Read Библия- Yakut Сааалтыр 74 Bible Online

Сааалтыр 74 - Библия- Yakut bible

Сааалтыр 74

¹Хуор салайааччытыгар. «Өлөрүмэ» матыыбынан. Асаф псалома. Ырыа.

²Айхаллыыбыт Эйигин, Айыы Таҥара, айхаллыыбыт Эйигин; Эн аатыҥ биһиэхэ чугас. Дьон Эн оҥорор дьикти дьайыыларгын иһитиннэрэр.

³«Мин Бэйэм болдьообут туһааннаах кэммэр кырдьыгы тутуһан дьүүллүөҕүм.

⁴Сир уонна сир олохтоохторо бары тулхадыйар кэмнэригэр Мин бигэтик тутабын сир төрдүн. Села

⁵Киһиргэстэргэ этэбин: „Киһиргэнимэҥ“, нэгэйдэргэ этэбин: „Үрдүктүк сананымаҥ,

⁶аһара үрдүктүк сананымаҥ, хантаччы туттан саҥарымаҥ“».

⁷Киһини илинтэн да, арҕааттан да, соҕурууттан [20] да үрдэтэр буолбатахтар,

⁸биир эрэ судьуйа баар — Айыы Таҥара: Кини кими эрэ намтатар, кими эрэ үрдэтэр.

⁹АЙЫЫ ТОЙОН иһит тутан турар, онно арыгы булкааһа күүгэннирэ оргуйар; Кини онтон кутаттаан биэрдэҕинэ, сир үрдүн хара дьайдаахтара бука бары иһиэхтэрэ, доруоһатын кытта ыган туран иһэргэ күһэллиэхтэрэ.

¹⁰Оттон мин үйэм тухары үөрүөм-көтүөм, Иаков Таҥаратыгар айхал ыллыам.

¹¹Кини хара дьайдаахтар муостарын барытын булгурутуо, оччоҕо кырдьыксыт күүһүрүө-уоҕуруо.