Read Библия- Yakut Соломуон аман өһө 24 Bible Online

Соломуон аман өһө 24 - Библия- Yakut bible

Соломуон аман өһө 24

¹Куһаҕан дьону ордугурҕаама, кинилэрдиин бодоруһа сатаама:

²кэрээнэ суохтар күөмчүлүүр эрэ өйдөөхтөр, киһини үктэтэр эрэ мөккүөрдээхтэр.

³Ыал дьиэтэ-уота муудараһынан тутуллар, мындыр өйүнэн тэриллэр.

⁴Алаһа дьиэ ис бараанын оҥостуу, ону үтүөкэн бэйэлээх күндү малынан толоруу сатабылы эрэйэр.

⁵Ким муударай, ол күүстээх, ким билиилээх, ол кыахтаах [33].

⁶Үчүгэйдик ыараҥнатан көрөн баран сэриилэс; сүбэлэһэр киһи ситиһиилэнэр.

⁷Акаарыга муударас аһара үрдүк, онон элбэх дьон ортотугар кини тугу да булан этиэ суоҕа.

⁸Куһаҕаны оҥорорго сананааччыны уодаһыннаах диэн ааттыахтара.

⁹Өйө суохтар аньыылаах суолга туруналлар. Дьону сиилээччини ким барыта абааһы көрөр.

¹⁰Өскөтүн эн кыһалҕалаах күҥҥэр мөлтөөн-ахсаан биэрэр буоллаххына, ол аата дьиҥ чахчы мөлтөх киһи эбиккин.

¹¹Буруйа суохтарын үрдүнэн, өлөрө илдьэн иһэр дьоннорун өрүһүйэн ыл, өлөргө ууруллубуттартан киэр хайыһыма.

¹²Ама: «Суох, ону билбэккэ хаалбыппыт», — диэн куотунуоҥ дуо? Оттон киһи сүрэҕин-быарын Тургутааччы билбэт үһү дуо? Кутуҥ-сүрүҥ Харабыла барытын көрөр-билэр — Кини хас биирдии киһиэхэ тугу оҥорбутунан төлүөҕэ.

¹³Тоойуом, мүөтү сиир буол, мүөт олус үчүгэй, амтана да минньигэһэ сүрдээх.

¹⁴Муударас эмиэ дууһаҕар ол курдук минньигэс. Муудараһы буллаххына, кэскилиҥ киэҥ буолуоҕа, инникигэ эрэлиҥ энчириэ суоҕа.

¹⁵Аны хара дьайдаахтары батыһан көнө дьону халыырга, кинилэр дьиэлэрин-уоттарын үрэйэргэ сананаайыккыный!

¹⁶Кырдьыксыт, сэттэтэ да охтубутун иһин, туруоҕа, оттон нэгэйдэри иэдээн имири сотуоҕа.

¹⁷Өстөөҕүҥ оҕуттаҕына, үөрүмэ, сүһүөҕүн сүтэрдэҕинэ, өрөгөйдөөмө.

¹⁸АЙЫЫ ТОЙОН эн сэтэрииргин сөбүлүү көрүө суоҕа, онон өстөөххүн уодьуганныыр санаата уларыйыан сөп.

¹⁹Хара дьайдаахтарга абарыма, бардам быһыылаахтарга баҕарыма:

²⁰нэгэй киһи кэскилэ суох — куһаҕан дьон уота-күөһэ умуллуоҕа.

²¹Уолум, АЙЫЫ ТОЙОНТОН уонна ыраахтааҕыттан куттан; өрө турааччылардыын куодарыһыма —

²²кинилэр соһуччу иэдээҥҥэ түбэһиэхтэрэ; Таҥара уонна ыраахтааҕы эйиэхэ тугу оҥоруохтарын эн хантан билэҕин?

²³Муударай өйдөөхтөр өссө маннык этиилэрэ бааллар: Суукка киһини сирэйиттэн көрөн дьүүллээһин — сиэрэ суох быһыы.

²⁴Буруйдааҕы көрөн туран, «сөпкө гыммыккын» диир судьуйаны норуоттар кырыахтара, ким барыта абааһы көрүөҕэ.

²⁵Оттон буруйу оҥорооччулары уодьуганныыр судьуйа дьоллоох — кини бар дьон алгыһын ылыаҕа.

²⁶Киһи киһиэхэ истиҥ эппиэтэ — кини дьиҥ доҕордуу сыһыанын бэлиэтэ.

²⁷Бастаан тиэргэҥҥин көрүн, сиргин-уоккун оҥоһун, дьэ ол эрэ кэннэ олорор дьиэҕин тутун.

²⁸Киһини утары сымыйанан көрдөрүмэ, кинини хараардан албыны-көлдьүнү саҥарыма.

²⁹«Миэхэ хайдах сыһыаннаспытай да, мин эмиэ киниэхэ оннук сыһыаннаһыам, тугу оҥорбутунан көрөн төлүөм!» — диэмэ.

³⁰Биирдэ мин биир сүрэҕэ суох киһи бааһынатынан, уһуну-киэҥи санаабат күөх көппө бинэгирээтин сиринэн ааһан иһэн көрбүтүм,

³¹арай сирин барытын эрбэһин саба үүнэн кэбиспит, бүтэйэ бүтүннүү сиҥнэн түспүт.

³²Ону көрөн, мин элбэҕи эргитэ санаабытым, ол көрбүтүм миэхэ үчүгэй үөрэх буолбута.

³³Кырдьык даҕаны, быыкаатык кум гыныаҥ, нуурайан-нухарыйан ылыаҥ, начааскыга быар куустан сыта түһүөҥ да,

³⁴быстарар муҥуҥ-таҥыҥ, хаамаайы курдук, бу тиийэн кэлиэҕэ, хаһаамматах кыһалҕаҥ, халабырдьыт курдук, кыһарыйбытынан барыаҕа.