Read Библия- Yakut Соломуон аман өһө 25 Bible Online

Соломуон аман өһө 25 - Библия- Yakut bible

Соломуон аман өһө 25

¹Аны бу Соломуон атын бэргэн этиилэрэ бааллар, маны барытын Иудея ыраахтааҕытын Езекия дьоно хомуйан түмпүттэр.

²Таҥара килбиэннээх быһыыта — кистэлэҥинэн дьайыы, ыраахтааҕы килбиэннээх быһыыта — кистэлэҥи чинчийии.

³Ыраахтааҕы санаатын ким да ситэн өйдүүр кыаҕа суох; кини өйө-санаата муҥурун булларбат: халлаан куйаарыныы үрдүк, сир түгэҕинии дириҥ.

⁴Үрүҥ көмүстэн уутун араар, оччоҕо уус киһи онтон бэртээхэй иһити кутан таһаарыа.

⁵Сидьиҥ киһини ыраахтааҕыттан киэр утаар, оччоҕо ыраахтааҕы бүрүстүөлэ кырдьыктааҕынан аатырыа.

⁶Ыраахтааҕы иннигэр туран улуутумсуйума, үрдүк сололоохтору кытта сэргэстэһэ олорума.

⁷Ким эрэ биллиилээх тиийэн кэллэҕинэ, «Киниэхэ туран биэр» дэтэрдээҕэр, «Кэлэн манна үөһэ олор» диэн ыҥыртарарыҥ эйиэхэ ордук буолуо суоҕа дуо? Эт хараххынан көрбүт да буоллаххына,

⁸үҥсэ охсорго тиэтэйимэ; аны атын туоһу көстөн хаалан алҕаскын арыйдаҕына, эн хайдах буолуоҥуй?

⁹Утарсааччыгын кытта бэйэҥ дьыалаҕын-куолугун быһаарыс, атын киһи кистэлэҥин аһан биэримэ.

¹⁰Аны ордук-хоһу тылласпыккын истэн эйигин хомуруйдахтарына, ол саатыттан ханна куотуоҥуй?

¹¹Кэмигэр этиллибит сиэрдээх тыл үрүҥ көмүс иигэ кэтэрдиллибит кыһыл көмүс оҥоһук кэриэтэ.

¹²Болҕомтолоох киһи истэригэр муударай сэмэ кыһыл көмүс биһилэххэ, биитэр ыраас үрүҥ көмүстэн кутуллубут симэххэ холоонноох.

¹³Эрэбил киһитин сорукка ыыппыт тойон, хомуур үлэтин үгэнигэр сөрүүн ууну испиттии, бөҕөхсүйэр; үлэһитэ кини өйүн-санаатын ол курдук көнньүөрдэр.

¹⁴Кураанаҕы эрэннэрэр куба-лахсыыр тыллаах киһи тыалыран-тыалыран баран түспэккэ ааһан хаалар хара былыт кэриэтэ.

¹⁵Улуу тулуур тойону булгурутар, сымнаҕас тыл уҥуоҕу тоһутар.

¹⁶Мүөтү буллаххына, ону дуоһуйа сиэ, ол эрээри сэрэн, аны сүрэххэр түһүө.

¹⁷Доҕоруҥ дьиэтигэр сыбыытаама: хал гыннаххына, эйигин абааһы көрүө.

¹⁸Ыалыҥ киһини утары сымыйа көрдөрүүнү биэрбит буоллаххына, ол аата кинини үҥүүнэн өтөрү түспүккүн, болотунан аспыккын, сытыы оноҕоһунан ыппыккын.

¹⁹Алдьаммыт тиис үчүгэйдик ыстыа, доҕолоҥ атах түргэнник хаамыа дуо? Кыһалҕалаах күҥҥэр саарбах киһиэхэ эрэнимэ.

²⁰Ыар кутурҕаннаахха үөрүүлээх ырыаны ыллааһын тымныы күн киниттэн таҥаһын устан ылбыкка, биитэр бааһыгар [34] уксууһу куппукка тэҥнээх.

²¹Өстөөҕүҥ аччык буоллаҕына аһат, утаппыт буоллаҕына утаҕын ханнар;

²²инньэ гынан, кыбыһыннаран, эн кини баһыгар итии чоҕу тарыйыаҥ. Киниэхэ оҥорбут үтүөҕүн эйиэхэ АЙЫЫ ТОЙОН төлүөҕэ.

²³Хотугу тыал ардаҕы аҕалар, хобуоччу киһи дьону кыыһырдар.

²⁴Киҥнээх дьахтардыын биир дьиэҕэ олоруох кэриэтэ хоспох муннугар соҕотоҕун олорбут ордук.

²⁵Ыраах дойдуттан үтүө сураҕы тутуу утата сылдьан сөрүүн ууну уймахтаабыкка холоонноох.

²⁶Куһаҕан сабыдыалга киирэн биэрбит үтүө киһи илдьи тэпсиллибит дьүүктэҕэ, биитэр сытыйбыт-ымыйбыт холуодьаска холоонноох.

²⁷Аһара элбэх мүөтү сиир, биитэр өрүү хайҕалы кэтэһэр куһаҕан [35].

²⁸Кыыһырбытын кыатаммат киҥнээх киһи эркинэ сиҥнэн түспүт куорат кэриэтэ.