Read Библия- Yakut Сибэтиэй Павел Апостол Титкэ илдьит суруга 1 Bible Online

Сибэтиэй Павел Апостол Титкэ илдьит суруга 1 - Библия- Yakut bible

Сибэтиэй Павел Апостол Титкэ илдьит суруга 1

¹Биир итэҕэллээхпитинэн дьиҥ уолум буолар Титкэ — Таҥара кулута, Иисус Христос Апостола Павелтан. Эйиэхэ Аҕа Таҥарабытыттан уонна Быыһааччыбытыттан — Айыы Тойон Иисус Христостан бары илгэлээх үтүөнү кытта аһыныгас санаа, эйэ-ил тосхойо туруохтун! Таҥара талбыт дьонун итэҕэл, кырдьыгы билии, бэриниилээх буолуу суолугар сирдиирим, сүрэхтэригэр бараммат олоххо эрэли уһугуннарарым туһугар, Кини миигин бу сулууспаны толорторо ыыппыта. Сымыйаны эппэт Таҥара бараммат олоҕу өссө хайа да үйэ үөскүөн инниттэн эрэннэрэн баран, туһааннаах кэмэ кэлбитигэр, Бэйэтин тылын Быыһааччы Таҥарабыт соруйуутунан миэхэ эрэниллибит проповедь тылынан арыйан биэрбитэ.

⁵Мин эйигин сиппэтэх үлэни ситэрдин, куорат аайы пресвитердары анаатын диэн, Крит арыыга хаалларбытым. Барыта эйиэхэ ыйбытым курдук буолуох тустаах:

⁶пресвитер туох да дьиэгэ-омсото суох, биирдэ эрэ кэргэннэммит киһи буолуохтаах; оҕолоро Таҥараны итэҕэйэр, содур быһыыга-майгыга омнуоламмат, истигэн оҕолор буолуохтаахтар.

⁷Таҥараҕа сулууспалыыр, Кини үлэтин иилээн-саҕалаан ыытар киһи быһыытынан, епископ туох да омсото, бардама, киҥэ суох, арыгыга тардыспат, сутуругар сокуоннаммат, харчыга иҥсэрбэт киһи буолуохтаах;

⁸кини ыалдьытымсах хаһаайын, үтүөнү таптыыр, чөлүн харанар, кырдьыгы көрөр, Таҥараны ытыктыыр, бэйэтин кыана туттар киһи буолуохтаах.

⁹Чэгиэн үөрэххэ үөрэтэр, утарсааччыларын алҕастарын ыйар кыахтанар туһугар, кини үөрэммит дьиҥ кырдьыктаах тылын бигэтик тутуһуохтаах.

¹⁰Бас бэриммэт хадаар майгылаах, хойгур тыллаах-өстөөх, албын-көлдьүн киһи бэрт элбэх. Ордук итэҕэйбит иудейдар ортолоругар.

¹¹Оннуктар сааттаах иҥсэҕэ-обокко ылларан үөрэтиэ суохтаахтарыгар үөрэтэннэр, ыалы ыалынан сутуйаллар. Кинилэри айахтарын хам бүөлүөххэ наада.

¹²«Крит олохтоохторо өрүү сымыйаччылар, адьырҕа кыыллар, сүрэҕэ суохтар» диэн хаһан эрэ бэйэлэрин биллиилээх киһилэрэ [1] этэн турар.

¹³Ити чахчыны туоһулуур.

¹⁴Дьэ ол иһин, итэҕэллэрэ чэгиэн буоларын, иудей үһүйээннэрин, кырдьыктан түҥнэри хайыспыт дьон ыйыытын-кэрдиитин истибэт буолалларын туһугар, кинилэри кытаанахтык саралаа.

¹⁵Ыраас дьон санаатыгар туох барыта ыраас, оттон буорту буолбут, итэҕэлэ суох дьоҥҥо, өйдөрө-суобастара кирдээх буолан, ыраас диэн туох да суох.

¹⁶Таҥараны билэбит диэн тыллаахтар эрээри, дьайыыларынан — сидьиҥ быһыыларынан-майгыларынан, бас бэриммэттэринэн, туох да үтүөнү оҥорор кыахтара суоҕунан — Кинини утараллар эрэ.