Read Библия- Yakut Сааалтыр 24 Bible Online

Сааалтыр 24 - Библия- Yakut bible

Сааалтыр 24

¹Давид псалома. Эйиэхэ, АЙЫЫ ТОЙОН, дууһам үөһэ дьулуһар.

²Айыы Таҥарам, Эйиэхэ мин эрэнэбин; миигин кыбыстыыга киллэртэримэ, өстөөхтөрбүн сэтэрэтимэ.

³Эйиэхэ эрэнээччилэртэн ким да кыбыстыбатын, Эйигин утары уодаһыннаахтык туруммут, ол сааттын.

⁴Ыйан биэр миэхэ, АЙЫЫ ТОЙОН, Бэйэҥ суолларгын, үөрэт Эн ыллыктаргынан сылдьарга.

⁵Салай Бэйэҥ кырдьыккар, үөрэт миигин; Эн буолаҕын мин быыһабыллаах Таҥарам, Эйиэхэ хайа да күн эрэнэбин.

⁶Ахтан-санаан кэл, АЙЫЫ ТОЙОН, үйэлэр тухары уларыйбат амарах сыһыаҥҥын, бигэ тапталгын.

⁷Ахтыма эдэр сааһым аньыытын, сокуона суох дьайыытын; үтүө санааҕыттан миигин амарахтык аҕын, АЙЫЫ ТОЙОН!

⁸АЙЫЫ ТОЙОН үтүө санаалаах, Кини кырдьыгы көрөр, ол иһин аньыылаахтары көнө суолга үөрэтэр.

⁹Көрсүө-сэмэй дьону кырдьыкка салайар, көрсүө-сэмэй дьону Бэйэтин суолугар такайар.

¹⁰Кини кэс тылын, Кини туоһутун тутуһааччыга АЙЫЫ ТОЙОН суола барыта — бигэ таптал уонна кырдьык.

¹¹Бэйэҥ аатыҥ туһугар, АЙЫЫ ТОЙОН, буруйбун бырастыы гын, улуу буруйу мин оҥорбуппун.

¹²АЙЫЫ ТОЙОНТОН куттанар дьон кимнээҕий? АЙЫЫ ТОЙОН кинилэри талыахтаах суолларыгар үөрэтиэҕэ.

¹³Оччоҕо дьоллоох-соргулаах буолуохтара, оҕолоро сири-уоту бас билэн олоруохтара.

¹⁴АЙЫЫ ТОЙОН кистэлэҥэ Киниттэн куттанар дьоҥҥо ананар, Кини кэс тылын ирдэбилэ кинилэргэ арыллар.

¹⁵Мин хараҕым хаһан да АЙЫЫ ТОЙОНТОН арахпат; Кини мин атахпын илим ситимиттэн араарар.

¹⁶Оо, хайыс мин диэки, миигин абыраа-аһын, суос-соҕотохпун мин, баттана-үктэнэ сылдьабын.

¹⁷Олус да элбээтэ сүрэҕим муҥа-таҥа, өрүһүйэн таһаар миигин бу кутурҕантан.

¹⁸Көр мин түбэспит эрэйбин-муҥмун, кыһалҕабын; аньыыбын-харабын барытын бырастыы гын.

¹⁹Көр өстөөхтөрүм төһө үксээбиттэрин, хайдах курдук миигин өлөрдүү абааһы көрбүттэрин.

²⁰Араҥаччылаа дууһабын, өрүһүйэн ыл миигин, Эйиэхэ эрэммит киһи кыбыстыыга кииримиим.

²¹Эҥкилэ суох ыраас сигили уонна кырдьыгы тутуһуу миигин харыстыахтыннар; Эйигин мин туорхаһыйа кэтэһэбин.

²²Айыы Таҥара, Израилы бары эрэйиттэн өрүһүй.