Read Библия- Yakut Соломуон аман өһө 1 Bible Online

Соломуон аман өһө 1 - Библия- Yakut bible

Соломуон аман өһө 1

¹Давид уолун, Израиль ыраахтааҕытын Соломуон аман өһө

²эһигини муудараска, үтүөҕэ үөрэтэн-такайан, бэргэн этиилэр дириҥ ис номохторун арыйан,

³олоххутун оттомноохтук олорорго уһуйуо, көнө, кырдьыксыт, ыраас сүрэхтээх буоларгытыгар көмөлөһүө.

⁴Оччоҕо ким кэнэн, ол имигэс өйдөнүө, ким эдэр, ол үөрэнэн, уһуну-киэҥи толкуйдуо;

⁵муударай да истэн, билиитэ эбии дириҥиэ; мындыр киһи сөптөөх сүбэни-аманы булан ылан,

⁶аман өһү, тэгилитиилээх этиилэр суолталарын, өркөн өйдөөхтөр тылларын тамаҕын, таайтарбыт таабырыннарын ырыҥалыа.

⁷АЙЫЫ ТОЙОҤҤО [1] ытыктабыл — бу баар билии-көрүү төрдө! Муудараһы, сиэрдээх сүбэни-аманы арай акаарылар аахайбаттар.

⁸Уолум, аҕаҥ сүбэлээн этэрин иһит, ийэҥ үөрэппит үөрэҕин сиргэ-буорга кэбиһимэ.

⁹Төрөппүттэриҥ сүбэтэ төбөҕөр кэтэр үтүөкэн бөнүөгүҥ, моонньугар иилинэр кылдьыы киэргэлиҥ буолуохтун.

¹⁰Тоойуом, аньыылаахтар эйигин куһаҕаҥҥа кучуйа сатаатахтарына, эн кинилэргэ киирэн биэримэ.

¹¹«Биһигини кытта барыс, — диэн уккуйуохтара. — Тоһуур оҥорон уу субай хааннарын тоҕуохпут, көр-оонньуу кэриэтэ буруйа суохтары көһүтүөхпүт!

¹²Өлүү айаҕа буоламмыт, кинилэри тыыннаахтыы ыйыстыахпыт, өлүөхсүттэри мэҥиэстэр иин курдук, бүтүннүү мэҥиэстиэхпит.

¹³Эҥин-эгэлгэ күндү баайы-малы булунуохпут, былдьаан-талаан ылан, дьиэбитин-уоппутун толоруохпут.

¹⁴Эн биһигини кытта бииргэ түөрэх кэбиһиэҥ, булумньубутун тэҥҥэ үллэстиэҥ!»

¹⁵Уолум, куһаҕан дьоннуун куодарыһыма, кинилэр ыллыктарын ыырданыма:

¹⁶хара дьайдаахтар алдьархайы тардаары сырсаллар, киһи хаанын тоҕоору тиэтэйэллэр.

¹⁷Көтө-дайа сылдьар үөр чыычаах көрөрүгэр кинилэргэ доҕуур иитэн көдьүүһүрбэккин эбээт;

¹⁸син ол кэриэтэ ороспуойдар эмиэ, тоһуур оҥоробут диэн, бэйэлэрэ өлөллөрүн оҥостоллор.

¹⁹Босхоҕо суудайааччы суола ити курдук муҥурданыаҕа: былдьаан-талаан ылабын диэн, былаҕайга былдьаныаҕа.

²⁰Дириҥ муударас [2] саҥата уулуссаҕа эҥсиллэр, дорҕоонноох куолаһа болуоссаттарга дуораһыйар;

²¹кини дьон-сэргэ тоҕуоруйар сиригэр кэлэн ыҥырар, куорат олбуорун айаҕар туран этэр:

²²«Хаһааҥҥа диэри, ньүдьү-балайдар, хараҥаны ордороҕут, кэрээнэ суохтар, муудараһы күлүү-элэк оҥостоҕут, өйө суохтар, билиини абааһы көрөҕүт?

²³Болҕойуҥ мин сэмэлиир саҥабын: билигин мин ис санаабын эһиэхэ биллэриэм, этэр тылбын иһитиннэриэм.

²⁴Эһигини ыҥырарым да, эһиги миигиттэн киэр хайыспыккыт, илиибин утары уунарым да, миигин хайаҕыт да аахайбатаххыт.

²⁵Мин биир да сүбэбин-амабын сэргээбэтэххит, сэмэлээн этэрбин сэҥээрбэтэххит.

²⁶Дьэ ол иһин мин эмиэ, иэдээҥҥэ түбэстэххитинэ, бэйэҕитин күлүөҕүм, улуу кутталга ыллардаххытына, бэйэҕитин оонньуу оҥостуоҕум.

²⁷Аан алдьархай ала буурҕалыы ытыйдаҕына, улуу куттал добун холоруктуу бурайдаҕына, кыһалҕаҕа ылларан, кыһарҕаҥҥа ыктаран,

²⁸миигин ыҥырыаххыт да, мин хардарыам суоҕа, миигин көрдүү сатыаххыт да, булуоххут суоҕа.

²⁹Дьэ онон, эһиги билиини абааһы көрбүккүт, АЙЫЫ ТОЙОҤҤО бас бэриниэххитин баҕарбатаххыт,

³⁰мин сүбэлиирбин-амалыырбын ылымматаххыт, өйдөтөн эппиппин барытын кэспиккит сэтигэр

³¹айбардаабыт аньыыгыт бэйэҕитин аймыаҕа, куомуннаспыт куһаҕаҥҥыт бэйэҕитин буулуоҕа,

³²тоҕо диэтэххэ, ньүдьү-балайдар өһөстөрүгэр өлөллөр, акаарылар аахайбакка алдьаналлар.

³³Оттон ким миигин истэр, ол холкутук олоруоҕа — кини туох да куһаҕантан куттаныа суоҕа».