Read Библия- Yakut Сибэтиэй Иоанн Апостол үһүс илдьит суруга 1 Bible Online

Сибэтиэй Иоанн Апостол үһүс илдьит суруга 1 - Библия- Yakut bible

Сибэтиэй Иоанн Апостол үһүс илдьит суруга 1

¹Күндүтүк саныыр Гаийбар — эйигин ис сүрэҕиттэн таптыыр кырдьаҕастан.

²Таптыыр оҕом, мин эн тускар — барыга бары ситиһиилээх буоларгар, дууһаҥ чөлүн курдук, доруобуйаҥ эмиэ чэгиэн-чэбдик буоларыгар — Таҥарабыттан көрдөһөбүн.

³Бырааттарбыт кэлэн, эн кырдьыгы эрэллээхтик тутуһарыҥ туһунан кэпсээбиттэригэр улаханнык үөрдүм.

⁴Оҕолорум кырдьыгы тутуһан олороллорун истэртэн ордук улахан үөрүү миэхэ суох.

⁵Таптыыр оҕом, бырааттаргар да, айан дьонугар да көмөлөһөргөр барытыгар дьиҥ итэҕэллээх киһи быһыытынан кыһаллаҕын.

⁶Эн кинилэри таптыыргын церковка бырааттарыҥ туоһулаабыттара. Тоойуом, дьоҥҥун Таҥара туһугар сөптөөҕүнэн көрөн тэрийэн ыыттаргын бэрт буолуо этэ.

⁷Итилэриҥ айаҥҥа туруналларыгар итэҕэлэ суохтартан тугу да ылбакка эрэ, Кини аатын туһугар туруммуттара.

⁸Онон кырдьык иһин бииргэ үлэлиир туһугар, биһиги итинник дьоммутун өйүөх-убуох тустаахпыт.

⁹Церковка суруйбутум гынан баран, бастыыр баҕалаах Диотреф биһигини билиммэт.

¹⁰Чэ, тиийдэхпинэ, тугу оҥорбутун санатыам. Биһигини кырыктаах тылынан үөҕэригэр сөп буолбакка, өссө бырааттарбытын киллэрбэтин таһынан, киллэрэр баҕалаахтары кытта бобор, бэл, церковтан үүртэлиир.

¹¹Таптыыр оҕом, эн куһаҕан холобуру батыһыма, үтүө холобуру батыс. Үтүөнү оҥорор киһи — Таҥара киһитэ, оттон куһаҕаны оҥорор киһи Таҥараны билбэт.

¹²Димитрий туһунан ким барыта, оннооҕор дьиҥ кырдьык бэйэтинэн туоһулаабыта; биһиги эмиэ туоһулуубут, оттон биһиги этэрбит кырдьыктааҕын эһиги бэйэҕит билэҕит.

¹³Бэрт элбэҕи суруйуом этэ гынан баран, бөрүөнэн-чэрэниилэнэн кэпсэтиэхпин баҕарбаппын;

¹⁴сотору бэйэҕэр тиийэн, сирэй көрсөн олорон сэһэргэһиэм диэн эрэл санаалаахпын.

¹⁵Эйиэхэ эйэни баҕара хаалабын. Доҕотторуҥ эҕэрдэлэрин ыыталлар; эн эмиэ доҕотторбутугар бука барыларыгар эҕэрдэтэ тириэрт. Аминь [1].