Read Библия- Yakut Сааалтыр 9 Bible Online

Сааалтыр 9 - Библия- Yakut bible

Сааалтыр 9

¹Хуор салайааччытыгар. Альмут Лаббен [5] матыыбынан. Давид псалома.

²АЙЫЫ ТОЙОНУ мин айхаллыам бүтүн сүрэхпинэн, Эн бары дьикти дьайыыгын иһитиннэриэм.

³Эйигиттэн үөрүөм-көтүөм, өрөгөйдүөм, Эн ааккар ыллыам, оо, Үрдүктэн Үрдүкү.

⁴Өстөөхтөрүм тэскилээн иһэннэр, сүһүөхтэрин сүтэрдилэр, Эн көрөн турдаххына кинилэр өллүлэр.

⁵Мин кырдьыктаах дьыалабын Эн көмүскээтиҥ; Эн бүрүстүөлгэр олордуҥ, кырдьыгы көрөр Судьуйа.

⁶Омуктары дьарыйтаатыҥ, хара дьайдааҕы өлөрдүҥ, кинилэр ааттарын үйэлэргэ күөрэйбэттии өһөрдүҥ.

⁷Өстөөх бүтэһиктээхтик хоттордо, кинилэр куораттарын Эн урусхал оҥордуҥ, ким да аны кинилэри өйдүү-саныы сылдьыа суоҕа.

⁸Оттон АЙЫЫ ТОЙОН үйэлэр тухары ыраахтааҕылыыр; Кини дьүүллүүр бүрүстүөлүн бэлэмнээн турар.

⁹Кини аан дойдуну кырдьыктаахтык дьүүллүөҕэ, бары норуоттары көнөтүк дьүүллүөҕэ.

¹⁰АЙЫЫ ТОЙОН — баттаммыттар халыҥ хаххалара, кутурҕаннаах кэмнэригэр суон дурдалара.

¹¹АЙЫЫ ТОЙОН, Эйигин көрдөөччүлэри хаалларбатыҥ иһин, Эн ааккын билэр дьон Эйиэхэ эрэнэллэр.

¹²Ыллааҥ Сиоҥҥа олорор АЙЫЫ ТОЙОҤҤО айхал ырыаларын, норуоттар ортолоругар иһитиннэриҥ Кини дьайыыларын.

¹³Кини, хаан тохтуутун иэстэһээччи, эрэйи көрбүттэри өйдүү-саныы сылдьар, кинилэр энэлгэннэрин умнубат.

¹⁴Абыраа-аһын, АЙЫЫ ТОЙОН, абааһы көрөөччүлэртэн мин хайдах эрэйдэнэрбин көр; Эн бары килбиэннээх дьайыыгын Сион кыыһын олбуорун ааныгар иһитиннэрэрим туһугар, Эн миигин өлүү айаҕыттан өрүһүйэҕин; Эйиэхэ быыһатан, мин өрөгөйдүөҕүм.

¹⁶Омуктар бэйэлэрэ хаспыт оҥкучахтарыгар түстүлэр, кистээн оҥорбут угаайыларыгар түбэстилэр.

¹⁷АЙЫЫ ТОЙОН, көнөтүк дьүүллээн, Бэйэтин биллэрдэ, оттон нэгэйи аньыылаах дьайыыта дэҥ үктэттэ. Хиггайон

¹⁸Үтүгэн түгэҕэр дьүгэлийиэхтэрэ мөкү быһыылаахтар, Таҥараны умнар бары норуоттар.

¹⁹Кыһалҕалаах букатыннаахтык умнуллуо суоҕа, дьадаҥы эрэлэ бүтэһиктээхтик умуллуо суоҕа.

²⁰Оо, тур, АЙЫЫ ТОЙОН! Өлөр үйэлээхтэр өрөгөйдөөбөтүннэр, норуоттар Эн иннигэр кэлэн дьүүллэнниннэр.

²¹Толуннар кинилэри, АЙЫЫ ТОЙОН; норуоттар биллиннэр: кинилэр баара-суоҕа дьоннор эрэ. Села

²²АЙЫЫ ТОЙОН, тоҕо Эн ыраах тураҕын? Тоҕо кутурҕан кэмигэр көстүбэт буолаҕын?

²³Улуутумсуйан, бардамнар дьадаҥыны кыһарыйаллар — уодаһыннаах угаайыларыгар бэйэлэрэ түбэстиннэр.

²⁴Хара саҥнаахтар сүрэхтэрин имэҥинэн киһиргэнэллэр, харамнар АЙЫЫ ТОЙОНУ холуннараллар, киэр анньаллар.

²⁵Бэрдимсийэн, нэгэй киһи Таҥараны аахайбат: ирдиэ суоҕа диир, санаата барыта Таҥара суох диэн.

²⁶Хайа да кэмҥэ кини дьыалата-куолута табыллар; Эн дьүүлүҥ киниэхэ аһары ыраах, көстүбэт; кини өстөөҕүн барытын күөнүн аннынан көрөр.

²⁷Иһигэр туох да биһигини түөрэҥнэтиэ суоҕа, хайа да көлүөнэҕэ эрэйи-буруйу көрсүөхпүт суоҕа диир.

²⁸Айаҕын иһэ толору — кырыыс, албын-көлдьүн, суоһурҕаныы; тылын анна барыта — өһөгөй, үөҕүү-таныйыы.

²⁹Кини, тоһуур оҥорон, онно саһан олорор, бүөм сиргэ түбэһиннэрэн, буруйа суоҕу өлөрөр; кини хараҕа көмүскэлэ суоҕу кэтиир.

³⁰Ордуутугар саспыт хахайдыы, хаххаҕа сытан манаһар, дьадаҥыны тутардыы, тоһууругар кини саһар; уонна, киһини харбаан ылан, илимигэр соһон барар.

³¹Булдун сууһаран, анныгар хам баттыыр, дэгиэ тыҥыраҕынан дьадаҥыны тыын салгыыр.

³²«Таҥара умунна, — диир кини иһигэр, — сирэйин кистии тутунна, хаһан да маны көрүө суоҕа».

³³Оо, тур, АЙЫЫ ТОЙОН; охсор илиигин көтөх, Айыы Таҥара; умнума баттаммыттары.

³⁴Тоҕо нэгэйдэр Таҥараны билиммэттэрий, истэригэр Эйигин ирдэһиэ суоҕа дииллэрий?

³⁵Эн барытын көрөҕүн; тус Бэйэҥ илиигинэн төлөөрү, атаҕастабылы, күөмчүлээһини бэлиэтии көрөҕүн; дьадаҥы олоҕун Эйиэхэ эрэнэр; тулаайахха Эн көмөлөһөҕүн.

³⁶Оо, тоһут хара дьайдаах, хатааннаах киһи илиитин, кини дьайын, көрдөөн да булбатыҥ курдук, симэлит.

³⁷АЙЫЫ ТОЙОН — өрүүтүн, үйэлэр тухары Ыраахтааҕы; Таҥараны итэҕэйбэт омуктар Кини сириттэн сүтүөхтэрэ.

³⁸АЙЫЫ ТОЙОН, Эн истиэҕиҥ сэмэйдэр баҕаларын, бөҕөргөтүөҕүҥ кинилэр санааларын; аны биир да киһи сир үрдүгэр куттаабатын туһугар, тулаайах, баттаммыт кырдьыгын көмүскээри, Эн болҕойуоҕуҥ кинилэр көрдөһүүлэрин.