылыктарын муудараска уһуйтарбыта.

²³Онтон Египеккэ Израиль кэлбитэ, Иаков Хам [32] сиригэр көһөн олорбута.

²⁴АЙЫЫ ТОЙОН, норуотун үтүмэнник үксэтэн, өстөөхтөрүн бүгүлүүрдүү күүһүрпүтэ;

²⁵онтон кинилэри Египет дьонугар абааһы көрдөрөн, олор Кини кулуттарын албынныыр буолбуттара.

²⁶Онуоха Кини кулутун Моисейы уонна талан ылбыт киһитин Аарону ыыппыта.

²⁷Хам сиригэр кинилэр Таҥара бэлиэ дьайыыларын, араас дьиктини көрдөрбүттэрэ.

²⁸Таҥара, хараҥаны ыытан, им балайы түһэрбитэ, ол да үрдүнэн Египет дьоно Кини тылын истибэтэхтэрэ.

²⁹Онтон Кини, ууларын хааҥҥа кубулутан, балыктарын тумнарбыта.

³⁰Сирдэрэ-уоттара бардырҕас баҕа буолбута, бэл ыраахтааҕыларын утуйар хосторо кытта туолбута.

³¹Кини эппитигэр, сахсырҕа халыҥ былыта кэлбитэ, дойдуну биир гына кумаар түспүтэ.

³²Ардах оннугар кинилэргэ толону ыыппыта, чаҕылҕан уотунан сирдэрин дапсыйбыта.

³³Виноградниктарын, смоковницаларын эспитэ, сирдэрин устун мастарын суулларбыта.

³⁴Кини эппитигэр, саранча үөрэ саба көтөн кэлбитэ, түүлээх үөн кыама суох ыһан кэбиспитэ,

³⁵онон дойдуларын ото-маһа барыта кэрбэнэн бүппүтэ, буолактарын бурдугуттан туох да орпотоҕо.

³⁶Кини Египет бары ыалларын бастыҥ күүһүн, бастакы уолаттарын, өлөртөөбүтэ.

³⁷Дьэ онтон Израиль дьонун Египеттэн таһаарбыта; кинилэр үрүҥ да, кыһыл да көмүһү илдьэ барбыттара, итиччэ киһиттэн хайалара да дубук үктээбэтэҕэ.

³⁸Израиль уолаттарыттан кыраҕыйар буоланнар, Египет дьоно кинилэр барбыттарыгар үөрбүттэрэ.

³⁹Таҥара, норуоппар хахха буоллун диэн, былыты таһаарбыта, түүн сырдык буоллун диэн, уоту сандаардыбыта.

⁴⁰Көрдөспүттэригэр, хонуу куруппааскыларын ыыппыта, халлаан килиэбинэн кинилэри дуоһуппута.

⁴¹Кини тааһы хайа охсубутугар, уу сүүрбүтэ, хаппыт сир устун өрүс курдук, күллүгүрүү устубута.

⁴²Кулутугар Авраамҥа эппит ытык тылын Кини ол курдук өйдүү сылдьара.

⁴³Онон норуотун үөрдэ-көтүтэ илдьэ барбыта, талан ылбыт дьонун ырыа аргыстаах таһаарбыта.

⁴⁴Ыйаахтарбын толорор кыахтанныннар, сокуоннарбын тутуһар буоллуннар диэн, кинилэргэ норуоттар сирдэрин биэрбитэ, атын омуктар үлэлэрин түмүгүн бас биллэрбитэ. Аллилуия.