Read Библия- Yakut Сааалтыр 44 Bible Online

Сааалтыр 44 - Библия- Yakut bible

Сааалтыр 44

¹Хуор салайааччытыгар. «Сардааналар» матыыптарынан. Корей уолаттарын үөрэтиитэ. Таптал ырыата.

²Сүрэхпиттэн кутуллар үтүөкэн тылларбын, ырыабын мин Ыраахтааҕыга аныыбын; мин тылым — түргэн суруксут бөрүөтэ.

³Эн хайа да киһитээҕэр кэрэҕин; тылыҥ-өһүҥ Эйиэнэ илгэлээх үтүөнэн аллар, ол курдук Таҥара Эйигин үйэлэргэ алҕаабыт.

⁴Сүҥкэн Күүстээх, кылыскын өттүккэр иилинэн, көрдөр кэрэмэн килбиэҥҥин, сүдү Бэйэҕин.

⁵Сүдү Бэйэҥ, аккын миинэн [12], кыайыы көтөллөөх айаннаа, кырдьыгы, көрсүө-сэмэй, көнө быһыыны көмүскээ; уҥа илииҥ Эйиэнэ сүҥкэн дьайыылары көрдөрүөхтүн.

⁶Эн оноҕосторуҥ сытыы уһуктаахтар — Ыраахтааҕы өстөөхтөрүн сүрэхтэригэр дьөлө киирэллэр; норуоттар атаҕыҥ анныгар самналлар.

⁷Эн бүрүстүөлүҥ, Айыы Таҥара, үйэттэн үйэҕэ турар; кырдьыгы өрө тутуу — Эн ыраахтааҕылыыр скипетрыҥ.

⁸Эн дьиҥ кырдьыгы таптыыгын, хара дьайыыны абааһы көрөҕүн. Ол иһин Айыы Таҥара, Эн Таҥараҥ, Эйигин, доҕотторгунааҕар өрө таһааран, үрдүк үөрүүнү тосхойор елей арыынан аҕаата;

⁹Эн таҥаһыҥ барыта мирра, алоэ уонна кассия сыттаах. Слон уҥуоҕа киэргэтиилээх дыбарыастартан арфа тыаһа намылыйан, Эн сүрэххин сылаанньытар.

¹⁰Эйигин арыаллыыр ытык дьахталлар ортолоругар ыраахтааҕылар кыргыттара бааллар; уҥа өттүгэр Офир кыһыл көмүһэ симэхтээх сарыысса турар.

¹¹Иһит эрэ, кыыһым, өйдөөн иһит мин эйиэхэ этэрбин: эн умун норуоккун, аҕаҥ алаһа дьиэтин,

¹²оччоҕо умсугуйуоҕа Ыраахтааҕы кэрэ бэйэҕэр. Кини эн Тойонуҥ, онон нөрүөн нөргүй Кини иннигэр.

¹³Тир норуота эйиэхэ бэлэҕин-туһаҕын аҕалыаҕа, дьон баайа-талбата эйигин бэйэтигэр тарда сатыаҕа.

¹⁴Ыраахтааҕы кыыһын кэрэ килбиэнэ — иһигэр; кини таҥаһа-саба кыһыл көмүс киэргэтиилээх.

¹⁵Дьэрэкээн ойуулаах таҥаһы таҥыннаран, кинини Ыраахтааҕыга илдьэллэр, кэнниттэн кыргыттары, дьүөгэлэрин, Эйиэхэ илдьэ бараллар.

¹⁶Үөрүү-көтүү, өрөгөй-талаан аргыстаах кэлэннэр, кинилэр Ыраахтааҕы дыбарыаһыгар киирэллэр.

¹⁷Аҕаларыҥ оннуларыгар уолаттарыҥ олоруохтара; Эн кинилэри сир устун кинээстэринэн туруортуоҥ.

¹⁸Эн ааккын мин көлүөнэттэн көлүөнэҕэ ааттатыам, норуоттар Эйигин үйэттэн үйэҕэ айхаллыахтара.