Read Библия- Yakut Иоантан Сибэтиэй Евангелие 10 Bible Online

Иоантан Сибэтиэй Евангелие 10 - Библия- Yakut bible

Иоантан Сибэтиэй Евангелие 10

¹« Дьиҥ кырдьыгы эһиэхэ этэбин: бараан далыгар аанынан киирбэккэ, атын сиринэн күрүөһүлээн киирээччи — ол уоруйах уонна түөкүн,

²оттон аанынан киирээччи — барааннар маныыһыттара.

³Маныыһыкка харабыл ааны аһан биэрэр, барааннар эмиэ кини саҥатын истэллэр; оччоҕо кини барааннарын ааттарынан ыҥыртаан таһырдьа таһаартыыр.

⁴Барааннарын таһааран баран, иннилэригэр киирэн бара турар, барааннар кини саҥатын билэн, батыһан бараллар.

⁵Туора киһи саҥатын атыҥыраан, батыһыахтааҕар буолуох, хата, куотуохтара».

⁶Иисус бу домоҕу кинилэргэ кэпсээбитэ эрээри, кинилэр домох суолтатын өйдөөбөтөхтөрө.

⁷Онон Кини хаттаан эппитэ: «Дьиҥ кырдьыгы эһиэхэ этэбин: Мин барааннар киирэр ааннарынабын.

⁸Мин иннибинэ кэлэ сылдьыбыттар бары уоруйахтар уонна түөкүттэр этилэр, кинилэри барааннар истибэтэхтэрэ.

⁹Мин — ааммын: ким Миигинэн киирбит, ол быыһаныа, киириэ да-тахсыа да, тахсан мэччирэҥи да булуо.

¹⁰Уоруйах уора, өлөрө итиэннэ үрэйэ эрэ кэлэр, оттон Мин эһиэхэ олоҕу — толору олоҕу — биэрэ кэлбитим.

¹¹Мин үтүө маныыһыппын: үтүө маныыһыт барааннарын туһугар олоҕун толук биэрэр.

¹²Наймылаһан үлэлээччи — ол маныыһыт буолбатах, барааннара киниэннэрэ буолбатахтар, онон кини бөрө иһэрин көрдөҕүнэ, барааннары быраҕан атахха биллэрэр, оччоҕо барааннары бөрө тутаттаан сиир, үрүө-тараа ыһыталыыр.

¹³Наймыласпыт маныыһыт наймылаһан үлэлиир буолан, барааннарга кыһаммакка, куотан хаалар.

¹⁴Мин үтүө маныыһыппын: Мин Бэйэм барааннарбын билэбин, кинилэр эмиэ Миигин билэллэр.

¹⁵Аҕам Миигин билэрин курдук, Мин эмиэ Аҕабын билэбин, итиэннэ олохпун барааннарым тустарыгар толук уурабын.

¹⁶Миэхэ атын барааннар эмиэ бааллар, ол гынан баран билигин бу тиэргэҥҥэ кинилэр суохтар, Мин олорбун эмиэ аҕалыахтаахпын. Кинилэр саҥабын истиэхтэрэ, оччоҕо барыта биир үөр, биир Маныыһыт буолуо.

¹⁷Ол иһин Миигин Аҕам — олохпун кэлин хаттаан ылаары биэрэрим иһин — таптыыр.

¹⁸Мин олохпун ким да Миигиттэн былдьаан ылбат — Бэйэм биэрэбин. Мин олохпун биэрэр да, хаттаан ылар да былаастаахпын. Бу — Аҕам Миэхэ соруйбут соруга».

¹⁹Маны истэн иудейдар эмиэ мөккүһэн турбуттара.

²⁰«Абааһыга буулатан өйүттэн тахсыбыт. Кинини тоҕо истэҕит?» — дииллэрэ үгүстэрэ.

²¹Атыттара утараллара: «Бу абааһыга буулаппыт киһи тыла-өһө буолбатах: абааһы көрбөтү көрөр оҥорор үһү дуо?»

²²Ол саҕана Иерусалимҥа Таҥара Дьиэтин Ырааһырдыы бырааһынньыга буолбута. Кыһын этэ.

²³Иисус Таҥара Дьиэтигэр, Соломон колоннадатыгар [38] сылдьыбыта.

²⁴Иудейдар тойотторо Кинини төгүрүйэн баран ыйыппыттара: «Эн биһигини туох да быһаарыыта суох төһө өр маннык сырытыннараары гынаҕын? Биһиэхэ аһаҕастык эт: Эн Христоскун дуо?»

²⁵Иисус кинилэргэ эппитэ: «Эһиэхэ эппитим даҕаны, эһиги итэҕэйбэккит. Аҕам аатынан оҥорор дьайыыларым Мин туспунан туоһулууллар.

²⁶Ол эрээри, Мин эһиэхэ эппитим курдук [39], эһиги Мин барааннарым буолбатаххыт, ол иһин Миигин итэҕэйбэккит.

²⁷Бэйэм барааннарым Мин саҥабын истэллэр, Мин эмиэ кинилэри билэбин, онон Миигин батыһаллар.

²⁸Мин кинилэргэ бараммат олоҕу биэрэбин: кинилэр хаһан даҕаны өлүөхтэрэ суоҕа, ким да Миигиттэн кинилэри былдьаан ылыа суоҕа.

²⁹Миэхэ кинилэри биэрбит Аҕам кимтэн да улахан, онон Аҕабыттан ким да кинилэри былдьыыр кыаҕа суох.

³⁰Аҕам биһикки — биирбит».

³¹Маны этээтин, иудейдар Иисуһу өлөрөөрү, эмиэ таас ылбыттара.

³²«Мин эһиэхэ Аҕабыттан ылан, элбэх үтүөнү оҥордум, — диэбитэ Иисус. — Олортон хайаларын иһин Миигин тааһынан тамнаан өлөрөөрү гынаҕыт?»

³³Иудейдар хардарбыттара: «Үтүөнү оҥороруҥ иһин буолбатах, Таҥараны холуннарарыҥ, киһи эрээригин, Бэйэҕин Таҥарабын дэнэриҥ иһин, өлөрөөрү гынабыт!»

³⁴Иисус эппитэ: «Эһиги Сокуоҥҥутугар „Мин эттим — эһиги таҥараларгыт“ диэн суруллубатаҕа дуо?

³⁵Таҥара Бэйэтин тылын туһаайбыт дьонун Суруйууларга таҥаралар диэн ааттыыр, оттон Суруйуулар көтүллүбэттэр.

³⁶Мин Таҥара Уолунабын диэбиппэр эһиги Миигин Таҥараны холуннараҕын диигит. Оттон Аҕам Миигин Бэйэтэ талан ылан бу дойдуга ыыппыта.

³⁷Аҕам дьайыыларын оҥорбот буоллахпына, эһиги Миигин итэҕэйимэҥ,

³⁸оттон оҥорор буоллахпына, Миигин да итэҕэйбэтэххит иһин, саатар, оҥорор дьайыыларбын итэҕэйиҥ. Оччоҕо эһиги Аҕам Миэхэ баарын, Мин Аҕабар баарбын билиэххит даҕаны, итэҕэйиэххит даҕаны [40]».

³⁹Маны эппитигэр эмиэ тутан ылаары соруммуттара гынан баран, Иисус кинилэргэ киирэн биэрбэтэҕэ.

⁴⁰Кини өссө төгүл Иордан уҥуор баар, урут Иоанн сүрэхтээбит сиригэр баран, төһө эрэ кэм устата онно сылдьыбыта.

⁴¹Киниэхэ бэрт элбэх киһи тиийэрэ. «Иоанн биир да дьиктини оҥорботоҕо гынан баран, Кини туһунан эппитэ барыта кырдьык эбит», — дииллэрэ ол дьон.

⁴²Онно Иисуһу элбэх киһи итэҕэйбитэ.