Read Библия- Yakut Сааалтыр 36 Bible Online

Сааалтыр 36 - Библия- Yakut bible

Сааалтыр 36

¹Давид псалома. Куһаҕан быһыылаахтан долгуйума, буруйу оҥорооччуну ордугурҕаама.

²Кинилэр сотору от курдук кууруохтара, күөх үүнээйи курдук ииниэхтэрэ.

³АЙЫЫ ТОЙОҤҤО эн эрэн итиэннэ үтүөнү оҥор, бу сир үрдүгэр олорон, Киниэхэ бэриниилээх буол.

⁴АЙЫЫ ТОЙОН буоллун эн дууһаҥ дуоһулаҥа, оччоҕо Кини сүрэҕиҥ баҕатын толоруоҕа.

⁵Суолгун АЙЫЫ ТОЙОҤҤО туттар, Киниэхэ эрэн, оччоҕо көмөлөһүөҕэ.

⁶Көнө быһыыгын күнүскү сырдыктыы күндээрдэн көрдөрүөҕэ, кырдьыккын күн уотунуу сандаардан таһаарыаҕа.

⁷АЙЫЫ ТОЙОН иннигэр чуумпур, Киниэхэ эрэн; суолугар ситиһиилэнээччиттэн, уодаһыннааҕы торумнааччыттан долгуйума.

⁸Кыыһыраргын хааллар, уордайаргын уурат, кыйаханыма-тымтыма, ол куһаҕаҥҥа эрэ тиэрдиэҕэ.

⁹Тоҕо диэтэххэ, куһаҕаны оҥорооччулар имири эстиэхтэрэ, оттон АЙЫЫ ТОЙОҤҤО эрэнээччилэр сири бас билиэхтэрэ.

¹⁰Бэрт сотору хара дьайдаах киһи суох буолуоҕа, сылдьыбыт сирин көрүөҥ да, кинини булуоҥ суоҕа.

¹¹Оттон көрсүө-сэмэй дьон сири бас билиэхтэрэ, эйэлээх олоҕунан толору дуоһуйуохтара.

¹²Хара дьайдаах киһи кырдьыксыты утары сананар, кинини көрө-көрө тииһин хабырынар;

¹³ол эрэн АЙЫЫ ТОЙОН хара дьайдааҕы күлэр, күнэ-дьыла кэлэн эрэрин Кини көрөр.

¹⁴Кыраны-кыһалҕалааҕы өлөрөөрү, көнө суоллааҕы-иистээҕи өһөрөөрү, хара дьайдаахтар кылыстарын таһаараллар, ох сааларын кирсин тардаллар.

¹⁵Ол эрэн кылыстара бэйэлэрин сүрэхтэрин супту түһүөҕэ, ох саалара тосту барыаҕа.

¹⁶Көнө киһи кыра да баардааҕа мөкү дьон барҕа баайынааҕар ордук.

¹⁷Куһаҕаны оҥорооччулар күүстэрэ-уохтара мөлтүөҕэ, оттон көнө дьону АЙЫЫ ТОЙОН өйүөҕэ.

¹⁸АЙЫЫ ТОЙОН омсото суохтарга күннэтэ кыһаллыаҕа, кинилэр нэһилиэстибэлэрэ үйэлэргэ барыаҕа.

¹⁹Суостаах да кэмҥэ кинилэр кыбыстыахтара суоҕа, сут да кэмигэр аччыктаан ааһыахтара суоҕа.

²⁰Оттон хара дьайдаахтар өлүөхтэрэ, АЙЫЫ ТОЙОН өстөөхтөрө бараан сыатыныы ууллан сүтүөхтэрэ, буруо курдук суола суох симэлийиэхтэрэ.

²¹Нэгэй киһи иэс ылан баран төннөрбөт; оттон көнө киһи үтүө, кини бэринньэҥ илиилээх.

²²АЙЫЫ ТОЙОН алҕаабыт дьоно сири бас билиэхтэрэ, Кини кыраабыт дьоно имири эстиэхтэрэ.

²³АЙЫЫ ТОЙОН көнө киһи айанын суолуттан үөрэр, кини хардыытын өссө чиҥэтэн биэрэр.

²⁴Оннук киһи, дубук үктээбитин да иһин, охтуо суоҕа — АЙЫЫ ТОЙОН кинини илиититтэн тутуоҕа.

²⁵Мин эмиэ эдэр этим, билигин бу кырыйдым, ол тухары көрө иликпин Таҥара кырдьыксыты хаалларбытын, кини оҕолоро килиэп умналыылларын.

²⁶Кырдьыксыт өрүү дьэллэм, улгумнук иэс биэрэр; кини оҕолоро алгыс төрдө буолаллар.

²⁷Куһаҕантан тэйэ тутун, үтүөнү оҥор, оччоҕо эн үйэ тухары олоруоҥ.

²⁸АЙЫЫ ТОЙОН кырдьыгы таптыыр, Бэйэтин сибэтиэйдэрин Кини хаалларыа суоҕа. Кини кырдьыктаахтары үйэлэр тухары харыстыаҕа, оттон хара дьайдаахтар удьуордара быстыаҕа.

²⁹Көнө-көрсүө дьон сири бас билиэхтэрэ, онно үйэлэр тухары олоруохтара.

³⁰Кырдьыксыт киһи тыла-өһө ыллыктаах, кини этэрэ сиэрдээх.

³¹Таҥаратын Сокуона сүрэҕэр дириҥник иҥэн, кини хардыыта чиҥ.

³²Хара дьайдаах киһи кырдьыксыты маныыр, хайдах өлөрөрүн була сатыыр.

³³АЙЫЫ ТОЙОН кырдьыксыты киниэхэ биэриэ суоҕа, дьүүллүү да илтэхтэринэ, буруйдатыа суоҕа.

³⁴АЙЫЫ ТОЙОҤҤО эн эрэн, Кини суолун тутус, оччоҕо, сири бас билэриҥ туһугар, Кини эйигин үрдэтиэҕэ; Эн хара дьайдаахтар имнэри эстэллэрин көрүөҕүҥ.

³⁵Мин суостаах-суодаллаах бардам киһини көрөрүм, кини Ливан сыалаах маһыныы баараҕай этэ;

³⁶ол эрэн ааһан хаалбыта, суола суох сүппүтэ, көрдөөбүтүм да, мин кинини булбатаҕым.

³⁷Эн омнуота суох олохтоохтору көрөр буол, көнө-көрсүө дьонтон хараххын араарыма: эйэ-дэмнээхтэр удьуордара салҕанан барар.

³⁸Оттон буруйу оҥорооччу барыта эстиэҕэ, хара дьайдаахтар удьуордара быстыаҕа.

³⁹Көнө-көрсүө дьону АЙЫЫ ТОЙОН быыһыыр, күчүмэҕэй күннэригэр көмүскүүр;

⁴⁰АЙЫЫ ТОЙОН көмөлөһөн, кинилэри өрүһүйэр; Киниэхэ эрэнэллэрин иһин, хара дьайдаахтартан өрүһүйэр, быыһаан ылар.