Read Библия- Yakut Иоантан Сибэтиэй Евангелие 4 Bible Online

Иоантан Сибэтиэй Евангелие 4 - Библия- Yakut bible

Иоантан Сибэтиэй Евангелие 4

¹Иисус Иоаннааҕар элбэх үөрэнээччилэнэн эрэрин, кинитээҕэр элбэхтик сүрэхтиирин туһунан сурах фарисейдарга тиийбитин билэн

²(дьиҥэр, Кини Бэйэтэ буолбатах, үөрэнээччилэрэ сүрэхтииллэрэ),

³Иудеяттан араҕан Галилеяҕа төннүбүтэ.

⁴Барар суола Самариянан ааһара.

⁵Кини Самарияҕа Сихарь куоракка, Иаков былыр уолугар Иосифка биэрбит өлбүгэ сирин кытыытыгар кэлбитэ.

⁶Онно Иаков холуодьаһа баара. Иисус айантан сылайан, холуодьас аттыгар сынньана олорбута. Күн ортотун саҕана этэ.

⁷Биир Самария дьахтара холуодьастан уу баһа кэлбитэ. «Уугуттан иһэрт эрэ», — диэбитэ Иисус.

⁸Үөрэнээччилэрэ куоракка ас атыылаһа киирбит кэмнэрэ этэ.

⁹«Миигиттэн, Самария дьахтарыттан, уу көрдүүгүн дуу? — дьахтар соһуйбута. — Эн иудейгын буолбат дуо?» (Иудейдар Самария дьонун иһиттэриттэн аһаабаттар-испэттэр.)

¹⁰Иисус эппитэ: «Таҥара тугу бэлэхтиирин, Ким эйиэхэ уугуттан иһэрт диирин билэриҥ эбитэ буоллар, Киниттэн бэйэҥ көрдөһүөҥ этэ, оччоҕо Кини эйиэхэ өлбөт мэҥэ уутун биэриэ этэ». «

¹¹Тойон! — диэбитэ дьахтар. — Эн уу баһар иһитэ суоххун, холуодьас буоллаҕына дириҥ, ол кэннэ өлбөт мэҥэ уута эйиэхэ хантан баар буолуой?

¹²Эн ама бу холуодьаһы биһиэхэ биэрбит, мантан уолаттарыныын испит, сүөһүлэрин уулаппыт аҕабытынааҕар, Иаковтааҕар, улахан үһүгүн дуо?» «

¹³Бу холуодьастан иһэр киһи сотору син биир утатыаҕа, — диэбитэ Иисус. —

¹⁴Оттон Мин биэрэр уубун иһэр киһи үйэ-саас тухары утатыа суоҕа. Мин биэрэр уум киниэхэ киирэн, бараммат олоххо сүүрүгүрэ устар дьүүктэ уута буолуоҕа».

¹⁵Дьахтар эппитэ: «Тойонуом! Миэхэ ол уугуттан бэрсибэккин ээ. Ону иһэн, аны утаппат буолар буоллахпына, манна уу баһа кэлиэм суоҕа этэ».

¹⁶«Баран эргин ыҥыран кэл», — диэбитэ Иисус.

¹⁷«Мин эрэ суохпун», — диэн хоруйдаабыта дьахтар. «Эрэ суохпун диэн кырдьыгы эттиҥ, — диэбитэ Иисус. —

¹⁸Эн биэстэ эрдэнэ сылдьыбытыҥ, билигин эмиэ эйигин кытта олорооччу эриҥ буолбатах. Ити кырдьыгы эттиҥ». «

¹⁹Тойонуом, мин көрдөхпүнэ, Эн пророк эбиккин, — диэбитэ дьахтар. —

²⁰Биһиги аҕаларбыт бу хайаҕа тахсан Таҥараҕа сүгүрүйэллэрэ, оттон эһиги сүгүрүйэр сир Иерусалимҥа баар диигит».

²¹Иисус эппитэ: «Мин тугу этэрбин итэҕэй: эһиги аны Аҕаҕа сүгүрүйээри бу хайаҕа тахсаргыт да, Иерусалимҥа бараргыт да уурайар кэмэ кэлэн иһэр.

²²Эһиги туохха сүгүрүйэргитин билбэккит, оттон биһиги билэбит — быыһабыл иудейдартан кэлиэҕэ.

²³Ол эрээри Аҕаҕа дьиҥ сүгүрүйээччилэр Тыын күүһүнэн дьиҥнээхтик сүгүрүйэр кэмнэрэ кэлэн иһэр, хайыы-үйэ кэллэ даҕаны. Аҕа оннук сүгүрүйүүнү кэтэһэр.

²⁴Таҥара — Тыын, онон Таҥараҕа сүгүрүйээччилэр Тыын күүһүнэн дьиҥнээхтик Киниэхэ сүгүрүйүөх тустаахтар».

²⁵Дьахтар эппитэ: «Мессия (ол аата Христос) кэлэрин билэбин. Кини кэлэн барытын биһиэхэ быһаарыа».

²⁶«Ол — Мин, бу эйигин кытта Кэпсэтэ Олорооччу буолабын», — диэбитэ Иисус.

²⁷Бу кэмҥэ үөрэнээччилэрэ тиийэн кэлэн, Кини дьахтары кытта кэпсэтэрин көрөн дьиктиргээбиттэрэ; ол да буоллар «Эн киниттэн тугу ирдиигин?» эбэтэр «Кинини кытта тугу кэпсэттиҥ?» диэн ким да ыйыппатаҕа.

²⁸Дьахтар уулаах иһитин хаалларан, куоракка киирбитэ.

²⁹Онно киирэн дьоҥҥо: «Олохпор тугу гыммыппын барытын бэйэбэр этэн биэрбит Киһини баран көрүҥ, — диэбитэ. — Кини Христос буолбатаҕа буолуо дуо?»

³⁰Дьон куораттарыттан тахсан Киниэхэ барбыттара.

³¹Ол кэмҥэ үөрэнээччилэрэ: «Равви, аһаа!» — диэн көрдөспүттэрэ.

³²«Миэхэ эһиги билбэт аһылыккыт баар», — диэбитэ Иисус.

³³Онуоха үөрэнээччилэрэ бэйэлэрин икки ардыларыгар: «Ким эрэ ас аҕалан биэрбитэ буолуо дуо?» — дэһиспиттэрэ.

³⁴Иисус эппитэ: «Мин аһылыгым Миигин Ыытааччы көҥүлүн толоруу уонна Кини үлэтин ситэрии буолар.

³⁵Эһиги аны түөрт ыйынан бурдук быһыыта саҕаланыа дэһэҕит буолбат дуо? Оттон Мин эһиэхэ этэбин: төбөҕүтүн көтөҕөн, бурдуктаах бааһыналар хайдах курдук сырдаабыттарын, быһарга уолдьаспыттарын көрүҥ!

³⁶Бурдук быһааччы төлөбүр да ылар, бараммат олоххо анаан үүнүү да хомуйар, онон быһааччы да, хомуйааччы да иккиэн тэҥҥэ үөрүөхтэрэ.

³⁷Биирэ бурдук ыһар, атына үүнүүтүн хомуйар диэн өс хоһооно сөпкө этэр.

³⁸Мин эһигини бэйэҕит эрэйдэнэн үүннэрбэтэххитин быстара ыыттым: онно атыттар үлэлээбиттэрэ, оттон эһиги кинилэр үлэлэрин түмүгүн үллэстэҕит».

³⁹Бу Самария куоратын үгүс олохтоохторо «Олохпор тугу гыммыппын барытын бэйэбэр кэпсээн биэрдэ» диэбит дьахтары истэн, Иисуһу итэҕэйбиттэрэ.

⁴⁰Онон Киниэхэ кэлэн өссө хаала түһэригэр көрдөспүттэрэ, ол иһин Кини бу куоракка икки күн буолбута.

⁴¹Этэр тылын истэн баран, өссө элбэх киһи итэҕэйбитэ,

⁴²онон дьахтарга этэллэрэ: «Билигин эн эрэ кэпсээҥҥиттэн итэҕэйэр буолбатахпыт, аны бэйэбит иһиттибит, биллибит, Кини чахчы аан дойдуну Быыһааччы, Христос эбит».

⁴³Икки күн буолан баран Иисус Самария сириттэн тахсан, Галилеяҕа барбыта.

⁴⁴Кини пророк бэйэтин дойдутугар хаһан да чиэстэммэт диэн этэрэ.

⁴⁵Галилеяҕа кэлбитигэр Иерусалимҥа бырааһынньыкка сылдьыбыт олохтоохтор, Иисус оҥорбут дьиктилэрин барытын көрбүт буолан, Кинини үчүгэйдик көрсүбүттэрэ.

⁴⁶Иисус ууну арыгыга кубулуппут сиригэр Галилея Канатыгар эргиллэн кэлбитэ. Онно ыраахтааҕы үрдүк сололоох үдьүмэрэ кэлэ сылдьара. Кини уола Капернаумҥа ыалдьа сытара.

⁴⁷Иисус Иудеяттан Галилеяҕа төннөн кэлбит сураҕын истэн, кини Иисуска кэлэн, өлөөрү сытар уолун үтүөрдэригэр көрдөспүтэ.

⁴⁸«Туох эмэ бэлиэни, дьиктини көрө иликкитинэ, эһиги итэҕэйиэххит суоҕа», — диэбитэ Иисус киниэхэ.

⁴⁹«Тойонуом! Оҕом өлө илигинэ, тиийэ оҕус», — ыраахтааҕы үдьүмэрэ көрдөспүтэ.

⁵⁰«Дьиэҕэр төнүн, уолуҥ өлүө суоҕа», — диэбитэ Иисус. Киһи Иисус эппитин итэҕэйэн, дьиэтигэр барбыта.

⁵¹Чаҕардара кинини аара суолга көрсөн, уола үтүөрбүтүн туһунан эппиттэрэ.

⁵²Оҕото төһөҕө үтүөрэн барбытын ыйыппытыгар: «Этэ умайара бэҕэһээ сэттэ чаас [14] саҕана ааспыта», — диэбиттэрэ.

⁵³Оҕо аҕата маны истэн, Иисус уолуҥ өлүө суоҕа диэбит кэмигэр оҕото үтүөрбүтүн билбитэ, онон бэйэтэ да, дьиэлээхтэрэ да бука бары Кинини итэҕэйбиттэрэ.

⁵⁴Иисус бу иккис бэлиэ дьиктини, Иудеяттан Галилеяҕа төннөн кэлэн баран, оҥорбута.