Read Библия- Yakut Соломуон аман өһө 20 Bible Online

Соломуон аман өһө 20 - Библия- Yakut bible

Соломуон аман өһө 20

¹Аһыы уу араллааннаах, уохтаах утах охсуһуулаах; арыгыны батыһыы — ааргы быһыы.

²Кыыһырбыт ыраахтааҕы уордайбыт хахайга холоонноох: кинини кыйахыыр киһи өлөрүн оҥостор.

³Иирээнтэн тэйэн биэрии — дьоһуннаах быһыы; акаары эрэ барыта ыгым.

⁴Сүрэҕэ суох сирин кэмигэр хоруппат, онон хомуур саҕана быйаҥы ылбат.

⁵Киһи санаата-оноото дириҥ уу кэриэтэ, ол эрээри өйдөөх ону баһан кэбиһиэҕэ.

⁶Бэриниилээхпин дэнээччи элбэх эрээри, дьиҥ эрэбил киһини булан ылыаҥ дуо?

⁷Үтүө киһи омнуота суох олохтоох. Дьоллоох да буоллахтара кини оҕолоро!

⁸Ыраахтааҕы дьүүллүүр бүрүстүөлүгэр олоруо эрэ кэрэх, аньыыны-буруйу курдары көрүөҕэ.

⁹Ким баарый «мин ыраас сүрэхтээхпин, аньыыбыттан-харабыттан ырааһырбытым» диир кыахтаах?

¹⁰Сыыһа көрдөрөр ыйааһын, сымыйа киирэ — АЙЫЫ ТОЙОН хараҕар түктэри.

¹¹Бэл оҕону, дьарыгыттан көрөн, төһө ырааһын, көнөтүн билиэххэ сөп.

¹²Истэр кулгаахпытын, көрөр харахпытын — хайатын да АЙЫЫ ТОЙОН айбыта.

¹³Уһуннук утуйуоҥ — хоргуйуоҥ; утуйар уугун умнуоҥ — айаххын булунуоҥ.

¹⁴Атыылаһааччы түһэрсэ туран: «Куһаҕан, куһаҕан», — диир эрээри, тэйэ түстэ да, киһиргэммитинэн барар.

¹⁵Күн сиригэр көмүс да, күндү таас да элбэх, ол эрээри көрсүө тыл туохтааҕар да ордук.

¹⁶Атын киһи туһугар илии охсустаххына, соҥҥун устуохтара [29], туора киһи иэһин төлүөх буоллаххына, солуок тутуохтара.

¹⁷Албыннаан булуммут килиэбиҥ амтаннаах буолуо эрээри, айаххар киирдэҕинэ, кумахха кубулуйуо.

¹⁸Ким сүбэлэһэр, ол ситиһиилэнэр; үчүгэйдик дьүүллэһэн эрэ баран, сэриилэс.

¹⁹Хобу-сиби таһааччы кистэлэҥи ыһар-тоҕор, онон аһаҕас айахтыын бодоруһума.

²⁰Ийэлээх аҕатын кырыыр киһи уота им балай хараҥаҕа умуллуоҕа.

²¹Тиэтэлинэн туура тутуллубут нэһилиэстибэ тиһэҕэр тугу да туһалыа суоҕа.

²²«Атаҕастаабыттарын иэстэһиллиэ!» — диэмэ; АЙЫЫ ТОЙОҤҤО эрэн, Кини эйигин көмүскүөҕэ.

²³Сымыйа киирэ — АЙЫЫ ТОЙОН хараҕар сидьиҥ суол, сыыһа көрдөрөр ыйааһын — эмиэ түктэри.

²⁴Хардыыгын АЙЫЫ ТОЙОН салайар; ханнык суолунан барыахтааххын бэйэҥ хантан билиэҥий?

²⁵Таҥараҕа андаҕайарга, биитэр толкуйа суох эрэннэрэргэ тиэтэйэр киһи кэнтиккэ киирэн биэрэр.

²⁶Муударай ыраахтааҕы буруйдаахтары булан ылыаҕа, кэлиигэ угаттаан соҕоҕунан үлтү сынньыаҕа.

²⁷Киһи сүрэ — АЙЫЫ ТОЙОН уота — сүрэҕи-быары сырдатан көрөр.

²⁸Төһөнөн ыраахтааҕы кырдьыгы көрөр, көнө, сиэрдээх да, соччонон кини былааһа туругура туруоҕа.

²⁹Эдэр киһи күүһүнэн-уоҕунан киэн туттар, оттон кырдьаҕаһы маҥан баттаҕа киэргэтэр.

³⁰Кырбаммыт кириттэн-дьайыттан ырааһырар, охсуллубут омсотуттан босхолонор.