Read Библия- Yakut Сааалтыр 38 Bible Online

Сааалтыр 38 - Библия- Yakut bible

Сааалтыр 38

¹Хуор салайааччытыгар Идифумҥа. Давид псалома.

²«Аньыыны саҥарбат туһугар, — диэбитим мин, — аны суолбун-ииспин кэтэниэм; аттыбар хара саҥнаах баарын тухары айахпын хам хатанан сылдьыам».

³Тылбыттан матаммын, ылы-чып бараммын, мин үтүөнү даҕаны саҥарбат буолбутум, оттон кутурҕаным өссө ордук дириҥээбитэ,

⁴сүрэҕим төлөннүү сирэлийбитэ; санаам-оноом уот кутаа буолбута.

⁵Дьэ онуоха мин хоммут уоспун хоҥнорбутум: «Этэн кулу дуу миэхэ, АЙЫЫ ТОЙОН, бүтэр уһукпун, олоҕум күнэ төһө ордубутун; үйэм хайдаҕын мин билиэхпин баҕарабын.

⁶Эн миэхэ биэрбит күнүҥ-дьылыҥ баара-суоҕа биир-икки сүөм эрэ буолуоҕа, мин үйэм Эн хараххар дуона суох. Чахчы даҕаны, киһи олоҕо сиккиэр тыал эрэ. Села

⁷Чахчы даҕаны, киһи күлүк курдук күлүгүлдьүйэр, туһата суохха сүпсүгүрэр, мунньар-мунньар да, онто кимиэхэ тиксэрин билбэт.

⁸Оттон билигин, Айыы Тойон, тугу кэтэһэбин? Эйиэхэ эрэ мин эрэнэбин.

⁹Бары буруйбуттан-сэмэбиттэн миигин өрүһүй, өйө суохтар күлүүлэригэр биэримэ.

¹⁰Бу Эн оҥорууҥ буоларын билэн, мин саҥарбаппын, уоспун сэгэтэ да барбаппын.

¹¹Оо, уурат миигин охсоргун, Эн охсор илиигиттэн ийэ этим илдьирийдэ.

¹²Эн киһини, аньыытын иһин дьарыйан, кини тугу күндүргэппитин барытын, үөн быһа сиэбит таҥаһыныы, эһэҕин; чахчы даҕаны, киһи диэн сиккиэр тыал эрэ. Села

¹³Иһит, АЙЫЫ ТОЙОН, мин үҥэрбин, болҕой мин энэлийэрбин; хараҕым уутун көрөн, саҥата суох киэр хайыһыма; Эйиэхэ мин ааһан иһэр ыалдьыт эрэ кэриэтэбин, бары өбүгэлэрим курдук, кэлии эрэ киһибин.

¹⁴Букатын барыам, суох буолуом иннинэ кыратык үөрүүнү билэ түһэрим туһугар, кытаанах хараххын миигиттэн араар».