Read Библия- Yakut Сааалтыр 91 Bible Online

Сааалтыр 91 - Библия- Yakut bible

Сааалтыр 91

¹Псалом. Субуотаҕа ылланар ырыа.

²Үчүгэй даҕаны АЙЫЫ ТОЙОНУ айхаллыыр, Үрдүктэн Үрдүк, Эн ааккар ырыа ыллыыр,

³сарсыарда Эн бигэ тапталгын биллэрэр, түүнүн эмиэ Эн кырдьыккын иһитиннэрэр,

⁴уон устурууналаах лютнаҕа доҕуһуоллатар, арфалаах лираҕа ырыа таһаарар!

⁵Үөртүҥ да Эн миигин, АЙЫЫ ТОЙОН, сүдү дьайыыгынан; Эн илииҥ айбытын көрөммүн, мин үөрэн ыллыыбын.

⁶Улуу да буоллахтара, АЙЫЫ ТОЙОН, Эн дьайыыларыҥ, дириҥ да буоллахтара Эн санааларыҥ!

⁷Кэр-дьэбэр киһи ону билиммэт, ньүдьү-балай өйдөөбөт.

⁸Төһө да нэгэйдэр сыыс от курдук үүммүттэрин, кэрээнэ суохтар чэчирээбиттэрин иһин, кинилэр букатыннаахтык сүтэр аналлаахтар,

⁹оттон Эн, АЙЫЫ ТОЙОН, үйэлэр тухары үрдүккүн.

¹⁰Эн өстөөхтөрүҥ, АЙЫЫ ТОЙОН, Эн өстөөхтөрүҥ имнэри эстиэхтэрэ, куһаҕаны оҥорооччулар бары үрэллиэхтэрэ.

¹¹Оттон миигин Эн дьиикэй оҕустуу күүһүртүҥ, сибиэһэй елей арыытынан аҕаатыҥ.

¹²Илэ харахпынан мин көрдүм өһөгөйдөөхтөрүм өһөллөрүн, эт кулгаахпынан иһиттим кырыктаах өстөөхтөрүм өлөллөрүн.

¹³Кырдьыктаах киһи пальма курдук силигилиир, Ливан сыалаах маһын курдук чэчириир.

¹⁴Кини, АЙЫЫ ТОЙОН Дьиэтигэр олордуллан, Таҥарабыт тиэргэнигэр чэлгийэ үүнэр.

¹⁵Кырдьан да баран, кини ас биэрэ туруоҕа, киил бэйэлээх, чэгиэн буолуоҕа;

¹⁶онтон көстүөҕэ АЙЫЫ ТОЙОН кырдьыктааҕа, Кини, мин очуос хайам, кыра да омсото суоҕа.