Read Библия- Yakut Соломуон аман өһө 2 Bible Online

Соломуон аман өһө 2 - Библия- Yakut bible

Соломуон аман өһө 2

¹Уолум! Өскөтүн мин этэрбин ылынан, кэскиллээх кэс тылбын куккар-сүргэр иҥэрэн,

²муударас үөрэҕин өйдөөн-дьүүллээн иһиттэххинэ, уһуну-киэҥи томоонноон толкуйдаатаххына;

³өскөтүн бэйэҕэр билиини-көрүүнү ыҥыран, өйдүүр өйү-мэйиини көрдөһөн,

⁴муудараһы, үрүҥ көмүһү курдук, дьүлүйэн көрдөөтөххүнэ, кылааты курдук, кыһаллан була сатаатаххына,

⁵АЙЫЫ ТОЙОҤҤО ытыктабыл диэн тугун толору өйдүөҕүҥ, Таҥараны билэр киһи буолуоҕуҥ.

⁶Тоҕо диэтэххэ, муудараһы АЙЫЫ ТОЙОН биэрэр, билэр-көрөр, өйдүүр дьоҕур эмиэ Киниттэн кэлэр.

⁷АЙЫЫ ТОЙОН көнө сүрэхтээхтэри өрүһүйэрдии өрүү бэлэм турар, Кини омнуота суох олохтоохторго дурда-хахха буолар,

⁸кырдьыксыттар ыллыктарын араҥаччылыыр, итэҕэллээхтэрин суолун-ииһин хараанныыр.

⁹Дьэ онтон эн көнө, кырдьыктаах, сиэрдээх быһыыны, бары үтүө суолу өйдүүр кыахтаныаҕыҥ.

¹⁰Ол курдук муударас эн сүрэххэр дириҥник иҥиэҕэ, билии-көрүү дууһаҕын дуоһутуоҕа.

¹¹Оччоҕо ырааҕы анаарар кыаххар араҥаччылатан, үтүөнү-мөкүнү араарар өйгөр харыстатан,

¹²эндирдээх суолтан-иистэн, дьон оҕуруктаах тылыттан-өһүттэн быыһаныаҕыҥ;

¹³көнө суолтан туораан тахсан ыас хараҥа ыллыктары ыырданар,

¹⁴сиэхситтии кэбилэнэн үөрэр-көтөр, куһаҕаны оҥорон, содурдук быһыыланан дуоһуйар,

¹⁵токур суоллары тутуһар, албын суолу-ииһи батыһан мунар-тэнэр бөтөстөртөн көмүскэллээх буолуоҕуҥ.

¹⁶Дириҥ муударас эйигин атын киһи ойоҕуттан — ньуолбар тыллаах-өстөөх туора дьахтартан,

¹⁷эдэр сааһын аргыһын [3] бырахпыт, Таҥаратын кэс тылын кэспит сэлээрчэхтэн — харыстыаҕа.

¹⁸Киһимсэх дьахтар дьиэтэ-уота — өлөр өлүү угаайыта, кини суола-ииһэ үтүгэн түгэҕинээҕи күлүктэргэ түһэрэр.

¹⁹Киниэхэ киирбит дьонтон ким да эргиллибэт, төннөн кэлэн олох суолугар үктэммэт.

²⁰Онон үтүө санаалаахтар суолларын тутус, кырдьыксыт дьон ыллыгынан сырыт.

²¹Тоҕо диэтэххэ, биһиги сирбитигэр көнө сүрэхтээхтэр олоруохтара, ыраас дууһалаахтар хаалыахтара;

²²оттон кэрээнэ суохтар бу сиртэн киэр үтэйиллиэхтэрэ, үктэтиилээх өйдөөхтөр силистэри түөрүллүөхтэрэ.