Read Библия- Yakut Сааалтыр 32 Bible Online

Сааалтыр 32 - Библия- Yakut bible

Сааалтыр 32

¹АЙЫЫ ТОЙОНТОН үөрүҥ, кырдьыктаахтар: көнө дьон Таҥараны айхаллыыра сиэрдээх.

²Айхаллааҥ АЙЫЫ ТОЙОНУ лира тыаһынан, ыллааҥ Киниэхэ уон кыллаах арфа доҕуһуолунан.

³Саҥа ырыаны эһиги Киниэхэ ыллааҥ; кылы имигэстик тардыалааҥ, ньиргиччи саҥа аллайыҥ.

⁴АЙЫЫ ТОЙОН тыла-өһө кырдьыктаах, Кини дьайыыта барыта эрэбиллээх.

⁵Кини кырдьыгы, көнө дьүүлү таптыыр; АЙЫЫ ТОЙОН таптала сири биир гына тайыыр.

⁶АЙЫЫ ТОЙОН тылынан халлааннар айыллыбыттара, күн, ый, сулус бары Кини эппитигэр баар буолбуттара.

⁷Кини байҕал уутун барытын, симииргэ кутардыы, мунньубута, түгэҕэ биллибэт чүөмпэлэри хасааһыгар уктубута.

⁸Сир үрдэ бүттүүнэ АЙЫЫ ТОЙОНТОН саллыахтын; аан дойду олохтооҕо барыта Кини иннигэр уҥуоҕа хамсыахтын.

⁹Кини эппитигэр барыта айыллыбыта; Кини дьаһайбытыгар барыта баар буолбута.

¹⁰АЙЫЫ ТОЙОН омуктар сүбэлэрин үрэйэр, норуоттар былааннарын бурайар.

¹¹АЙЫЫ ТОЙОН сүбэтэ үйэттэн үйэҕэ барар, Кини сүрэҕин санаата көлүөнэттэн көлүөнэҕэ бэриллэр.

¹²АЙЫЫ ТОЙОН Таҥаралаах омук, Кини Бэйэтигэр талан ылбыт норуота, дьоллоох.

¹³АЙЫЫ ТОЙОН халлаантан сири анаарар, киһи аймаҕы бүттүүнүн көрөр.

¹⁴Кини, бүрүстүөлүгэр олорон, сир олохтооҕун барытын чинчилиир.

¹⁵Барыларын сүрэхтэрин айбыт буолан, бары дьайыыларын ырыҥалыыр.

¹⁶Ыраахтааҕыны халыҥ сэриитэ быыһыа суоҕа, сэрииһити сүҥкэн күүһэ көмүскүө суоҕа.

¹⁷Быыһанарга ат эмиэ эрэбилэ суох, модун да күүһүнэн өрүһүйүө суоҕа.

¹⁸АЙЫЫ ТОЙОН хараҕа көрөр Киниттэн куттанааччылары — дууһабытын өлүүттэн быыһыа, сут кэмигэр аһатыа диэн, Кини бигэ тапталыгар эрэнээччилэри.

²⁰Биһиги дууһабыт АЙЫЫ ТОЙОНУ кэтэһэр; Кини биһиэхэ көмөлөһөр, биһиэхэ куйах буолар.

²¹Кини сибэтиэй аатыгар эрэнэммит, биһиги сүрэхпит Киниттэн үөрэр.

²²Эйиэхэ эрэммиппит курдук, АЙЫЫ ТОЙОН, Эн бигэ тапталыҥ биһиэхэ тосхойдун.