Read Библия- Yakut Иоантан Сибэтиэй Евангелие 13 Bible Online

Иоантан Сибэтиэй Евангелие 13 - Библия- Yakut bible

Иоантан Сибэтиэй Евангелие 13

¹Паасха бырааһынньыгын иннинэ Иисус бу аан дойдуну хаалларан, Аҕатыгар барар кэмэ кэлбитин билэр буолан, бу дойдуга баар Бэйэтин дьонун тиһэҕэр диэри уостубат тапталынан таптыырын көрдөрбүтэ.

²Киэһээҥҥи аһылык кэмигэр, Симон уолун Иуда Искариокка [46] Кинини таҥнарар санааны адьарай хайыы-үйэ иҥэрбитин кэннэ,

³Иисус, Аҕата барытын Кини илиитигэр биэрбитин, Бэйэтэ Таҥараттан кэлбитин итиэннэ Киниэхэ баран иһэрин билэр буолан,

⁴аһыы олорон, туран, тас таҥаһын устубута, уонна сотторун курданан баран,

⁵суунар тааска уу кутан, үөрэнээччилэрин атахтарын сууйан, курдаммыт сотторунан сотон киирэн барбыта.

⁶Кини Симон Петрга чугаһаан кэлбитигэр Петр: «Тойонуом! Мин атахпын Эн сууйуохтаах үһүгүн дуо?» — диэбитэ.

⁷Иисус эппитэ: «Мин тугу гынарбын эн билигин билбэккин, кэлин өйдүөҕүҥ».

⁸«Эн мин атахпын хаһан да сууйуоҥ суоҕа», — диэбитэ Петр. Иисус эппитэ: «Сууйбатахпына, эн Миэхэ туох да сыһыана суох буолуоҥ».

⁹«Тойонуом! — дии түспүтэ Петр. — Атахпын эрэ буолбакка, илиибин, төбөбүн эмиэ сууй!»

¹⁰Иисус киниэхэ эппитэ: «Сууммут киһи турар бэйэтэ ыраас, онон атаҕын эрэ суунуохтаах. Эһиги эмиэ ырааскыт, ол гынан баран бука бары ыраас буолбатаххыт».

¹¹Иисус, ким таҥнарыахтааҕын билэр буолан, «бука бары ыраас буолбатаххыт» диэбитэ.

¹²Үөрэнээччилэрин атахтарын сууйан, таҥаһын таҥнан, эмиэ өттүгэстээн сытан баран эппитэ: «Бу Мин эһиэхэ анаан тугу гыммыппын билэҕит дуо?

¹³Эһиги Миигин Үөрэтээччи уонна Тойон диэн сөпкө этэҕит, чахчы оннук.

¹⁴Онон Мин, Тойоҥҥут уонна Үөрэтээччигит, атаххытын сууйбут эбит буоллахпына, эһиги бэйэ-бэйэҕит эмиэ атаххытын сууйсуохтааххыт.

¹⁵Манан, Мин тугу гыммыппыный да — эһиги эмиэ оннук гынаргыт туһугар, эһиэхэ холобур көрдөрдүм.

¹⁶Дьиҥ кырдьыгы эһиэхэ этэбин: кулут тойонунааҕар улахан буолбат, ким эмэ ыыппыт киһитэ ыыппытынааҕар улахан буолбат.

¹⁷Эһиги маны билэн оҥорор буоллаххытына — алгыстааххыт.

¹⁸Эһиги барыгыт тускутунан эппэппин: кимнээҕи талан ылбыппын билэбин. Ол эрээри „Миигин кытта бииргэ килиэп сиэччи [47] Миигин тэпсэри оҥоһунна“ диэн Суруйууларга этиллибит туолуохтун.

¹⁹Маны эһиэхэ билигин — туола илигинэ, кэлин туоллаҕына, бу Мин буоларбын итэҕэйэргит туһугар, этэбин.

²⁰Дьиҥ кырдьыгы эһиэхэ этэбин: Мин ыыппыт киһибин ылынааччы Миигин ылынар, оттон Миигин ылынааччы Миигин Ыыппыты ылынар».

²¹Иисус маны этэн баран, ис-иһиттэн долгуйан кэлбитэ. «Дьиҥ кырдьыгы эһиэхэ этэбин, — диэбитэ Кини, — эһигиттэн биир киһи Миигин таҥнарыаҕа».

²²Үөрэнээччилэрэ Кини кими этэрин өйдөөбөккө, сирэй-сирэйдэрин көрсөн кэбиспиттэрэ.

²³Иисус биир таптыыр үөрэнээччитэ Кини аттыгар өттүгэстээн сытара.

²⁴Симон Петр киниэхэ ити ким туһунан этэрин бил диэн бэлиэ биэрбитэ.

²⁵Кини Иисуска ыкса кэлэн: «Тойонуом, ол кимий?» — диэн ыйыппыта.

²⁶«Мин килиэби арыыга умньаан баран биэрэр киһим», — диэн хоруйдаабыта Иисус. Маны этээт, килиэп тооромоһун умньаан ылан, Симон Искариот уолугар Иудаҕа ууммута.

²⁷Бу тооромоһу ылаатын кытта, Иудаҕа сатана киирбитэ. Иисус киниэхэ эппитэ: «Оҥороргун оҥоро оҕус».

²⁸Өттүгэстээн сытааччылартан ким даҕаны Иисус киниэхэ тоҕо итинник эппитин өйдөөбөтөҕө.

²⁹Сорохтор, Иудаҕа харчылаах холбуйа баарын иһин, Иисус киниэхэ «бырааһынньыкка туттуохтаахпытын атыылас» диэбитэ, эбэтэр тугу эмэ дьадаҥыларга биэрэргэ соруйбута буолуо дии санаабыттара.

³⁰Килиэби ылаат, Иуда тахсан барбыта. Түүн этэ.

³¹Кини тахсан барбытын кэннэ, Иисус: «Билигин Киһи Уолун килбиэнэ көһүннэ, Таҥара килбиэнин эмиэ Кини көрдөрдө, — диэбитэ. —

³²Таҥара кэрэмэн килбиэнин Кини көрдөрбүт эбит буоллаҕына, бэрт сотору Таҥара эмиэ Кини килбиэнин көрдөрүөҕэ.

³³Оҕолоруом! Мин эһигини кытта бииргэ сылдьар кэмим кыра хаалла: эһиги Миигин көрдүөххүт гынан баран, иудейдарга эппитим курдук, билигин эһиэхэ эмиэ этэбин: Мин барар сирбэр эһиги кыайан тиийбэккит.

³⁴Мин саҥа кэриэһи эһиэхэ биэрэбин: бэйэ-бэйэҕитин таптааҥ. Мин эһигини хайдах таптаабыппыный да, эһиги эмиэ ол курдук, бэйэ-бэйэҕитин таптааҥ.

³⁵Бэйэҕит икки ардыгытыгар таптал баар буоллаҕына, оччоҕо эһиги Мин үөрэнээччилэрим буоларгытын бары билиэхтэрэ».

³⁶«Тойонуом! Эн ханна бараҕыный?» — диэн ыйыппыта Симон Петр. «Мин барар сирбэр билигин эн Миигин кыайан батыһыаҥ суоҕа, — Иисус хоруйдаабыта, — ол эрээри кэлин батыһан барыаҥ».

³⁷«Тойонуом! Мин билигин Эйигин тоҕо кыайан батыһыам суоҕай? — диэбитэ Петр. — Эн тускар мин тыыммын да толук биэриэм!»

³⁸«Мин туспар тыыҥҥын толук биэриэҥ дуо? — диэбитэ Иисус. — Дьиҥ кырдьыгы эйиэхэ этэбин: бөтүүк хаһыытыан икки ардыгар, эн Миигиттэн үстэ аккаастаныаҥ».