Read Библия- Yakut Сааалтыр 39 Bible Online

Сааалтыр 39 - Библия- Yakut bible

Сааалтыр 39

¹Хуор салайааччытыгар. Давид псалома.

²АЙЫЫ ТОЙОҤҤО бигэтик эрэммитим иһин, Кини, миэхэ нөрүйэн, мин энэлгэммин иһиттэ.

³Иэдээннээх иинтэн миигин ороото, кутаҥнас кутаттан хостоото; таас үөһэ таһааран туруорда, хас хардыыбын бигэ оҥордо;

⁴Кини миэхэ саҥа ырыаны — Таҥарабытыгар айхал ырыатын ыллатта. Үгүстэр маны көрө дьулайыахтара, АЙЫЫ ТОЙОҤҤО эрэнэр буолуохтара.

⁵Ким АЙЫЫ ТОЙОҤҤО эрэнэр, киэмсиктэртэн, сымыйа таҥараларга туорааччылартан көмө көрдөспөт, ол дьоллоох.

⁶Элбэх да дьиктини, АЙЫЫ ТОЙОН Таҥарам, Эн оҥороҕун, элбэҕи да, биһиэхэ анаан, торумнуугун! Ким Эйиэхэ тэҥнэһиэҕэй! Төһө да ону иһитиннэрэ, кэпсии сатаабытым иһин, киһи барытын ситэн ааҕар кыаҕа суох.

⁷Сиэртибэни да, бэлэҕи-туһаҕы да Эн баҕарбатыҥ, ол оннугар миэхэ истэр кулгааҕы биэрдиҥ; бүтүннүү уматыллар сүөһүнү да, аньыы толугун да ирдээбэтиҥ.

⁸Онуоха эттим: «Мин бу баарбын; кинигэ түрбэтигэр мин туспунан суруллубут:

⁹Эн көҥүлгүн толоруохпун баҕарабын, Айыы Таҥарам; Эн Сокуонуҥ сүрэхпэр дириҥник иҥмит».

¹⁰Улуу түмсүүгэ мин иһитиннэрбитим Эн кырдьыккын, ону этэртэн туттумматаҕым — Эн билэҕин, АЙЫЫ ТОЙОН.

¹¹Сүрэхпэр Эн абыраллаах көмөҕүн кистээн сылдьыбатаҕым, Эн хайдахтаах эрэбилгин, быыһаан ыларгын кэпсиирим, Эн бигэ тапталгын уонна кырдьыккын улуу түмсүүттэн кистээбэтэҕим.

¹²АЙЫЫ ТОЙОН, хаһан да аҕыраабатын Эн миэхэ амарах сыһыаныҥ; миигин куруутун араҥаччылаатын Эн бигэ тапталыҥ, Эн кырдьыгыҥ.

¹³Иэнэ биллибэт иэдээн миигин иилээтэ; аньыым-харам сэтэ-сэлээнэ ситэн, мин тугу да көрбөт буоллум; буруйум-сэмэм баттаҕым ахсаанын баһыйан, эр санаам энчирээтэ.

¹⁴Үтүө санааҕыттан, АЙЫЫ ТОЙОН, миигин өрүһүйэн ыл, оо, АЙЫЫ ТОЙОН, тиэтэй миэхэ көмөлөһөргө.

¹⁵Ааттара алдьаннын, сурахтара суулуннун мин дууһабар турунааччылар; атахха биллэрэн күлүүгэ бардыннар миэхэ куһаҕаны баҕарааччылар;

¹⁶саакка киирэн уолуһуйдуннар миигин: «Кэһэй, кэһэй!» — диэн сэтэрээччилэр.

¹⁷Оттон Эйигин көрдөөччү барыта үөрдүн-көттүн, Эйигин булан, кини өрөгөйө үрдээтин; Эйиэхэ быыһатыан баҕарааччы куруутун: «АЙЫЫ ТОЙОН улуу!» — диир буоллун.

¹⁸Мин дьадаҥыбын, кыһалҕалаахпын, ол эрэн, миэхэ Айыы Тойон кыһаллар. Эн миэхэ көмөлөһөҕүн, мин Быыһааччым; оо, Айыы Таҥарам, бытаарыма!