Read Библия- Yakut Сааалтыр 67 Bible Online

Сааалтыр 67 - Библия- Yakut bible

Сааалтыр 67

¹Хуор салайааччытыгар. Давид псалома. Ырыа.

²Туран кэлиэхтин Таҥара, үрүө-тараа бардыннар Кини өстөөхтөрө; киэр куоттуннар Киниттэн бары Кинини абааһы көрөөччүлэр.

³Буруо симэлийэринии, Эн кинилэри симэлит; буоска уот суоһуттан уулларыныы, хара дьайдаахтар Таҥара суоһуттан өллүннэр.

⁴Оттон кырдьыксыттар үөрдүннэр; кинилэр өрөгөйдөрө Таҥара иннигэр үрдээтин, үөрэллэрэ-көтөллөрө үксээтин.

⁵Ыллааҥ Таҥараҕа, ыллааҥ Кини аатыгар; ырыанан айхаллааҥ былытынан Айаннааччыны — Кини аата АЙЫЫ ТОЙОН диэн — үөрүҥ Кини иннигэр.

⁶Тулаайахтар аҕалара, огдооболор судьуйалара — Таҥара Бэйэтин сибэтиэй Дьиэтигэр баар.

⁷Таҥара аҥаардастары ыал оҥорор, хаайыылаахтары байылыат олоххо таһаарар [17]; оттон бас бэриммэттэр кураайы дуолга хаалаллар.

⁸Айыы Таҥара, Эн норуотуҥ иннигэр түһэн барбыккар, кураайы дуолу уҥуордаабыккар, Села

⁹сир титирэстээбитэ, халлаан ууллан тохтубута — Таҥара, Синай Таҥаратын, иннигэр, Таҥара, Израиль Таҥаратын, иннигэр.

¹⁰Айыы Таҥара, Эн дэлэй ардаҕы түһэрэриҥ уоҕа тахсыбыт сиргэр, Эн Бэйэҥ кинини тилиннэрэриҥ.

¹¹Онно Эн норуотуҥ олохсуйбута; оо, Таҥара, Эн үтүө санааҕыттан дьадаҥылар кыһалҕаларын толуйбутуҥ.

¹²Айыы Тойон илдьит ыыппыта, ону, кыайыы сураҕын, элбэх дьахтар иһитиннэрбитэ:

¹³«Ыраахтааҕылар сэриилэрин кытта куоттулар, куоттулар!» Төһө да сүөһүлэрин далыттан ырааппаталлар, дьахталлар дьиэ-дьиэ аайы сэрии булдун — үрүҥ көмүһүнэн бүрүллүбүт кынаттаах, солотуулаах куорсуннаах холууптары үллэстэллэр.

¹⁵Күүстээхтэн Күүстээх онно ыраахтааҕылары үрэйбитигэр, Селмон хайата, хаар түспүтүнүү, кылбайбыта.

¹⁶Таҥара хайата, Васан хайата, элбэх өргөстөөх Васан хайата!

¹⁷Тоҕо эһиги ордугургуу көрөҕүт, элбэх өргөстөөх хайалар, Таҥара олохсуйуон баҕарар хайатын, АЙЫЫ ТОЙОН үйэлэр тухары олорор хайатын?

¹⁸Таҥара колесницата үтүмэн үгүс, сүүһүнэн тыһыынча; олор ортолоругар Айыы Тойон Синайга сибэтиэй Дьиэтигэр баар.

¹⁹Эн үөһэ тахсаргар, билиэн ылбыттаргын батыһыннаран барбытыҥ; итиэннэ, АЙЫЫ ТОЙОН Таҥара онно олорорун туһугар, дьонтон, утарыласпыттартан кытта, бэлэх-туһах ылбытыҥ.

²⁰Алгыс буоллун Айыы Тойоҥҥо! Кини күнтэн күн биһиги сүгэһэрбитин сүгэр; Айыы Таҥара — биһиги Быыһааччыбыт. Села

²¹Биһиги Таҥарабыт — быыһабыллаах Таҥара; ТАҤАРА [18] Айыы Тойон, өлүү айаҕыттан өрүһүйэр былаастаах.

²²Ол эрэн Таҥара тобулу охсуоҕа өстөөхтөрүн оройдорун, аньыыга-хараҕа ылларбыттар арбаҕар бастарын.

²³Айыы Тойон эппитэ: «Мин кинилэри Васантан төттөрү аҕалыам, муора түгэҕиттэн таһаарыам,

²⁴оччоҕо эн кинилэр хааннарын кэһиэҕиҥ, ыттарыҥ эмиэ бэйэлэрин өлүүлэригэр тиксиэхтэрэ».

²⁵Айыы Таҥара, ким барыта көрөр Эйигин — Эн, мин Таҥарам, Ыраахтааҕым, сибэтиэй Дьиэҕэр киирэр өрөгөйдөөх хаамыыгын.

²⁶Инники ырыаһыттар иһэллэр, кинилэр кэннилэриттэн — музыканнар, ортолоругар тимпаннаах кыргыттар бааллар.

²⁷«Улуу түмсүүгэ алҕааҥ Таҥараны, АЙЫЫ ТОЙОНУ, Израиль тымыр-сыдьааннара!»

²⁸Бастакынан Вениамин, саамай балыстара, иһэр, онтон Иуда кинээстэрэ бөлөхтөһөн иһэллэр; Завулон кинээстэрэ, Неффалим кинээстэрэ эмиэ бааллар.

²⁹Таҥараҥ эйигин күүстээх буолар аналлаабыта. Биһиэхэ урут көрдөрөрүҥ курдук, Айыы Таҥара, билигин эмиэ күүскүн көрдөр.

³⁰Иерусалимҥа баар Храмыҥ туһугар, ыраахтааҕылар Эйиэхэ бэлэхтэрин аҕалыахтара.

³¹Сыһыт тростникка бүгэн сытар дьиикэй кыыллары, ньирэй норуоттар ортолоругар баар оҕус үөрүн; илдьи тэбис түһээн хомуйуохтарын баҕарааччылары, уҥа-хаҥас ыһаттаа сэриинэн суудайар норуоттары.

³²Оччоҕо Египеттэн илдьиттэр кэлиэхтэрэ, Эфиопия Таҥараҕа икки илиитин уунуоҕа.

³³Сир саарыстыбалара, ыллааҥ Таҥараҕа, ырыанан айхаллааҥ Айыы Тойону, Села

³⁴халлааннар устун, былыргы халлааннар устун айаннааччыны. Истиҥ, Кини куолаһа, Кини күүстээх куолаһа ньиргийэр!

³⁵Айхаллааҥ Таҥара албан аатын. Кини Израиль үрдүнэн улуу былаастаах, Кини халлааннар үрдүлэринэн модун кыахтаах.

³⁶Дьулаан да буоллаҕа Таҥара Бэйэтин сибэтиэй Дьиэтигэр! Кини, Израиль Таҥарата, норуотун бөҕөргөтөр, киниэхэ күүс-уох киллэрэр. Алгыс буоллун Таҥараҕа.