Read Библия- Yakut Сааалтыр 138 Bible Online

Сааалтыр 138 - Библия- Yakut bible

Сааалтыр 138

¹Хуор салайааччытыгар. Давид псалома.

²АЙЫЫ ТОЙОН, Эн миигин тургутан көрөҥҥүн билэҕин. Эн билэҕин мин турар да, олорор да кэммин, саныыр санаабын ыраахтан өйдүүгүн.

³Баран иһэбин дуу, сынньана олоробун дуу, миигин, ытыска уурбуттуу, көрөҕүн, суолбун-ииспин бүтүннүү анаараҕын.

⁴Этэр тылым өссө үөскүү илигинэ, АЙЫЫ ТОЙОН, Эн ол тылы эндэппэккэ билэҕин.

⁵Эн миигин бары өттүбүттэн тулалыыгын, күүстээх илиигинэн араҥаччылыыгын.

⁶Дьикти да буоллаҕа миэхэ Эн тугу барытын билэриҥ, үрдүк да буоллаҕа, мин ону ситэн өйдүүр кыаҕым суох!

⁷Ханна барыамый Эн Тыыҥҥыттан? Ханна куотуомуй Эйигиттэн?

⁸Халлааҥҥа тахсыам дуу — онно Эн бааргын; үтүгэн түгэҕэр түһүөм дуу — онно эмиэ Эн бааргын.

⁹Сарыал кынаттарын ыламмын, байҕал уҥуор көһүөм дуу,

¹⁰онно эмиэ Эн илииҥ миигин сирдиэ, онно эмиэ Эн уҥа илииҥ миигин сиэтиэ.

¹¹Этиэм дуу, баҕар, хараҥа миигин саһыарыа диэн, сырдык мин тулабар түүҥҥэ кубулуйуо диэн;

¹²хараҥа да Эйиэхэ хараҥата суох, түүн да сырдык, күнүскү курдук: хараҥа да, сырдык да Эйиэхэ биир тэҥнэр.

¹³Эн мындырдаан оҥорбутуҥ мин ис өттүбүн, ийэм иһигэр миигин Эн таҥан өрбүтүҥ.

¹⁴Айхал этэбин Эйиэхэ — Эн миигин сөҕүмэр дьиктитик айбыккын. Дьикти да буоллахтара Эн дьайыыларыҥ! Мин дууһам ону толору өйдүүр.

¹⁵Кистэлэҥҥэ айыллар кэммэр, сир түгэҕэр үөскүүр түгэммэр мин уҥуоҕум чэрчитэ Эйигиттэн кистэммэтэҕэ.

¹⁶Өссө үөскэх эрэ эрдэхпинэ, миигин Эн хараҕыҥ көрөрө; өссө биир да күнүм суох эрдэҕинэ ыйаахтаах күнүм-дьылым барыта Эн кинигэҕэр суруллан сылдьара.

¹⁷Үрдүк да буоллахтара миэхэ Эн санааларыҥ, Айыы Таҥара, үтүмэн да буоллахтара!

¹⁸Ахсааннарын ааҕыам иһин, муора кумаҕынааҕар элбэхтэр. Сарсыарда уһуктарбар мин өссө да Эйигинниин бииргэбин.

¹⁹Оо, Айыы Таҥара, Эн хара дьайдаахтары сууһарарыҥ буоллар! Киэр бараллара буоллар миигиттэн хааҥҥа суудайааччылар —

²⁰Эйигин утары өһүөннээхтик тыллаһааччылар, Эйигин утары нэгэйдик өрө турааччылар.

²¹Хайдах абааһы көрүөм суоҕай, АЙЫЫ ТОЙОН, Эйигин абааһы көрөөччүлэри? Хайдах мин сиргэниэм суоҕай Эйигин утары өрө турааччылартан?

²²Ис сүрэхпиттэн мин кинилэри абааһы көрөбүн, кинилэр миэхэ өстөөхтөрүм буолаллар.

²³Иҥэн-тоҥон көр, Айыы Таҥара, бил мин сүрэхпин; чинчийэн көр миигин, өйбүн-санаабын бил.

²⁴Көр, баҕар, мин кутталлаах суолунан иһэрим буолуо, оччоҕо миигин мэҥэ суолга салайан биэр.