Read Библия- Yakut Сааалтыр 64 Bible Online

Сааалтыр 64 - Библия- Yakut bible

Сааалтыр 64

¹Хуор салайааччытыгар. Давид псалома. Ырыа.

²Айхал ырыа Эйиэхэ ылланыахтаах, Айыы Таҥара, Сион хайатын үрдүгэр; Эйиэхэ бэриллибит андаҕар туолуохтаах.

³Оо, киһи үҥэрин-көрдөһөрүн Истээччи! Ким барыта Эйиэхэ кэлиэҕэ.

⁴Аньыылаах-харалаах дьайыыларбыт ыар сүгэһэрдии биһиэхэ ыйаннахтарына, Эн буруйбутун бырастыы гынаҕын.

⁵Эн, тиэргэҥҥэр олордоору талан ылан, Бэйэҕэр чугаһаппыт дьонуҥ дьоллоохтор. Эн Дьиэҥ, сибэтиэй Храмыҥ, илгэтэ биһигини дуоһутуоҕа.

⁶Айыы Таҥара Быыһааччыбыт, Эн кырдьыктаах буолаҥҥын, сөҕүмэр дьайыыларынан биһиэхэ хардараҕын; Эн сир бары уһуктарын, ыраах муоралар эрэллэрэ буолаҕын.

⁷Эн модун кыаххынан хайалары туруорбуккун, күүһүнэн-уоҕунан таһымныы туолбуккун.

⁸Муоралар ньиргиэрдэрин, барылас баалларын, норуоттар аймалҕаннарын Эн намыратаҕын.

⁹Эн дьикти бэлиэлэри көрдөрөҥҥүн, сир уһугар тиийэ дьулайаллар; илинтэн арҕааҥҥа диэри сөхтөрөҥҥүн, бэркиһээн саҥа аллайаллар.

¹⁰Сири көрөн-истэн, Эн кини утаҕын ханнараҕын, өҥсүтэн биэрэҕин, балысханнык байытаҕын. Таҥара өрүһэ толору уулаах. Эн дьоҥҥо бурдугу биэрээри, сирдэрин бэлэмниигин:

¹¹сухатын суолун уунан угуттуугун, оллурун-боллурун дэхсилиигин, самыыры түһэрэн сымнатаҕын, бурдугун үүнүүтүн алгыыгын.

¹²Уйгу-быйаҥынан дьылы маанылыыгын; Эн айаннаабыт суолгуттан арыы-сыа аллар.

¹³Кураайы мэччирэҥнэр чээл күөх кырыстаналлар, кэрискэ томтордор үөрүүнэн туолаллар.

¹⁴Хонууга барааннар мэччийэллэр, хочолор бурдугунан симэнэллэр. Туох барыта үөрэн, саҥа аллайар, туох барыта бииргэ ыллыыр-туойар.