Read Библия- Yakut Сааалтыр 68 Bible Online

Сааалтыр 68 - Библия- Yakut bible

Сааалтыр 68

¹Хуор салайааччытыгар. «Сардааналар» матыыптарынан. Давид псалома.

²Быыһаа миигин, Айыы Таҥара, уу моонньубунан буолла.

³Дириҥ кутаҕа түһэммин, тирэхпин сүтэрдим; чөҥөрө чүөмпэҕэ киирэммин, буруукка эрийтэрдим.

⁴Үөгүлүүрбүттэн сэниэм эһиннэ, куолайым куура хатта; хараҕым сылайыар диэри мин Таҥарабын кэтэстим.

⁵Буруйа суоҕум үрдүнэн абааһы көрөөччү баттахпынааҕар элбээтэ, миигин өлөрүөх-өһөрүөх үксээтэ; өстөөхтөрүм туох да төрүөтэ суох үөҕэллэр, былдьаабатахпын кытта биэрэргэ күһэйэллэр.

⁶Айыы Таҥара, Эн билэҕин мин өйө суох быһыыбын, мин буруйбун-аньыыбын Эн курдат көрөҕүн.

⁷Эйиэхэ эрэнээччилэртэн ким да мин туспуттан сааппатын, Айыы Тойон, Аанньал сэриитин Таҥарата; Эйигин көрдөөччүлэртэн ким да мин туспуттан кытарбатын, Израиль Айыы Таҥарата;

⁸Эн тускар мин кириэтэнэ сылдьабын, сааты-сууту тулуйабын.

⁹Туора киһи буоллум бырааттарбар, тастыҥ киһи буоллум ийэм уолаттарыгар.

¹⁰Эн Дьиэҕэр тапталым миигин уоттуу сиэтэ, Эйигин үөҕээччилэр үөҕүүлэрэ миэхэ түстэ.

¹¹Астан туттунан дууһабын сыһытаммын, мин кинилэртэн хоруотанар буоллум.

¹²Кутурҕан таҥаһын таҥнаммын, мин кинилэргэ өс домоҕо буоллум.

¹³Куорат ааныгар олорооччулар миигин ырыталлар, арыгыһыттар миигин ырыанан ыыстыыллар.

¹⁴Оттон мин Эйиэхэ үҥэбин, АЙЫЫ ТОЙОН; тоҕоостоох кэмҥэ, Айыы Таҥара, улуу амарах санааҕыттан миигин иһит; эрэллээх көмөҕүнэн

¹⁵миигин быыһаан ыл кута куртаҕар түһэртэн; өрүһүй өстөөхтөрбүттэн, бу чөҥөрүйэр чүөмпэттэн.

¹⁶Бурулҕаҥҥа миигин эрийтэримэ; дьөлөркөй чүөмпэ миигин ыйыстыбатын, иин айаҕа үрдүбэр сабыллыбатын.

¹⁷Амарах тапталлаах АЙЫЫ ТОЙОН, миэхэ хардар, улуу аһыныгас санааҕыттан миэхэ хайыс.

¹⁸Киэр эргиллимэ кулуккуттан, тиэтэй миигин истэргэ — мин иэдээҥҥэ түбэстим.

¹⁹Чугаһаа мин дууһабар, миигин быыһаан ыл; өстөөхтөрбүттэн өрүһүй.

²⁰Эн билэҕин миигин хайдах үөҕэллэрин, мин сааппын-сууппун, кыбыстыыбын; өстөөхтөрбүн Эн барыларын көрөҕүн.

²¹Үөҕүүлэрэ сүрэхпин хайытта, бүтүн бэйэбин алларытта; аһыныы күүппүтүм да, ким да аһыммата, өйөбүл көрдөөбүтүм да, ким да өйөөбөтө.

²²Аһылык оннугар миэхэ дьааты кутан биэрдилэр, утаппыппар, уксууһу иһэртилэр.

²³Олорор остуоллара бэйэлэригэр оҕуур буолуохтун, уоскулаҥнаах олохторо угаайыга кубулуйуохтун;

²⁴көрөр харахтара көрбөт буола түүппэҕирдин, хаамар атахтара хаампат буола мөлтөөтүн.

²⁵Абаҕын-сатаҕын Эн кинилэргэ тоҕо сүөкээ, уоҕуҥ-кылыныҥ уотунан Эн кинилэри күөйтэлээ.

²⁶Олорор түөлбэлэрэ иччитэхсийдин, отууларыгар имириир тыыннаах орпотун.

²⁷Эн самнарбыт дьоҥҥун кинилэр эккирэтэллэр, Эн бааһырпыт дьонуҥ эрэйин элбэтэн биэрэллэр.

²⁸Буруйдарыгар буруйда эбэн ис; Эн бырастыы гынаргын билбэтиннэр.

²⁹Кинилэр ааттара Олох Кинигэтиттэн сотулуннун, кырдьыксыттары кытары онно бииргэ суруллубатын.

³⁰Оттон мин, баттанан-үктэнэн, эрэйи көрө сылдьабын; Эн көмөҥ, Айыы Таҥара, миигин араҥаччылыахтын.

³¹Таҥара аатын мин ырыабынан айхаллыам, уруй-айхал тылынан Кинини уруйдуом;

³²ол АЙЫЫ ТОЙОҤҤО бэримньи оҕустааҕар, муостаах-туйахтаах кунаннааҕар ордук сөбүлэтиэҕэ.

³³Эрэйгэ-муҥҥа түбэспиттэр ону үөрэ көрүөхтэрэ; эрдийдин эһиги сүрэххит, Таҥараны көрдөөччүлэр.

³⁴АЙЫЫ ТОЙОН кыһалҕалаахтары истэр, хаайыыга бохсуллубут дьонун умнубат.

³⁵Айхаллаатыннар Кинини халлааннар уонна сир, байҕал уонна онно баар хамсыыр харамай барыта.

³⁶Таҥара Сиону быыһаан ылыаҕа, Иуда куораттарын чөлүгэр түһэриэҕэ; оччоҕо онно Кини норуота барытын бас билэн олоруоҕа;

³⁷Кини кулуттарын оҕолоро ону нэһилиэстибэҕэ ылыахтара, онно Кини аатын таптыыр дьон олохсуйуохтара.