Read Библия- Yakut Сааалтыр 79 Bible Online

Сааалтыр 79 - Библия- Yakut bible

Сааалтыр 79

¹Хуор салайааччытыгар. «Кэс Тыл сардаанатын» матыыбынан. Асаф псалома.

²Оо, иһит биһигини, Израиль Маныыһыта, Иосиф уолаттарын бараан үөрүнүү сирдээччи! Херувимнар үрдүлэринэн бүрүстүөлгэ олорооччу, Эн Бэйэҥ сырдыккынан сыдьаай

³Ефрем, Вениамин уонна Манассия аҕа уустарын; итиэннэ, сүдү күүскүн көрдөрөн, биһигини быыһыы кэл.

⁴Айыы Таҥара, биһигини чөлбүтүгэр түһэр! Эн сирэйиҥ сырдыга биһиэхэ сыдьаайыахтын, оччоҕо биһиги быыһаныахпыт.

⁵АЙЫЫ ТОЙОН, Аанньал сэриитин Таҥарата, Эн хаһааҥҥа диэри уордайан, норуотуҥ үҥэрин истибэккин?

⁶Көмүскэ уутун килиэбин Эн кинилэргэ сиэттиҥ, харах дэлэй уутун утах кэриэтэ иһэртиҥ.

⁷Ыалларбытын, биһигини былдьаһыннаран, иирсиһиннэрдиҥ, онон биһиги өстөөх күлүүтүгэр бардыбыт.

⁸Аанньал сэриитин Таҥарата, биһигини чөлбүтүгэр түһэр! Эн сирэйиҥ сырдыга биһиэхэ сыдьаайыахтын, оччоҕо биһиги быыһаныахпыт.

⁹Эн Египеттэн виноград умнаһын аҕалаҥҥын, ону, омуктары үүрэн баран, кинилэр сирдэригэр олорпутуҥ.

¹⁰Киниэхэ сир солообутуҥ, онон силис тардан, тарҕана үүнэн барбыта.

¹¹Хайалар улам кини күлүгэр киирэн барбыттара, сыалаах улуу мастар кини лабааларыгар саспыттара.

¹²Онтон аны лабааларын муораҕа тиийэ уунан, чэчирдэрин Евфрат өрүскэ диэри тэниппитэ.

¹³Дьэ уонна тоҕо Эн кини бүтэйин үрэйдиҥ? Билигин ааһар эрэ барыта отонун турута тыытар.

¹⁴Дьиикэй сибиинньэ киирэн тэпсэр, хонуу кыыла-сүөлэ кирэн сиир.

¹⁵Аанньал сэриитин Таҥарата, биһиэхэ төнүн; Халлаантан аллара көр, барытын анаар, бу умнаскын көр-иһит:

¹⁶уҥа илиигинэн олорпуккун харыстаа, Бэйэҕэр бөҕөргөппүт үнүгэскин араҥаччылаа.

¹⁷Кинини, кэрдэн ылан, уоттаан кэбиспиттэр, норуотуҥ Эн суостаах көрүүгүттэн өлөн эрэр.

¹⁸Оо, көмүскээ Эн уҥа өттүгэр турааччыны, Бэйэҕэр анаан бөҕөргөппүт киһигин.

¹⁹Биһиги аны хаһан да Эйигиттэн тэйиэхпит суоҕа; Эн ааккын ыҥырарбыт туһугар, биһигини тилиннэр.

²⁰АЙЫЫ ТОЙОН, Аанньал сэриитин Таҥарата, биһигини чөлбүтүгэр түһэр; Эн сирэйиҥ сырдыга биһиэхэ сыдьаайыахтын, оччоҕо биһиги быыһаныахпыт.