Read Библия- Yakut Сааалтыр 54 Bible Online

Сааалтыр 54 - Библия- Yakut bible

Сааалтыр 54

¹Хуор салайааччытыгар. Устурууналаах инструмент доҕуһуолунан. Давид үөрэтиитэ.

²Айыы Таҥара, иһит мин үҥэрбин; Эйигиттэн көрдөстөхпүнэ, киэр хайыһыма.

³Болҕойон иһит миигин уонна миэхэ хардар; мин, эрииргэ-буруурга түбэһэн, энэлийэн эрэбин; сүрэҕим мөҕүстэ

⁴өстөөх үөгүтүттэн, өһөгөйдөөх киһи күөмчүтүттэн; иэдээни кинилэр миэхэ тэрийэллэр, кырыктаах санааларыттан өһүрэллэр.

⁵Түөһүм иһэ тиҥиргэс буолла, өлөр куттала миигин хам ылла;

⁶куйахам күүрдэ, этим саласта, кутталбыттан уҥуоҕум барыта босхо барда.

⁷«Холууп курдук кынаттааҕым буоллар! — диэтим мин. — Хол дойдуга көтөн бараммын, уоскуйуом этэ;

⁸быдан дуолга быйаһыйан бараммын, бүччүм сирдэргэ хонуктуом этэ; Села

⁹хабараан тыалтан, добун буурҕаттан хахха булуна охсон хорҕойуом этэ».

¹⁰Аймаа кинилэри, Айыы Тойон, тыл-тылларын өйдөспөт гына; мин бу куоракка күөмчүнү уонна иирээни көрөбүн:

¹¹олор түүннэри-күннэри кини эркинин устун хаамаллар; онон бу дойдуну буруй буулаабыт, кыһалҕа кыпчыйбыт.

¹²Куоракка алдьархай ааҥнаабыт: атаҕастабыл уонна албыннааһын кини уулуссаларыттан арахпакка барбыт.

¹³Өстөөх миигин үөҕэр буолбатах, ону мин тулуйуом этэ; өһөгөйдөөҕүм бэрдимсийэр буолбатах, киниттэн син хорҕойуом этэ;

¹⁴бэйэм тэҥнээҕим — эн миигин үөҕэҕин, доҕорум, чугас киһим,

¹⁵эн-мин дэһэн истиҥник сэһэргэспит, Таҥара Дьиэтигэр көй дьоннуун аалласпыт аргыһым.

¹⁶Дьиэлэрин да, сүрэхтэрин да хара дьай булбутун иһин, итинниктэри өлөр өлүү буулаатын; үтүгэн түгэҕэр кинилэр тыыннаахтыы түстүннэр.

¹⁷Оттон мин Таҥараны ыҥырабын, АЙЫЫ ТОЙОН миигин быыһыаҕа.

¹⁸Киэһэлээх сарсыарда, күн ортото мин Киниэхэ энэлийэ үҥэбин, Кини мин саҥабын истиэҕэ.

¹⁹Төһө да үгүстэр миигин утары туруммуттарын иһин, Кини миигин сэрииттэн бүтүн таһаарыаҕа.

²⁰Айыы Таҥара истиэҕэ, үйэлэр иннилэриттэн бүрүстүөлгэ Олорооччу, Села уларыйбаттарын, Таҥараттан куттамматтарын иһин, уодьуганнарын тутуоҕа.

²¹Аргыһым иллээх дьонугар илиитин көтөхтө, түһэрсибит сөбүлэһиитин көтүрдэ.

²²Арыынан ньылҕарытар намыын саҥалааҕа да, дьиҥэр, сүрэҕэ өһүөн эбит; тыла-өһө елейдээҕэр сымнаҕаһа да, дьиҥэр, сыгынньах кылыс эбит.

²³Кыһалҕаҕын АЙЫЫ ТОЙОҤҤО сүктэр — Кини эйигин өйүөҕэ. Кырдьыксыты Кини хаһан да тулхадыттарыа суоҕа.

²⁴Айыы Таҥара, Эн хара дьайдаахтары дириҥ ииҥҥэ түһэртиэҥ; хаанымсахтар, уодаһыннаахтар үйэлэрин аҥаарыгар да тиийиэхтэрэ суоҕа. Оттон мин Эйиэхэ эрэнэбин.