Read Библия- Yakut Соломуон аман өһө 21 Bible Online

Соломуон аман өһө 21 - Библия- Yakut bible

Соломуон аман өһө 21

¹Ыраахтааҕы сүрэҕэ АЙЫЫ ТОЙОН илиитигэр уу сүүрүгүн кэриэтэ: АЙЫЫ ТОЙОН кинини хайа баҕарар диэки хайыһыннарыаҕа.

²Санааҕар, көнө суолунан иһэҕин эрээри, сүрэххин АЙЫЫ ТОЙОН тургутан көрөр.

³АЙЫЫ ТОЙОН сиэрдээх быһыыны, көнө дьүүлү хайа да сиэртибэтээҕэр сөбүлээн ылынар.

⁴Сиэрэ суох бэрдимсийии, бэйэни үрдүктүк сананыы — нэгэй дьон кэмэлдьитэ; ити барыта аньыы.

⁵Киһи сыралаһан байар-тайар; ким тиэтэйэр, ол дьадайар.

⁶Сымыйаны этэн байарга дьулуһар киһи тыалы-кууһу эккирэтэр, өлөр суолун оҥостор.

⁷Куһаҕаны оҥорооччу буруйа-аньыыта бэйэтигэр түһүөҕэ — көнө суолтан туораабыта кэнчиэлээх буолуоҕа.

⁸Түөкэй суола эрийэ-буруйа барар, оттон ыраас дууһалаах көнө суолу тутуһар.

⁹Киҥнээх дьахтардыын биир дьиэҕэ олоруох кэриэтэ хоспох муннугар соҕотоҕун олорбут ордук.

¹⁰Куһаҕан киһи куһаҕаҥҥа баҕарар, онон доҕорун да харыстыы барыа суоҕа.

¹¹Кэрээнэ суоҕу кэһэттэххинэ, кэнэннэр өйдөнүөхтэрэ; муударайы үөрэттэххинэ, билиитэ-көрүүтэ эбии кэҥиэҕэ.

¹²Кырдьыктаах Таҥара хара санаалаахтар дьиэлэрин кэтээн көрөр, онон кинилэри бүтэһиктээхтик самнарыаҕа.

¹³Дьадаҥы ытыырын истимээри, кулгааҕын саба туттар киһи кэлин бэйэтэ ытыа да, кинини ким да истиэ суоҕа.

¹⁴Кистэлэҥ бэлэх кыыһырбыты сымнатар, куду анньыллыбыт бэрик уордайбыты уҕарытар.

¹⁵Көнө дьүүл кыайдаҕына, кырдьыксыт үөрэр, куһаҕан киһи дьиксинэр.

¹⁶Муударас суолуттан туорааччы өлбүттэр ортолоругар олохсуйуоҕа.

¹⁷Көрү-нары сырсааччы дьадайыаҕа, арыгыны батыһааччы, күндү аһылыгы аһааччы байыа суоҕа.

¹⁸Көнө туһугар көлдьүнү, кырдьыксыт туһугар албынньыты толук биэриэхтэрэ.

¹⁹Куһаҕан майгылаах, киҥнээх дьахтары кытта бииргэ олоруохтааҕар кумах куйаарга соҕотоҕун олорбут ордук.

²⁰Муударай киһи дьиэтэ-уота барҕа баайдаах, оттон акаары булбутун барытын ыһан-тоҕон кэбиһэр.

²¹Көнө сүрэхтээх, үтүө санаалаах киһи уһун олоҕу олоруоҕа, көрдөөбүт кырдьыгын булуоҕа; кини үрдүк аата уһуоҕа.

²²Муударай киһи бухатыырдар куораттарын бас бэриннэриэҕэ, эрэммит кириэппэстэрин үрэйиэҕэ.

²³Ким тылын кыатанар, ол алдьархайтан харыстанар.

²⁴Баламат быһыылаах бэрдимсик — оннугу кэрээниттэн тахсыбыт дииллэр — харса-хабыра суох, туохтан да толлон-торуттан турбат.

²⁵Үлэлиэн баҕарбат күөх көппө аска ымсыыра сытан сутаан өлүөҕэ.

²⁶Кини уһун күнү быһа иҥсэ кэбистэрэр, оттон үтүө киһи дьонугар-сэргэтигэр кэччэйбэккэ бэрсэр.

²⁷Сидьиҥнэр биэрэр сиэртибэлиин сидьиҥнэр, оннооҕор өссө куһаҕан — кэтэх санаалаах бэриллэр сиэртибэ.

²⁸Албын туоһу өлүөҕэ, оттон болҕомтолоох туоһу түмүк тылы этиэҕэ.

²⁹Куһаҕан киһи көрдөххө эрэ хорсун курдук, оттон үтүө киһи көнө суолу бигэтик тутуһар.

³⁰Хайдахтаах да улуу муударас, өркөн өй, өйдөөх сүбэ-ама АЙЫЫ ТОЙОНУ утарар күүһэ суох.

³¹Кыргыһыыга киирээри, аттарын бэлэмнииллэр, ол эрээри кыайыыны АЙЫЫ ТОЙОН бэлэхтиир.